អង្គការសហប្រជាជាតិទាមទារឲ្យតុលាការយុត្តិធម៌អន្តរជាតិពិនិត្យនយោបាយអាណានិគមកិច្ចរបស់អ៊ីស្រាអែល
មហាសន្និបាតអង្គការសហប្រជាជាតិបានបោះឆ្នោតលើសេចក្តីសម្រេចមួយកាលពីថ្ងៃសុក្រម្សិលមិញ ដើម្បីទាមទារឲ្យតុលាការយុត្តិធម៌អន្តរជាតិដេលមានទីតាំងនៅទីក្រុងឡាអេពិនិត្យមើលលើសំណុំរឿងសំណង់អាណានិគមកិច្ចរបស់អ៊ីស្រាអែលនៅក្នុងទឹកដីប៉ាឡេស្ទីន។ មហាសន្និបាតអង្គការសហប្រជាជាតិបានបោះឆ្នោតលើសេចក្តីសម្រេច នៅមួយថ្ងៃក្រោយរដ្ឋាភិបាលស្តាំនិយមជ្រុលបំផុតរបស់អ៊ីស្រាអែលទើបស្បថចូលដឹកនាំប្រទេស នៅថ្ងៃព្រហស្បតិ៍ទី ២៩ធ្នូ។
ចុះផ្សាយនៅថ្ងៃ៖
ស្តាប់ - ០២:៣៩
ជាមួយសំឡេងគាំទ្រ ចំនួន ៨៧ និងសំឡេងប្រឆាំង ២៦ (សំឡេងអនុប្បវាទ ៥៣) សេចក្តីសម្រេចរបស់មហាសន្និបាតអង្គការសហប្រជាជាតិទាមទារឲ្យតុលាការយុត្តិធម៌អន្តរជាតិផ្តោតមើលទៅលើផលវិបាកនៃការរំលោភឥតល្ហែររបស់អ៊ីស្រាអែលទៅលើសិទ្ធិប្រជាជនប៉ាឡេស្ទីន និងវិធានការ នយោបាយរបស់អ៊ីស្រាអែលដែលមានគោលដៅផ្លាស់ប្តូរប្រជាសាស្រ្តនៅក្នុងទឹកដីប៉ាឡេស្ទីន រួមទាំងលក្ខន្តិកៈនៃទីក្រុងជេរូសាឡឹម។
សេចក្តីសម្រេចរបស់មហាសន្និបាតអង្គការសហប្រជាជាតិបានទាមទារផងដែរឲ្យអ៊ីស្រាអែលបិទបញ្ចប់នយោបាយធ្វើអាណានិគមកិច្ចខុសច្បាប់ នៅលើទឹកដីប៉ាឡេស្ទីន។
សេចក្តីសម្រេចរបស់មហាសន្និបាតអង្គការសហប្រជាជាតិគ្មានអំណាច ចាប់បង្ខំ ដូចសេចក្តីសម្រេចរបស់ក្រុមប្រឹក្សាសន្តិសុខ។ ប៉ុន្តែ សម្រាប់អ្នកតំណាងប៉ាឡេស្ទីននៅអង្គការសហប្រជាជាតិ លោកRiyad Mansour ការបោះឆ្នោតលើសេចក្តីសម្រេចកាលពីថ្ងៃសុក្រជាសញ្ញាទៅកាន់រដ្ឋាភិបាលថ្មីរបស់អ៊ីស្រាអែល ដែលមានឆន្ទៈពង្រឹងនយោបាយអាណានិគមកិច្ច និងរើសអើងពូជសាសន៍ នៅលើទឹកដីប៉ាឡេស្ទីន។
នៅមហាសន្និបាតអង្គការសហប្រជាជាតិ អ្នកតំណាងប៉ាឡេស្ទីនបានថ្លែងសរសើរផងដែរ ភាពក្លាហានរបស់ប្រទេសជាច្រើន ដែលមិនចាញ់សំឡុត ការគំរាមកំហែងរបស់អ៊ីស្រាអែល។
ភាគីអ៊ីស្រាអែលវិញ តាមរយៈឯកអគ្គរដ្ឋទូតប្រចាំអង្គការសហប្រជាជាតិបានព្រមានតាំងពីនៅមុនការបោះឆ្នោតថា សេចក្តីសម្រេចថ្មីនឹងធ្វើឲ្យសីលធម៌របស់អង្គការសហប្រជាជាតិត្រូវជាប់ស្នាមសៅហ្មង។ “គ្មានស្ថាប័នអន្តរជាតិណាមួយដែលអាចសម្រេចថា ជនជាតិជ្វីហ្វរស់នៅដោយខុសច្បាប់លើទឹកដីរបស់ពួកគេនោះទេ។ ការសម្រេចចិត្តរបស់ស្ថាប័នច្បាប់ដែលទទួលអាណត្តិពីសេចក្តីសម្រេចបែបនយោបាយរបស់អង្គការសហប្រជាជាតិ គឺជារឿងមិនស្របច្បាប់។
ដោយទាមទារឲ្យតុលាការយុត្តិធម៌អន្តរជាតិពិចារណាលើសំណុំរឿងអាណានិគមកិច្ចខុសច្បាប់របស់អ៊ីស្រាអែល សេចក្តីសម្រេចរបស់មហាសន្និបាតអង្គការសហប្រជាជាតិបានធ្វើឲ្យប្រទេសនៅក្នុងពិភពលោកបែកបាក់គ្នាជាច្រើនក្រុម។ នៅពេលប្រទេសចំនួន៨៧គាំទ្រសេចក្តីសម្រេច ប្រទេសចំនួន ២៦ប្រឆាំង ចំណែក ប្រទេសចំនួន ៥៣ផ្សេងទៀត នៅស្ងៀម អនុប្បវាទ។ មហាអំណាចអាមេរិកដែលជាសមាជិករបស់ក្រុមប្រឹក្សាសន្តិសុខ និងជាសម្ព័ន្ធមិត្តរបស់អ៊ីស្រាអែល រួមជាមួយ អង់គ្លេស និងអាល្លឺម៉ង់លើកដៃប្រឆាំងនឹងសេចក្តីសម្រេច ចំណែកបារាំងបោះឆ្នោតអនុប្បវាទ។ សម្រាប់ឯកអគ្គរាជទូតអង់គ្លេសប្រចាំអង្គការសហប្រជាជាតិ គេមិនគិតថា ការងាររបស់តុលាការយុត្តិធម៌អន្តរជាតិនឹងមិនអាចជួយស្តារការចរចាសន្តិភាពរវាងភាគីជម្លោះ ប៉ាឡេស្ទីន និងអ៊ីស្រាអែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ