ប្រមុខការទូតអាមេរិកមកពិភាក្សារឿងសង្គ្រាមអ៊ុយក្រែននិងហ្កាហ្សានៅប៉ារីស
ប្រមុខការទូតអាមេរិកលោកអង់តូនី ប្លីងកិន កំពុងស្ថិតក្រុងប៉ារីសប្រទេសបារាំង នាថ្ងៃអង្គារទី ២មេសា២០២៤នេះ។ លោកប្លីងកិន ត្រូវជួបពិភាក្សាជាមួយសមភាគីបារាំងលោក ស្តេហ្វាន សេហ្សួណេ លោករដ្ឋមន្ត្រីក្រសួងការពារជាតិ ព្រមទាំងប្រធានាធិបតីបារាំងលោកអេម៉ានុយអែលម៉ាក្រុងទៀត ក្នុងកម្មវត្ថុតែមួយគឺដើម្បីជជែកពិភាក្សាអំពីសំណុំរឿងសង្គ្រាមអ៊ុយក្រែននិងសង្គ្រាមនៅដើមបូព៌ា។
ចុះផ្សាយនៅថ្ងៃ៖
ស្តាប់ - ០២:៣០
អមដំណើរដោយលោក ឡឺក័រនុយ រដ្ឋមន្ត្រីក្រសួងការពារជាតិបារាំង លោកប្រមុខការទូតអាមេរិកអង់តូនី ប្លីងកិន បានអញ្ជើញទៅទស្សនាមជ្ឈមណ្ឌលNexter មូលដ្ឋានឧស្សាហកម្មអាវុធបារាំងកាត់អាល្លឺម៉ង់ ដែលផលិតកាណុងសេហ្សាសម្រាប់ឱ្យទៅអ៊ុយក្រែន។
បើតាមលោករដ្ឋមន្ត្រីការពារជាតិ បារាំងដែលធ្លាប់ស្នើសុំឱ្យសម្ព័ន្ធមិត្តទាំងអស់ប្រឹងប្រែងជួយអ៊ុយក្រែនទ្វេឡើងដើម្បីច្រានរុស្ស៊ីឱ្យបរាជ័យ សម្រេចបង្កើនល្បឿនមួយជាពីរការផលិតកាណុងសេហ្សា ពោលគឺបង្កើនចង្វាក់ផលិតកម្មកាណុងពី៦ ទៅ១២គ្រឿង ក្នុងមួយខែ នាពេលខាងមុខសម្រាប់ឆ្លើយតបទៅនឹងសេចក្តីត្រូវការដ៏ធំធេងរបស់អ៊ុយក្រែន។ “វិនិយោគក្នុងវិស័យឧស្សាហកម្មការពារជាតិ ប្រៀបដូចជាការវិនិយោគសម្រាប់ខ្លួនឯង” នេះបើតាមសេចក្តីប្រកាសរបស់លោកប្លីងកិនដែលឆ្លៀតជំរុញឱ្យសភាអាមេរិកព្រមទម្លាយកញ្ចប់ថវិកាសម្រាប់ជួយអ៊ុយក្រែនឱ្យឆាប់រហ័សនិងប្រកបដោយប្រសិទ្ធភាព។ អាមេរិកជាម្ចាស់ជំនួយដ៏ចម្បងរបស់អ៊ុយក្រែន និងក្នុងទំហំធំជាងបារាំងឆ្ងាយណាស់ ប៉ុន្តែតាំងពីប៉ុន្មានខែមកនេះ កម្មវិធីផ្តល់ជំនួយយោធា៦០ពាន់លានដុល្លារសម្រាប់អ៊ុយក្រែន ត្រូវជាប់គាំងនៅសភាខុនហ្កេសអាមេរិក។
ជាមួយនឹងសមភាគីបារាំងលោក ស្តេហ្វាន សេហ្សួរណេ ដែលទើបត្រលប់មកពីអេហ្ស៊ីបនិងចិន លោកប្រមុខការទូតអាមេរិកក៏បានលើកឡើងអំពីកម្មវត្ថុរួមដែលត្រូវបន្តនិងបង្កើនជំនួយគាំទ្រដល់អ៊ុយក្រែន ដោយត្រូវគិតគូរដាក់ឱ្យដំណើរការកិច្ចសហប្រតិបត្តិការបារាំង-អាមេរិក ដំណាក់កាលបន្ទាប់។ កាលពីចុងខែកុម្ភៈ ប្រមុខរដ្ឋ-រដ្ឋាភិបាលជាច្រើនសម្រេចនៅទីក្រុងប៉ារីស នូវផែនការប្រតិបត្តិការជាច្រើន មានជាអាទិ៍ ការបង្កើនបរិមាណគ្រាប់ដឹកទៅឱ្យអ៊ុយក្រែន បង្កើនការការពារឌីជីថល ដោះមីន ឬបង្កើនផលិតកម្មឧស្សាហកម្មអាវុធនៅអ៊ុយក្រែន។ល។និង។ល។
ហើយបន្ថែមពីលើនេះ លោកប្លីងកីនឆ្លៀតជជែកអំពីសំណុំរឿងនៅដើមបូព៌ា និងស៊ូដង់ ព្រមទាំងអំពីការត្រៀមរៀបចំជំនួយកំពូលអូតង់នៅ ទីក្រុងវ៉ាស៊ីនតោន នាខែកក្កដាខាងមុខទៀត។ ក្រោយជំនួបពិភាក្សាគ្នារួច រដ្ឋមន្ត្រីការបរទេសទាំងពីរនឹងធ្វើសន្និសីទកាសែតរួម។
ជាចុងក្រោយ មុននឹងចាកចេញពីទីក្រុងប៉ារីស សំដៅក្រុងព្រុចសែលដើម្បីចូលរួមប្រជុំប្រារព្ធខួប៧៥ឆ្នាំនៃការបង្កើតសម្ព័ន្ធអូតង់ លោកអង់តូនីប្លីងកិនដែលអាក់ខានមកប៉ារីសអស់ពេលជិតពីរឆ្នាំមកហើយនោះ ត្រូវចូលជួបលោកប្រធានាធិបតីបារាំងអេម៉ានុយអែល ម៉ាក្រុង ដើម្បីផ្តោះប្តូរយោបល់គ្នាជាថ្មីជុំវិញវិបត្តិអន្តរជាតិធំៗ ដែលកំពុងចោទនាពេលបច្ចុប្បន្ន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ