អ៊ុយក្រែនប្តូរមេទ័ពថ្មី ជាមួយយុទ្ធសាស្ត្រថ្មីដើម្បីឈ្នះសង្គ្រាម
មួយថ្ងៃក្រោយទទួលតំណែងជាមេទ័ពនៃកងកម្លាំងយោធាអ៊ុយក្រែន លោក អូឡេក សៀរស្គី បានបង្ហាញផែនការដ៏ច្បាស់លាស់មួយក្នុងការធ្វើសង្គ្រាមរុញច្រានរុស្ស៊ី គឺសម្រិតសម្រាំងកម្លាំងទ័ពនិងមធ្យោបាយ ដើម្បីឈ្នះសង្គ្រាម។ ប៉ុន្តែសម្រាប់មូស្គូ ការប្តូរផ្លាស់ក្បាលម៉ាស៊ីនកងទ័ពរបស់ក្រុងកៀវនឹងមិនប្តូរផ្លាស់ស្ថានការណ៍លើសមរភូមិទេ។
ចុះផ្សាយនៅថ្ងៃ៖
ស្តាប់ - ០២:៤៨
ក្នុងខណៈដែលជំនួយយោធាអាមេរិកកំពុងជាប់គាំងនៅសភា ហើយកងទ័ពអ៊ុយក្រែនហាក់រុលទៅមុខលើសមរភូមិយ៉ាងលំបាក អ៊ុយក្រែនបានសម្រេចធ្វើការផ្លាស់ប្តូរមេទ័ពថ្មី ជាមួយនឹងយុទ្ធសាស្ត្រថ្មី។ លោកឧត្តមសេនីយ៍Valery Zaloujny មេទ័ពចាស់ដ៏មានប្រជាប្រិយភាពបំផុតក្នុងចំណោមយោធា ត្រូវបានផ្លាស់ចេញនៅថ្ងៃព្រហស្បតិ៍ទី៨កុម្ភៈ២០២៤ និងជំនួសមកវិញដោយមេទ័ពថ្មីគឺលោក Oleksandre Syrsky។ ពីរឆ្នាំក្រោយសង្គ្រាម អ៊ុយក្រែនចាំបាច់ត្រូវតែធ្វើការប្តូរផ្លាស់។ នេះជាប្រសាសន៍បំភ្លឺរបស់លោកប្រធានាធិបតីអ៊ុយក្រែន ហ្សេឡេនស្គី ដោយបញ្ជាក់ថា លោក អូឡេកសង់ សៀរស្គី ជាឧត្តមសេនីយ៍ដ៏មានបទពិសោធន៍ខ្ពស់ជាងគេបំផុតនៅអ៊ុយក្រែន។
ប្រឈមនឹងក្តីព្រួយបារម្ភខ្លាចជំនួយលោកខាងលិចថយចុះបណ្តាលមកពីចរន្តប្រឆាំងផ្ទៃក្នុងអាមេរិកនិងអឺរ៉ុប លោកហ្សេឡេនស្គីក៏បានទាមទារភ្លាមដែរ ឱ្យមេទ័ពថ្មី បង្ហាញផែនការប្រយុទ្ធ “អាចសម្រេចបាន”សម្រាប់ឆ្នាំ២០២៤។
តើផែនការយកឈ្នះមានខ្លឹមសារយ៉ាងណា?
គឺជាផែនការដែលមានរៀបរាប់យ៉ាងលម្អិតនិងយ៉ាងច្បាស់លាស់នូវរាល់គ្រប់សកម្មភាពរបស់ផ្នែកនីមួយៗ។ នេះបើតាមលោកសៀរស្គីដែលថ្លែងជាសាធារណៈជាលើកទីមួយក្នុងនាមជាមេទ័ព ដោយអះអាងទៀតថា មានតែការប្តូរផ្លាស់និងសម្រិតសម្រាំងប្រកបដោយសុក្រិតភាពមធ្យោបាយនិងវិធីសាស្ត្រធ្វើសង្គ្រាមជាប់រហូតទេទើបអាចយកឈ្នះបាន។ ប៉ុន្តែបញ្ហាដ៏ចម្បងសម្រាប់ពេលនេះ គឺយោធាអ៊ុយក្រែនខ្វះគ្រាប់រំសេវ។ ការចែកចាយនិងបញ្ជូនគ្រាប់ឱ្យបានលឿនរហ័សនិងគ្រប់ចំនួនជាប្រការចាំបាច់សម្រាប់កងពលប្រយុទ្ធ ជានិងនៅតែជាអាទិភាពគោល។ បើតាមលោកមេទ័ពសៀរស្គីដែលធ្លាប់ជាមេបញ្ជាការកងកម្លាំងទ័ពជើងគោក កំរិតការបាត់បង់ជីវិត និងគិតគូរដល់សុខភាពកងទ័ព ក៏ជាគោលការណ៍គ្រឹះរបស់យោធាអ៊ុយក្រែនដែរ។
រុស្ស៊ីដែលធ្លាប់បានធ្វើការប្តូរផ្លាស់មេដឹកនាំកងទ័ពជាច្រើនដងនោះ បានបញ្ចេញប្រតិកម្មតបថា ការប្តូរផ្លាស់មេទ័ពនៅអ៊ុយក្រែន មិនប៉ះពាល់ដល់ឆន្ទៈរបស់ក្រេមឡាំងក្នុងបន្តប្រតិបត្តិការយោធាពិសេសនៅអ៊ុយក្រែន និងមិនមែនជាកត្តានាំឱ្យស្ថានភាពនៅលើសមរភូមិប្រែប្រួលឡើយ។ នេះបើតាមសំដីរបស់អ្នកនាំពាក្យវិមានក្រេមឡាំងនៅថ្ងៃសុក្រម្សិលមិញ។ លោកប្រធានាធិបតីរុស្ស៊ីពូទីន ក៏បានអះអាងប្រាប់អ្នកកាសែតអភិរក្សនិយមអាមេរិកស្និទ្ធនឹងលោកដូណាល់ត្រាំដោយផ្ទាល់ដែរថា រុស្ស៊ីមិនអាចចាញ់សង្គ្រាមនៅអ៊ុយក្រែនទេ។
សូមបញ្ជាក់ថា ប្រឈមនឹងកង្វះគ្រាប់កាំភ្លើងដ៏ចាំបាច់សម្រាប់តតាំងនឹងការវាយលុករបស់រុស្ស៊ី យោធាអ៊ុយក្រែនពេលនេះ ផ្ចង់ការវាយប្រហារដោយប្រើដ្រូននិងមីស៊ីលទៅលើទីតាំងយោធានិងថាមពលក្នុងទឹកដីរុស្ស៊ី ដើម្បីបង្ខំរុស្ស៊ីឱ្យដកកម្លាំងទ័ពនិងអាវុធខ្លះចេញពីសមរភូមិទៅការពារខ្សែត្រៀមខាងក្រោយ។ ម្សិលមិញ កងទ័ពពិសេសអ៊ុយក្រែនបានធ្វើឱ្យខូចខាតទីតាំងប្រេងឥន្ធនៈពីរកន្លែងសម្រាប់ផ្គត់ផ្គង់ប្រេងដល់កងពលរុស្ស៊ីនៅអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ