តុលាការយុត្តិធម៌អន្តរជាតិបង្គាប់អ៊ីស្រាអែលឱ្យធានាការផ្តល់ជំនួយមនុស្សធម៌នៅហ្កាហ្សា
យោធាអ៊ីស្រាអែលបន្តប្រតិបត្តិការវាយប្រហារលើចលនាអ៊ីស្លាមប៉ាឡេស្ទីននៅហ្កាហ្សា ហាម៉ាស ដោយគ្មានបន្ធូរដៃទេ នៅថ្ងៃសុក្រទី ២៩មីនា២០២៤នេះ ហើយដោយមិនខ្វល់នឹងសេចក្តីសម្រេចរបស់តុលាការយុត្តិធម៌អន្តរជាតិឡើយ។ តុលាការយុត្តិធម៌បានចេញដីកានៅរសៀលថ្ងៃព្រហស្បតិ៍ម្សិលមិញ បញ្ជាឱ្យអ៊ីស្រាអែលធានាផ្គត់ផ្គង់ជំនួយមនុស្សធម៌បន្ទាន់ដល់ប្រជាពលរដ្ឋប៉ាឡេស្ទីន នៅហ្កាហ្សា ដែលស្ថិតនៅលើមាត់ជ្រោះនៃគ្រោះទុរ្ភិក្ស។
ចុះផ្សាយនៅថ្ងៃ៖
ស្តាប់ - ០២:២៩
អ៊ីស្រាអែលត្រូវតែបើកច្រកឱ្យបានធំនិងច្រើនជាងមុន ដោយគ្មានបង្អង់ ដើម្បីបង្កើនសមត្ថភាពនិងបរិមាណចែកចាយជំនួយមនុស្សធម៌បន្ទាន់ដល់ប្រជាពលរដ្ឋប៉ាឡេស្ទីននៅតំបន់ហ្កាហ្សា។ នេះជាដីកាបង្គាប់ របស់តុលាការយុត្តិធម៌អន្តរជាតិក្រុងឡាអេ ដោយបញ្ជាឱ្យអ៊ីស្រាអែលធានាផ្គត់ផ្គង់ជំនួយដោយគ្មានការដាក់កម្រិត និងក្នុងទ្រង់ទ្រាយធំ នូវទឹកស្អាត នូវស្បៀងអាហារ ជម្រក ថ្នាំសង្កូវ សម្លៀកបំពាក់ និងគ្រឿងចំហេះ។
តុលាការបានរំឮកទៀតថា បើតាមអង្គការសហប្រជាជាតិ ដើម្បីមានលំហូរជំនួយមនុស្សធម៌ ត្រូវបញ្ឈប់ប្រតិបត្តិការយោធា។ សេចក្តីសម្រេចចិត្តអង្គការសហប្រជាជាតិបានអនុម័តរួចហើយការពីរបីថ្ងៃមុន តែនៅមិនទាន់ចាប់អនុវត្តទេ។ ដូច្នេះតុលាការសូមបញ្ជាឱ្យអ៊ីស្រាអែលរារាំងភាពអត់ឃ្លានដែលកំពុងកើតមាននៅហ្កាហ្សា។
នៅក្នុងសេចក្តីបង្គាប់របស់តុលាការយុត្តិធម៌អន្តរជាតិកម្រាស់១៦ទំព័រ គ្រោះទុរ្ភិក្សកំពុងចាប់ត្រាំត្រែងហើយ។ ឯការបញ្ជូនជំនួយមនុស្សធម៌តាមផ្លូវគោក ស្ថិតក្រោមការត្រួតពិនិត្យយ៉ាងតឹងតែងបំផុតពីសំណាក់អ៊ីស្រាអែល។ បើតាមទីភ្នាក់ងារសម្របសម្រួលកិច្ចការមនុស្សធម៌របស់អង្គការសហប្រជាជាតិ មានជំនួយមនុស្សធម៌ប្រមាណតែ៣%ប៉ុណ្ណោះ បានទៅដល់ភាគខាងជើងនៃតំបន់ហ្កាហ្សា នៅរវាងពីថ្ងៃទី១៨-២៤មីនា។
អាហ្វ្រិកខាងត្បូង ដែលជាអ្នកផ្តួចផ្តើមប្តឹង ចង់ឱ្យតុលាការបង្គាប់រដ្ឋទាំង១៥៣ជាសមាជិកសន្ធិសញ្ញាប្រឆាំងនឹងអំពើប្រល័យពូជសាសន៍ កុំគាំទ្រសង្គ្រាមរបស់អ៊ីសា្រអែលនៅហ្កាហ្សា។ ប៉ុន្តែសម្រាប់ក្រុមចៅក្រម តុលាការគ្មានដែនអំណាចលើប្រទេសដែលគ្មានជាប់បណ្តឹងបានទេ។ ម្យ៉ាងវិញទៀត កាលពីខែមករា តុលាការបានចេញបង្គាប់ឱ្យអ៊ីស្រាអែលធ្វើយ៉ាងណាកុំឱ្យមានអំពើប្រល័យពូជសាសន៍កើតឡើងបាននៅក្នុងដែនដីប៉ាឡេស្ទីន។ កាលណោះអ៊ីស្រាអែលបានបញ្ចេញប្រតិកម្មតបវិញដោយចាត់ទុកជាបទចោទប្រកាន់ដ៏អាស្រូវ របស់តុលាការ។ នៅលើកនេះ អ៊ីស្រាអែលឆ្លើយតបដោយបន្តវាយប្រហារយ៉ាងសន្ធាប់លើតំបន់ហ្កាហ្សាតាំងពីព្រហាម។ កាលពីថ្ងៃព្រហស្បតិ៍ លោកនេតាន់យ៉ាហ៊ូ នាយករដ្ឋមន្ត្រីអ៊ីស្រាអែល បានបញ្ជាក់ជាថ្មីម្តងទៀតអំពីឆន្ទៈដាច់ខាតបន្តប្រតិបត្តិការវាយប្រហារជើងគោកចូលតំបន់រ៉ាហ្វា និងកាត់តំបន់ហ្កាហ្សាជាពីរ។
ក្រៅពីបាត់បង់ជីវិតនិងបំផ្លិចបំផ្លាញសម្ភារៈ សង្គ្រាមអ៊ីស្រាអែល កំពុងរុញហ្កាហ្សាឱ្យធ្លាក់ក្នុងគ្រោះទុរ្ភិក្ស ដែលគ្មានកន្លែងណាផ្សេងនៅលើផែនដីមានជនរងគ្រោះអត់ឃ្លានច្រើនដូចឡើយ។ នេះបើតាមស្ថាប័នកម្មវិធីស្បៀងអាហារពិភពលោករបស់អង្គការសហប្រជាជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ