សហភាពអឺរ៉ុបអនុម័តផែនការឧស្សាហកម្មបៃតង ប្រជែងចិននិងអាមេរិក
សភាអឺរ៉ុបនិងរដ្ឋជាសមាជិកសហភាពទាំង២៧បានព្រមព្រៀងគ្នានៅល្ងាចថ្ងៃទី ៦កុម្ភៈ២០២៤ បន្ធូរបន្ថយបទប្បញ្ញត្តិដើម្បីពង្រឹងភាពប្រកួតប្រជែងនឹងចិនព្រមទាំងសហរដ្ឋអាមេរិក ក្នុងផ្នែកបច្ចេកវិទ្យាឧស្សាហកម្មបៃតង។ ហើយអឺរ៉ុបក៏មិនរើងអើងលើវិស័យថាមពលនុយក្លេអ៊ែរទៀតដែរ ក្នុងបុព្វហេតុអព្យាក្រិត្យកាបូននេះ។
ចុះផ្សាយនៅថ្ងៃ៖
ស្តាប់ - ០២:៣៤
ដើម្បីសម្រេចកម្មវត្ថុអព្យាក្រិត្យកាបូន នៅឆ្នាំ២០៥០ កាត់បន្ថយថាមពលផូស៊ីលដែលបំពុលបរិយាកាសខ្លាំង ឱ្យបាន៨០%នៅឆ្នាំ២០៤០ និងអធិបតេយ្យភាពថាមពល លែងរំពឹងលើប្រេង/ឧស្ម័នរុស្ស៊ី សភាអឺរ៉ុបនិងរដ្ឋជាសមាជិកបានអនុម័តនៅល្ងាចថ្ងៃអង្គារទី៦កុម្ភៈ២០២៤ផែនការឧស្សាហកម្មបៃតង ដែលធានាបាននូវភាពប្រកួតប្រជែងឧស្សាហកម្ម។ អឺរ៉ុបផ្តល់អាទិភាពដល់វិស័យថាមពលស្អាត គឺ ការអភិវឌ្ឍបច្ចេកវិទ្យាថាមពលព្រះអាទិត្យ (ផ្ទាំងសូឡា) ថាមពលវាយោ (កង្ហារ) អាគុយ និងបច្ចេកវិទ្យាអ៊ីដ្រូហ្សែនកើតឡើងវិញ ...។
ប្រឈមនឹងចិនដែលតែងផ្តល់ជំនួយឧបត្ថម្ភដល់ក្រុមហ៊ុន និងសហរដ្ឋអាមេរិកដែលមានច្បាប់កាត់បន្ថយអតិផរណាInflation Reduction Act អឺរ៉ុបត្រូវតែការពារឧស្សាហកម្មរបស់ខ្លួនដែរ។ ផែនការទើបអនុម័តនេះ នឹងផ្តល់ជំនួយផ្នែកបទប្បញ្ញត្តិ ដើម្បីពង្រឹងភាពប្រកួតប្រជែងបច្ចេកវិទ្យាបៃតងផង ដើម្បីពង្រឹងផលិតកម្មថាមពលស្អាតនៅលើទឹកដីអឺរ៉ុបឱ្យបានច្រើនជាងមុនផង និងដើម្បីបង្កើនចំណែកនៅលើទីផ្សារថាមពល ឱ្យបានមួយជាបី ពោលគឺក្នុងទំហំ៦០០ពាន់លានអឺរ៉ូក្នុងមួយឆ្នាំ ពីពេលនេះដល់ឆ្នាំ២០៣០។ អឺរ៉ុបសង្ឃឹមពន្លឿនសកម្មភាព និងសម្រេចកម្មវត្ថុឈានទៅប្រើថាមពលអគ្គិសនីផលិតនៅក្នុងទឹកដីអឺរ៉ុបខ្លួនឯង បាន៤០%នៃសេចក្តីត្រូវការ នៅឆ្នាំ២០៣០ ទល់នឹង២២%នៅពេលបច្ចុប្បន្ន។ បច្ចុប្បន្ននេះ បច្ចេកវិទ្យាថាមពលកើតឡើងវិញ ច្រើនតែផលិតនៅក្រៅសហភាពអឺរ៉ុប។ ជាក់ស្តែង ៩០%នៃផ្ទាំងសូឡាប្រើនៅអឺរ៉ុប ផលិតនៅចិន។
ស្របតាមបទប្បញ្ញត្តិបំពាក់ឧស្សាហកម្មគ្មានបញ្ចេញឧស្ម័នផ្ទះកញ្ចក់ ដំណើរបែបបទសុំបង្កើតរោងចក្រផលិតគ្រឿងផ្សំនៃវិស័យយុទ្ធសាស្ត្រ ត្រូវបានសម្រួលឱ្យមានលក្ខណៈសាមញ្ញជាងមុននិងប្រើរយៈពេលខ្លី ត្រឹម១៨ខែសម្រាប់គម្រោងឧស្សាហកម្មធំ និង១២ខែសម្រាប់គម្រោងតូចល្មម។
ផ្ទុយពីសំណើកាលពីឆ្នាំ២០២៣ ផែនការថ្មីបានបញ្ចូលថាមពលនុយក្លេអ៊ែរ ក្នុងបញ្ជីបច្ចេកវិទ្យាយុទ្ធសាស្ត្រដែរ តែរដ្ឋជាសមាជិកនីមួយៗមានសេរីភាពក្នុងការជ្រើសរើសបច្ចេកវិទ្យាឬច្រានថាមពលនុយក្លេអ៊ែរ ក្នុងការសម្រេចផែនការទ្រទ្រង់ឧស្សាហកម្មបៃតង។ ប៉ុន្តែបើនិយាយអំពីហិរញ្ញវត្ថុវិញ អឺរ៉ុបមានមហិច្ឆតាទាបណាស់។ ផែនការមានទឹកប្រាក់តែ១៥០០លានអឺរ៉ូប៉ុណ្ណោះ និងជាកញ្ចប់ទឹកលុយដែលមានស្រាប់ គ្រាន់តែបង្វិលបង្វែរប្រើក្នុងកន្លែងផ្សេងដូចជាជួយដល់ការស្រាវជ្រាវនិងអភិវឌ្ឍន៍ជាដើម។ សហភាពនៅមិនទាន់សម្រេចបាន អធិបតេយ្យភាពមូលនិធិអឺរ៉ុបទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ