កងទ័ពអ៊ុយក្រែនបាញ់ពន្លិចនាវាចម្បាំងរបស់រុស្ស៊ីមួយគ្រឿងទៀត នៅតំបន់ទឹកគ្រីមេ
នៅក្នុងដំណើរចុះជួបកងទ័ព នៅសមរភូមិ នៅថ្ងៃពុធទី ១៤កុម្ភៈនេះ មេទ័ពថ្មីរបស់អ៊ុយក្រែនព្រមានថា សមរភូមិជួរមុខ ស្មុគស្មាញ និងពិបាកបំផុត។ លោកអូឡេកសង់ សៀរស្គី ដែលទើបចូលកាន់តំណែងជាមេទ័ពថ្មីដឹកនាំកងកម្លាំងយោធាអ៊ុយក្រែន កាលពីសប្តាហ៍មុន ទទួលស្គាល់ថា កងទ័ពរុស្ស៊ីមានប្រៀប ក្នុងផ្នែកធនធានមនុស្ស។ នៅទឹ្រង មិនអាចវាយទម្លុះខ្សែប្រយុទ្ធរបស់រុស្ស៊ី នៅសមរភូមិដីគោក ប៉ុន្តែ កងទ័ពអ៊ុយក្រែនជោគជ័យច្រើននៅជើងទឹក។ នៅថ្ងៃពុធនេះដែរ ភ្នាក់ងារស៊ើបការណ៍សម្ងាត់របស់អ៊ុយក្រែន អះអាងថា គេបានបាញ់ពន្លិចនាវាចម្បាំងដ៏ធំមួយគ្រឿងទៀតរបស់រុស្ស៊ី នៅភាគខាងត្បូងគ្រីមេក្នុងសមុទ្រខ្មៅ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០១
នៅក្នុងរយៈពេលតែ ២សប្តាហ៍ កងទ័ពអ៊ុយក្រែនបាញ់ពន្លិចនាវាចម្បាំងរុស្ស៊ីដល់ទៅ២គ្រឿង នៅសមុទ្រខ្មៅ។ តាមការប្រកាសរបស់កងទ័ពអ៊ុយក្រែន នៅថ្ងៃពុធទី ១៤កុម្ភៈ កងទ័ពរួមជាមួយក្រុមចារកិច្ចរបស់ក្រសួងការពារជាតិបាញ់ពន្លិចនាវាចម្បាំងមួយគ្រឿងទៀត របស់រុស្ស៊ី ឈ្មោះ Caesar Kounikouvនៅភាគខាងត្បូងគ្រីមេ ទឹកដីរបស់អ៊ុយក្រែន ដែលត្រូវរុស្ស៊ីកាត់យកទៅបញ្ចូលក្នុងផែនទីរបស់ខ្លួនកាលពីឆ្នាំ ២០១៤។
កងទ័ពអ៊ុយក្រែនអះអាងថា គេប្រើដ្រូនក្នុងទឹក ទៅបាញ់បំផ្លាញកប៉ាល់ចម្បាំងរបស់រុស្ស៊ីនៅក្បែរគ្រីមេ។ រូបភាពរបស់ទីភ្នាក់ងារស៊ើបការណ៍សម្ងាត់អ៊ុយក្រែន បង្ហាញភ្លើង ផ្សែងអណ្តែតទ្រលោមនៅសមុទ្រខ្មៅ។
នៅក្រោយការអះអាងរបស់អ៊ុយក្រែន ភាគីរុស្ស៊ីមិនបាននិយាយអ្វីទាក់ទងនឹងការវាយប្រហារលើកប៉ាល់ចម្បាំងរបស់ខ្លួន ប៉ុន្តែ លើកឡើងថា នៅថ្ងៃពុធនេះ រុស្ស៊ីបានបាញ់ទម្លាក់ដ្រូន៦គ្រឿងរបស់អ៊ុយក្រែន។ បើសិនការអះអាងរបស់អ៊ុយក្រែនជាការពិត នោះវាជាការបាត់បង់មួយដ៏ធំសម្រាប់រុស្ស៊ី ព្រោះថា កប៉ាល់ចម្បាំងឈ្មោះ Caesar Kounikouv ដែលធ្លាប់ចូលរួមនៅក្នុងសង្រ្គាមដណ្តើមទឹកដីហ្សកហ្ស៊ី កាលពីឆ្នាំ ២០០៨ មានតម្លៃ ៧០លានដុល្លារ។ អាចដឹកជញ្ជូនរថក្រោះ និងកងទ័ពចូលដល់ដីគោក នាវាចម្បាំង Caesar Kounikouvដើរតួនាទីសំខាន់ នៅក្នុងយុទ្ធសាស្រ្តផ្លាស់ទីរបស់កងទ័ព ទៅក្នុងទឹកដីរបស់សត្រូវ។
កងទ័ពអ៊ុយក្រែនមានស្នាដៃច្រើន នៅក្នុងតំបន់ទឹកគ្រីមេ ដោយបានបាញ់បំផ្លាញនាវាចម្បាំងរបស់រុស្ស៊ី ដល់ទៅ ៣គ្រឿង ក្នុងរយៈពេលតែ៣ខែ។ រូបភាពផ្កាយរណបនៅឆ្នាំមុនបង្ហាញថា ដោយសាររងការវាយប្រហារដ្រូនរបស់អ៊ុយក្រែន រុស្ស៊ីបានដកបញ្ចេញនាវាចម្បាំងរបស់ខ្លួនជាច្រើនគ្រឿងចេញពីតំបន់គ្រីមេ។
អ៊ុយក្រែនជោគជ័យ នៅតំបន់ទឹកក្បែរគ្រីមេ ប៉ុន្តែ នៅសមរភូមិដីគោក កងទ័ពអ៊ុយក្រែននៅទ្រឹង មិនអាចវាយទម្លុះខ្សែប្រយុទ្ធរបស់កងទ័ពរុស្ស៊ី នៅក្នុងសមរភូមិ ខណៈពេលដែលសង្រ្គាមរុស្ស៊ីឈ្លានពានអ៊ុយក្រែន ឈានចូលជិតដល់ឆ្នាំ ទី៣ នៅប៉ុន្មានថ្ងៃ ខាងមុខ។
នៅក្នុងដំណើរទៅជួបកងទ័ពនៅសមរភូមិមុខ នៅថ្ងៃពុធនេះ មេទ័ពថ្មីរបស់អ៊ុយក្រែន លោកអូឡេកសង់ សៀរស្គីដែលជាឧត្តមសេនីយ៍មានបទពិសោធន៍ខ្ពស់ នៅអ៊ុយក្រែន ទទួលស្គាល់ថា រុស្ស៊ីបង្កើនការប្រឹងប្រែង និងមានប្រៀបជាងអ៊ុយក្រែន បើនិយាយពីចំនួនកងទ័ព។ នៅពេលទទួលតំណែងជាមេទ័ពថ្មីរបស់អ៊ុយក្រែន លោកអូឡេសង់ សៀរស្គីធ្លាប់បង្ហាញផែនការដែលថា ដើម្បីឈ្នះសង្រ្គាម គេត្រូវការសម្រិតសម្រាំងទ័ព និងមធ្យោបាយ។ ប៉ុន្តែ នៅសមរភូមិជាក់ស្តែង មេទ័ពអ៊ុយក្រែនព្រមានថា សមរភូមិជួរមុខ ស្មុគស្មាញ និងពិបាកខ្លាំងបំផុតសម្រាប់កងទ័ពអ៊ុយក្រែន។ ប្រឈមនឹងរុស្ស៊ី ដែលជាមហាអំណាចយោធា អ៊ុយក្រែនកាន់តែខើចផ្នែកសព្វាវុធ និងត្រូវជំនួយបន្ទាន់ពីសម្ព័ន្ធមិត្ត ជាពិសេសអាមេរិក។ ប៉ុន្តែ នៅថ្ងៃអង្គារម្សិលមិញ ប្រធានសភាអ្នកតំណាងរាស្រ្តអាមេរិកបានបដិសេធសាជាថ្មី ម្តងទៀត មិនបោះឆ្នោតលើកញ្ចប់ថវិកាជំនួយយោធាសម្រាប់អ៊ុយក្រែន ដែលមានតម្លៃ ៦០ពាន់លានដុល្លារនោះ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ