រដ្ឋាភិបាលបារាំងថ្មី បន្ថយរដ្ឋមន្ត្រី និងមានទំនោរស្តាំនិយម
ថ្ងៃសុក្រ ទី១២ មករា ប្រមុខរដ្ឋាភិបាលបារាំងថ្មី លោក ហ្កាប៊្រីយែល អាតតាល់ បានកោះប្រជុំគណៈរដ្ឋមន្ត្រីថ្មី ជាលើកដំបូង ក្រោយពីបានប្រកាសតែងតាំងសមាជិករដ្ឋាភិបាល កាលពីថ្ងៃទី១១មករា។ រដ្ឋាភិបាលបារាំងថ្មី ក្រោមការដឹកនាំរបស់នាយករដ្ឋមន្ត្រីវ័យក្មេង គឺបានបន្ថយចំនួនរដ្ឋមន្ត្រី និងត្រូវគេមើលឃើញថា មានទំនោរស្តាំនិយម។ នៅក្នុងកិច្ចប្រជុំគណៈរដ្ឋមន្ត្រីថ្មីនេះ ប្រធានាធិបតីបារាំង អេម៉ានុយអែល ម៉ាក្រុង ក៏បង្ហាញវត្តមានដែរ។
ចុះផ្សាយនៅថ្ងៃ៖
ស្តាប់ - ០២:៤៧
រដ្ឋាភិបាលបារាំងថ្មី ដឹកនាំដោយនាយករដ្ឋមន្ត្រី ហ្កាប៊្រីយែល អាតតាល់ គឺបានកាត់បន្ថយចំនួនក្រសួង មកត្រឹមតែ ១១ ក្រសួង។ ជាក់ស្តែង ក្រសួងសិក្សាធិការជាតិ និង ក្រសួងកីឡា ត្រូវច្របាច់បញ្ចូលគ្នា មកជាក្រសួងតែមួយ ក្រោមរដ្ឋមន្ត្រីថ្មី គឺ លោកស្រី អាមេលី អ៊ូដេអា កាស្តេរ៉ា ។ រីឯ ក្រសួងការងារ និងក្រសួងសុខាភិបាល ច្របាច់បញ្ចូលគ្នា ហើយដាក់ក្រោមរដ្ឋមន្ត្រីថ្មី គឺ លោក ស្រី កាទ្រីន វូត្រាំង ។ ក្រសួងការបរទេស ត្រូវប្តូរប្រមុខការទូត។ ក្រសួងផ្សេងៗទៀត ខ្លះត្រូវកែឈ្មោះ និងត្រូវទទួលបន្ទុកការងារបន្ថែម។
ការផ្លាស់ប្តូរសមាជិករដ្ឋាភិបាលបារាំងថ្មី នៅលើកនេះ ក៏ត្រូវគេចោទប្រកាន់និងវាយតម្លៃថាជារដ្ឋាភិបាលទំនោរស្តាំនិយម។ នេះក៏ព្រោះតែ ការតែងតាំងរដ្ឋមន្ត្រី ២ នាក់ ដែលជាបុគ្គលស្តាំនិយមដ៏លេចធ្លោ។ ទីមួយ គឺរដ្ឋមន្ត្រីការងារ សុខាភិបាល និងសាមគ្គីភាព លោកស្រី កាទ្រីន វូត្រាំង។ លោកស្រី ជាអតីតរដ្ឋមន្ត្រី របស់ប្រធានាធិបតីស្តាំនិយម ហ្សាក់ ស្ហៀរ៉ាក់ ។
មួយរូបទៀត គឺ រដ្ឋមន្ត្រីវប្បធម៌ថ្មី លោកស្រី រ៉ាឈីដា ដាទី ដែលអ្នកតំណាងរាស្ត្របក្សសាធារណរដ្ឋ ហើយនិងជា អតីតរដ្ឋមន្ត្រីក្រសួងយុត្តិធម៌ របស់អតីតប្រធានាធិបតីស្តាំនិយម នីកូឡា សាកូហ្ស៊ី។ លោកស្រីរដ្ឋមន្ត្រីវប្បធម៌ថ្មីរូបនេះ មានជាប់រឿងអាស្រូវច្រើន ជុំវិញការប្រើឥទ្ធិពលអំណាច និងសំណុំរឿងពុករលួយ។ ក្រោយលេចដំណឹងតែងតាំងលោកស្រីឲ្យចូលរួមជីវភាពនយោបាយជាមួយរដ្ឋាភិបាលថ្មី គឺត្រូវ ប្រធានបក្សសាធារណរដ្ឋ អេរីក ស៊ីយ៉ូទី បណ្តេញនិងលុបឈ្មោះចេញពីបក្សភ្លាមៗ។
រីឯ រដ្ឋមន្ត្រីនៃក្រសួងសំខាន់ៗ ផ្សេងទៀត គឺនៅរក្សាទុកដដែល ដូចជា ក្រសួងយុត្តិធម៌ ការពារជាតិ កសិកម្ម ក្រសួងស្រាវជ្រាវជាន់ខ្ពស់ ហើយជាពិសេស ក្រសួងមហាផ្ទៃ និង ហិរញ្ញវត្ថុ ត្រូវរក្សាទុករដ្ឋមន្ត្រីដដែល បើទោះបីជារដ្ឋមន្ត្រី ២ នាក់នេះ ត្រូវគេសម្លឹងមើលថាជាគូប្រជែងតំណែងនាយករដ្ឋមន្ត្រី ក៏ដោយក្តី។
ដោយឡែក ប្រសិនបើគិតពីសមភាពភេទបុរសស្ត្រី ក្នុងចំណោមរដ្ឋមន្ត្រីកាន់ក្រសួងទាំង ១១ គឺមានប្រុស ៧ នាក់ និងស្រី ៤ នាក់។ ក៏ប៉ុន្តែ រដ្ឋមន្ត្រីប្រតិភូអមនាយករដ្ឋមន្ត្រី ចំនួន ៣នាក់ទៀត គឺសុទ្ធតែស្រី។ ដូច្នេះ គឺឃើញថា ស្របតាមទម្លាប់ចាស់ជាប្រពៃណី ចំនួនរដ្ឋមន្ត្រីបារាំង មានចំនួនស្មើគ្នាដដែល រវាងប្រុសនិងស្រី។
នៅមុខការបើកកិច្ចប្រជុំគណៈរដ្ឋមន្ត្រីមួយថ្ងៃ គឺក្នុងបទសម្ភាសជាមួយទូរទស្សន៍បារាំង TF1 កាលពីថ្ងៃព្រហស្បិ៍ លោកនាយករដ្ឋមន្ត្រីថ្មី ហ្កាប៊្រីយែល អាតតាល់ បានសន្យាព្យាយាមកាត់បន្ថយពន្ធ ចំពោះប្រជាជនដែលមានកម្រិតជីវភាពមធ្យម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ