អឺរ៉ុបនៅលើផ្លូវដ៏វែងឆ្ងាយ ដើម្បីអាចក្លាយជាឃ្លាំងផ្គត់ផ្គង់ អាវុធឲ្យអ៊ុយក្រែន
ឆន្ទៈធំហួសមាឌ ហួសសមត្ថភាពដែលខ្លួនមាន។ នៅចំពោះមុខសង្រ្គាមរុស្ស៊ីឈ្លានពានអ៊ុយក្រែន នៅក្បែររបងរបស់ខ្លួន សហភាពអឺរ៉ុបធ្លាប់ប្រកាសជួយអ៊ុយក្រែន តាមគ្រប់មធ្យោបាយ។ នៅខែមីនាឆ្នាំមុន សហភាពអឺរ៉ុបសម្រេចផ្តល់កញ្ចប់ជំនួយ ២ពាន់លានអឺរ៉ូសម្រាប់ការបញ្ជូនសព្វាវុធទៅឲ្យអ៊ុយក្រែន ដែលនៅក្នុងនោះ មានគ្រាប់ប្លោង ១លានគ្រាប់ ក្នុងរយៈពេលឆ្នាំ។ ប៉ុន្តែ នៅលើទីតាំងជាក់ស្តែង ការអនុវត្តមិនដូចការសន្យាព្រោះថា មានគ្រាប់ប្លោងតែ ជាង៣សែនគ្រាប់ប៉ុណ្ណោះ ដែលអឺរ៉ុបបានផ្តល់ទៅឲ្យអ៊ុយក្រែន។ នៅក្នុងកាលៈទេសៈដែលអ៊ុយក្រែនសព្វថ្ងៃ កាន់តែខើច ខ្វះអាវុធធ្វើសង្រ្គាម ចំណែក រដ្ឋបាលអាមេរិកកំពុងទ័លច្រកមិនអាចផ្តល់កញ្ចប់ជំនួយយោធា ៦០ពាន់លានដុល្លារ ដល់អ៊ុយក្រែន ដោយសារតែការប្រឆាំងរបស់គណបក្សសាធារណរដ្ឋនៅសភា។ អឺរ៉ុបគ្មានជម្រើសច្រើនក្រៅតែពីពឹងលើវិស័យឧស្សាហកម្មផលិតអាវុធក្នុងទឹកដីអឺរ៉ុប ដើម្បីធានាផ្តល់អាវុធដល់អ៊ុយក្រែន។ ប៉ុន្តែសួរថា តើអឺរ៉ុបអាចមានសមត្ថភាព បន្តវេន ជំនួសអាមេរិក ក្នុងរឿងបញ្ជូនអាវុធទៅជួយអ៊ុយក្រែនដែរឬទេ?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៤:១៧
អាមេរិកជាប្រទេសផ្តល់ជំនួយយោធាធំបំផុតរបស់អ៊ុយក្រែន។ ចាប់តាំងពីរុស្ស៊ីចូលធ្វើសង្រ្គាមឈ្លានពានអ៊ុយក្រែន នៅខែកុម្ភៈ ឆ្នាំ ២០២២ អាមេរិកផ្តល់អាវុធ តម្លៃ ៤៤,៥ពាន់លានដុល្លារ ទៅឲ្យអ៊ុយក្រែន។ ប៉ុន្តែ ចាប់តាំងពីកញ្ចប់ជំនួយថ្មីសម្រាប់អ៊ុយក្រែន ប្រមាណ ៦០ពាន់លានដុល្លារ នៅជាប់ក្នុងសភាអាមេរិក ដោយសារតែការលើកដៃប្រឆាំងរបស់គណបក្សសាធារណរដ្ឋ ចំណែកលោកដូណាល់ ត្រាំអាចឈ្នះឆ្នោត ត្រលប់មកដឹកនាំអាមេរិកសាជាថ្មី សំពាធបានធ្លាក់មកលើអឺរ៉ុប។
គិតតាំងពីពេលដែលកងទ័ពរុស្ស៊ីចូលឈ្លានពានអ៊ុយក្រែន សហភាពអឺរ៉ុប ដែលមាន២៧ប្រទេសបានប្រមែប្រមូលថវិកា ២៨ពាន់លានអឺរ៉ូសម្រាប់ជួយកងទ័ពអ៊ុយក្រែន។ នៅខែមីនាឆ្នាំមុន អឺរ៉ុបនៅបានសន្យាផ្តល់កញ្ចប់ជំនួយយោធា ២០ពាន់លានអឺរ៉ូសម្រាប់ជួយអ៊ុយក្រែន ក្នុងឆ្នាំ ២០២៤។
អាល្លឺម៉ង់ដែលផ្តល់ជំនួយយោធាច្រើនជាងគេនៅអឺរ៉ុប ប្រមាណ ៧ពាន់លានអឺរ៉ូទៅឲ្យអ៊ុយក្រែនទាមទារឲ្យសមាជិកអឺរ៉ុប បង្កើនជំនួយបន្ថែមទៀត ជួយអ៊ុយក្រែន ជាពិសេស នៅក្នុងកាលៈទេសៈដែលអ៊ុយក្រែន កំពុងត្រូវការអាវុធបន្ទាន់ ហើយកញ្ចប់ជំនួយយោធារបស់អាមេរិកសម្រាប់អ៊ុយក្រែនក៏កំពុងជាប់គាំង នៅសភាអាមេរិក។
ប៉ុន្តែ ការអំពាវនាវរបស់នាយករដ្ឋមន្រ្តីអាល្លឺម៉ង់ដែលចង់ឲ្យអឺរ៉ុបប្រឹងប្រែងបន្ថែមទៀត ដើម្បីផ្តល់អាវុធជួយអ៊ុយក្រែន គ្មានប្រយោជន៍ទេ។ នៅខែមីនា ឆ្នាំមុន អឺរ៉ុបធ្លាប់សន្យាផ្តល់គ្រាប់ប្លោង១លានគ្រាប់ទៅឲ្យអ៊ុយក្រែន ក្នុងរយៈពេលមួយឆ្នាំ ប៉ុន្តែ គិតត្រឹមចុងឆ្នាំមុន អ៊ុយក្រែនបានទទួលតែ ជាង៣សែនគ្រាប់ប៉ុណ្ណោះ។
អឺរ៉ុបផ្តល់គ្រាប់ប្លោងមិនគ្រប់ចំនួន តាមកាលកំណត់ ទៅឲ្យអ៊ុយក្រែន ដោយសារតែអឺរ៉ុបមានការយឺតយ៉ាវខ្លាំង នៅក្នុងខ្សែសង្វាក់ផលិតកម្មអាវុធ។ នៅក្នុងរង្វង់សហភាពអឺរ៉ុប មានប្រទេសអឺរ៉ុបចំនួន១១ មានរោងចក្រផលិតគ្រាប់ប្លោង ប៉ុន្តែ ប្រទេសនីមួយៗផលិត និងលក់នាំចេញទៅបរទេស រៀងៗខ្លួន ពោលគឺមិនបាននិយាយសម្របសម្រួលគ្នា ដើម្បីផលិតទុកសម្រាប់តែអ៊ុយក្រែន។ នៅត្រង់ចំណុចនេះ ប្រមុខការបរទេសអឺរ៉ុប លោកហ្សូសេហ្វ បូរែលបានអំពាវនាវឲ្យសមាជិកអឺរ៉ុបផ្អាកលក់អាវុធទៅឲ្យប្រទេសដែលគ្មានសង្រ្គាម ប៉ុន្តែ ទុកសម្រាប់បញ្ជូនទៅជួយកងទ័ពអ៊ុយក្រែន។
ហេតុផលមួយទៀតដែលធ្វើឲ្យអឺរ៉ុបមិនអាចបញ្ជូនសព្វាវុធ ទាន់ពេលវេលា និងគ្រប់ចំនួនទៅឲ្យអ៊ុយក្រែន តាមការសន្យារបស់ខ្លួន នោះគឺរហូតមកដល់ពេលនេះ គ្មានប្រទេសណាមួយដែលមានឧស្សាហកម្មផលិតអាវុធធំដុំនោះទេ សូម្បីអាល្លឺម៉ង់ បារាំងនិងអ៊ីតាលី ដែលជាក្បាលម៉ាស៊ីនសេដ្ឋកិច្ចរបស់អឺរ៉ុប។
សម្រាប់អ្នកជំនាញអាល្លឺម៉ង់ លោកChristian Mölling ប្រទេសនៅអឺរ៉ុបលែងមានសមត្ថភាពផលិតអាវុធក្នុងទ្រង់ទ្រាយធំ ដើម្បីឆ្លើយតបទៅនឹងតម្រូវការក្នុងពេលមានសង្រ្គាម ព្រោះថា មូលដ្ឋានគ្រឹះនៃឧស្សាហកម្មផលិតអាវុធរបស់អឺរ៉ុបត្រូវបានរុះរើ កាត់បន្ថយ លែងជាអាទិភាព នៅក្រោយសម័យសង្រ្គាមត្រជាក់។
ដោយគិតតែផ្តោត ជំរុញវិស័យសេដ្ឋកិច្ច អឺរ៉ុបវិនិយោគតិចតួចណាស់លើឧស្សាហកម្មផលិតអាវុធ។ ដើម្បីការពារខ្លួន ប្រទេសនៅអឺរ៉ុបសុខចិត្តចំណាយលុយទៅអាវុធពីបរទេស ឬពឹងផ្អែកលើកញ្ចប់ថវិកាការពារជាតិអឺរ៉ុប ដើម្បីទិញអាវុធពីអាមេរិក។ តាមវិទ្យាស្ថានទំនាក់ទំនងអន្តរជាតិ និងយុទ្ធសាស្រ្ត នៅក្នុងចំណោមថវិកា ១០០ពាន់លានអឺរ៉ូដែលអឺរ៉ុបចំណាយសម្រាប់ទិញ អាវុធពីប្រទេសពីឆ្នាំ ២០២២ ដល់ឆ្នាំ ២០២៣ ៦៣%សម្រាប់ទិញអាវុធពីអាមេរិក ចំណែក១៣%ពីកូរ៉េខាងត្បូង។
អឺរ៉ុបត្រូវការពឹងផ្អែកលើអាវុធអាមេរិក ដោយសារតែមិនអាចមិនពង្រឹងឧស្សាហកម្មផលិតអាវុធក្នុងស្រុក។ មិនអាចជំរុញឧស្សាហកម្មផលិតអាវុធ ដោយសារតែគ្មានការលើកទឹកចិត្តជំរុញការវិនិយោគពីរដ្ឋាភិបាល និងសហភាពអឺរ៉ុបខ្លួនឯង។ នេះគេនៅមិនទាន់និយាយពីភាពអាត្មានិយម ជាតិនិយមរបស់ប្រទេសសមាជិកអឺរ៉ុបនីមួយៗ ដែលចង់ពឹងផ្អែកលើកញ្ចប់ថវិការួមរបស់អឺរ៉ុប ជាជាងចេញលុយពីហោប៉ៅផ្ទាល់ខ្លួន។ ហេតុផលទាំងអស់នេះដែលធ្វើឲ្យសហភាពអឺរ៉ុប មាន ២៧ប្រទេស មិនអាចផ្តួចផ្តើមគំនិតគ្នាជាធ្លុងមួយ ដើម្បីពង្រឹងឧស្សាហកម្មផលិតអាវុធឲ្យធំដុំដូចអាមេរិក។ ជាលទ្ធផល នៅចំពោះមុខតម្រូវការទាមទារចង់បានរបស់អ៊ុយក្រែន ដើម្បីធ្វើសង្រ្គាមតទល់រុស្ស៊ី អឺរ៉ុបនៅស្ថិតនៅលើផ្លូវដើរដ៏វែងឆ្ងាយទៀត ដើម្បីអាចជំនួស អាមេរិក នៅក្នុងរឿងផ្តល់ជំនួយសព្វាវុធទៅអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ