G7 សន្យាធ្វើឲ្យរុស្ស៊ីខាតបង់ធ្ងន់ក្នុងសង្គ្រាមនៅអ៊ុយក្រែន
ក្នុងថ្ងៃខួប២ឆ្នាំនៃសង្គ្រាមឈ្លានរុស្ស៊ីនៅអ៊ុយក្រែន, ថ្នាក់ដឹកនាំប្រទេសមហាអំណាចហ្សេ៧ បានជ្រើសរើសទីក្រុងកៀវ ដើម្បីជួបប្រជុំគ្នា សម្តែងការគាំទ្រដល់អ៊ុយក្រែន ហើយនិងបានសន្យាធ្វើឲ្យរុស្ស៊ីខាតបង់ធ្ងន់ក្នុងសង្គ្រាម។ ថ្ងៃសៅរ៍ ទី២៤កុម្ភៈ ក្រុមប្រទេសហ្សេ៧ ក៏បានប្រកាសដាក់វិធានការជាច្រើន ដើម្បីបិទផ្លូវហិរញ្ញវត្ថុកុំឲ្យរុស្ស៊ីយកទៅបំប៉នភ្លើងសង្គ្រាម។ ទន្ទឹមនឹងគ្នានោះ ហ្សេ៧ ក៏បានព្រមានប្រទេសចិន អ៊ីរ៉ង់ និងកូរ៉េខាងជើង កុំឲ្យជួយផ្តល់គ្រឿងសឹកចម្បាំងទៅរុស្ស៊ី។
ចុះផ្សាយនៅថ្ងៃ៖
ស្តាប់ - ០៣:២៣
ពុំមែនជារឿងចម្លែកទេ ដែលក្រុមប្រទេសហ្សេ៧ ជួបប្រជុំគ្នាកម្រិតថ្នាក់ប្រមុខរដ្ឋាភិបាល ដោយជ្រើសរើសទីក្រុងកៀវរបស់អ៊ុយក្រែន ជាកន្លែងប្រជុំ។ នេះជាការសម្តែងក្តីគាំទ្រចំពោះអ៊ុយក្រែន នៅចំពោះមុខសង្គ្រាមឈ្លានពានរុស្ស៊ី ឈានចូលឆ្នាំទី៣។ ក្រុមប្រទេសហ្សេ៧ ប្រកាសក្នុងសេចក្តីថ្លែងការណ៍ ថានឹងធ្វើឲ្យ រុស្ស៊ី ខាងបង់កាន់តែធំនៅក្នុងភ្លើងសង្គ្រាម, ត្រូវបន្ថយឬកាត់ផ្តាច់ប្រភពចំណូលរុស្ស៊ី, រារាំងគ្រប់មធ្យោបាយកុំឲ្យរុស្ស៊ីមានប្រភពហិរញ្ញវត្ថុដើម្បីយកទៅបញ្ឆេះបំប៉នសង្គ្រាម, វិធានការនោះ មានជាអាទិ៍ ការដាក់ទណ្ឌកម្មលើវិស័យហិរញ្ញវត្ថុ ក្រុមហ៊ុនរកស៊ីជាមួយរុស្ស៊ី និងសេដ្ឋីរុស្ស៊ី ដែលក្រុមសមាជិក G7 ទើបប្រកាសចេញថ្មីៗនេះ។
ជាមួយគ្នានេះដែរ ប្រទេសហ្សេ៧ ក៏បានលើកឡើងក្តីបារម្ភពីមហាអំណាចចិន អ៊ីរ៉ង់ និងកូរ៉េខាងជើង ដែលជួយផ្តល់អាវុធនិងគ្រឿងឧបករណ៍សឹកឲ្យរុស្ស៊ី។ ប្រទេសហ្សេ៧ មិនញញើតនឹងព្រមានចំៗ ចំពោះរដ្ឋបាលក្រុងប៉េកាំង ក្រុងតេហេរ៉ង់ និងក្រុងព្យុងយ៉ាង ថាកុំឲ្យលូកដៃជួយផ្តល់គ្រឿងសឹកចម្បាំងទៅក្រុងម៉ូស្កូ ឲ្យសោះ។
ថ្ងៃអាទិត្យនេះ នាយករដ្ឋមន្ត្រីអង់គ្លេស រីស៊ី ស៊ូណាក់ ប្រកាសយោបល់ថា ជាការល្អ គួរយកលុយរុស្ស៊ីរាប់ពាន់លានអឺរ៉ូ ដែលបង្កកនៅអឺរ៉ុប ទៅជួយអ៊ុយក្រែន។ គួររំឭកថា តាំងពីផ្ទុះសង្គ្រាមរុស្ស៊ីនៅអ៊ុយក្រែនមក ធនគារអឺរ៉ុបបានដាក់ទណ្ឌកម្មសេដ្ឋកិច្ច បង្កកលុយនិងទ្រព្យសម្បត្តិរុស្ស៊ី ចំនួន ៣៥០ ពាន់លានអឺរ៉ូ។
ជាប្រតិកម្មតប លោក ឌីមីទ្រី មេដវេដេវ ថ្នាក់ដឹកនាំជាន់ខ្ពស់នៃក្រុមប្រឹក្សាសន្តិសុខរុស្ស៊ី បានថ្លែងថា រុស្ស៊ីនឹងសងសឹក ហើយធ្វើឲ្យ ពួកសត្រូវបស្ចិមលោក រងទុក្ខ។
ក្រុមប្រទេសហ្សេ៧ មាន សហរដ្ឋអាមេរិក ជប៉ុន អាល្លឺម៉ង់ បារាំង អង់គ្លេស អ៊ីតាលី និង កាណាដា។ កិច្ចប្រជុំថ្នាក់ប្រមុខរដ្ឋឆ្នាំនេះ ក្រោមការដឹកនាំប្រធានផ្លាស់វេនអ៊ីតាលី។ នាយករដ្ឋមន្ត្រីកាដាណានិងអ៊ីតាលី អញ្ជើញទៅក្រុងកៀវដោយផ្ទាល់ ចំណែកថ្នាក់ដឹកនាំប្រទេសផ្សេងទៀត ចូលរួមប្រជុំតាមអនឡាញ។ ក្នុងឱកាសនេះ កាដាណានិងអ៊ីតាលី បានចុះកិច្ចព្រមព្រៀងផ្នែកការពារជាតិ ជាមួយអ៊ុយក្រែន គឺស្រដៀងនឹងកិច្ចព្រមព្រៀង ដែល អង់គ្លេស អាល្លឺម៉ង់ និងបារាំង បានចុះហត្ថលេខារួចពីពេលថ្មីៗដែរ។ មិនតែប៉ុណ្ណោះ ក្នុងឆ្នាំ២០២៤នេះ កាណាដា សន្យាផ្តល់ជំនួយយោធា ចំនួន ២,៣ ពាន់លានដុល្លារ ដល់អ៊ុយក្រែន។
ប្រធានគណៈកម្មការអឺរ៉ុបក៏ចូលរួមប្រជុំហ្សេ៧នឹងគេដែរ។ អង្គុយក្បែរប្រធានាធិបតីអ៊ុយក្រែន លោកស្រី អួរស៊ូឡា វ៉ុនឌែរ ឡេយែន ប្រកាសថានឹងផ្ទេរកញ្ចប់ថវិកា ៤,៥ពាន់លានអឺរ៉ូ ឲ្យអ៊ុយក្រែន នៅខែមីនា។ នេះជាចំណែកមួយនៃការសន្យា ៥០ ពាន់លានអឺរ៉ូ របស់សហភាពអឺរ៉ុប។
ឱកាសខួប២ឆ្នាំនៃសង្គ្រាមនៅអ៊ុយក្រែន, ជាថ្មីម្តងទៀត ប្រធានាធិបតីអ៊ុយក្រែន បានស្នើសុំជំនួយយោធា បន្ថែម និងជាបន្ទាន់។ លោក វ៉ូឡូឌីមៀរ ហ្សេឡេនស្គី ប្រកាសថា «គ្រប់គ្នាដឹងយ៉ាងច្បាស់ស្រេចហើយថា ពេលនេះ អ៊ុយក្រែនយើងត្រូវការអ្វីខ្លាំងបំផុត ដើម្បីការពារផ្លូវអាកាស និងទឹកដីយើង។ យើងទុកចិត្តលើអស់លោកគ្រប់គ្នាហើយ។»។ លោក ហ្សេឡេនស្គី ថ្លែងនេះ មិនបញ្ជាក់ចំឈ្មោះសហរដ្ឋអាមេរិកឡើយ។ ច្រើនខែហើយ រដ្ឋសភាអាមេរិក បានខ្ទាស់ជំនួយយោធា ៦០ពាន់លានដុល្លារ ដែលត្រូវផ្តល់ឲ្យអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ