សង្គ្រាមអ៊ុយក្រែន៖ បារាំងស្នើឱ្យចិនប្រើឥទ្ធិពលនិងនាំសារទៅសង្កត់រុស្ស៊ី
ក្នុងសន្និសីទកាសែតរួមជាមួយប្រមុខការទូតចិន នៅទីក្រុងប៉េកាំង នាថ្ងៃចន្ទទី ១មេសានេះ រដ្ឋមន្ត្រីក្រសួងការបរទេសបារាំង លោក ស្តេហ្វាន សេហ្សួណេ សុំឱ្យចិនប្រើឥទ្ធិពលរបស់ខ្លួន និងពាំនាំសារដ៏ច្បាស់លាស់មួយទៅប្រាប់រុស្ស៊ី ជុំវិញសង្គ្រាមនៅអ៊ុយក្រែន។ សារដែលបញ្ជាក់ថាមានកម្លាំងច្រើនគាំទ្រខាងអ៊ុយក្រែន។
ចុះផ្សាយនៅថ្ងៃ៖
ស្តាប់ - ០២:៣២
ចិនដែលតាំងខ្លួនជាភាគីអព្យាក្រិត្យ តែចូលកៀកស្និទ្ធនឹងរុស្ស៊ីកាន់តែខ្លាំងឡើងៗតាំងពីសង្គ្រាមនៅអ៊ុយក្រែនបានផ្ទុះឡើង មានជំហរចង់ដោះស្រាយជម្លោះតាមផ្លូវនយោបាយ។ ហើយជាញឹកញយ សហគមលោកខាងលិចបានអំពាវនាវ ឱ្យចិនដើរតួនាទីឱ្យបានសកម្មឡើងក្នុងជម្លោះនៅអ៊ុយក្រែន តាមរយៈឥទ្ធិពលដ៏ខ្លាំងរបស់ខ្លួនលើរុស្ស៊ី។ នៅថ្ងៃនេះ បារាំងបានអំពាវនាវជាថ្មី ដោយចំពោះតែម្តង។
ព្រោះតែចិនមានតួនាទីគន្លឹះ ចំពោះឯករាជ្យជាតិ ការគោរពច្បាប់អន្តរជាតិ និងបូរណភាពដែនដីអ៊ុយក្រែន ទើបបារាំងចង់ឱ្យចិនពាំនាំសារដ៏ច្បាស់លាស់មួយ ទៅប្រាប់រុស្ស៊ី មានកម្លាំងជាច្រើនគាំទ្រអ៊ុយក្រែន។ នេះជាប្រសាសន៍របស់លោក សេ្តហ្វាន សេហ្សួណេ រដ្ឋមន្ត្រីការបរទេសបារាំង ក្នុងសន្និសីទកាសែតជាមួយសមភាគីចិន លោក វ៉ាង យី នៅទីក្រុងប៉េកាំង។
លោកប្រមុខការទូតបារាំងបានអះអាងទៀតថា សង្គ្រាមនៅអ៊ុយក្រែន មានពាក់ព័ន្ធនឹងសហគមន៍អន្តរជាតិទាំងមូល ហើយបារាំងមានជំនឿយ៉ាងមុតមាំថា “នឹងគ្មានសន្តិភាពជានិរន្តរ៍បានឡើយប្រសិនបើគ្មានការចរចាជាមួយអ៊ុយក្រែន។ នឹងគ្មានទេសន្តិសុខសម្រាប់អឺរ៉ុបបើគ្មានសន្តិភាពស្របតាមច្បាប់អន្តរជាតិនោះ។ ហេតុដូច្នេះហើយបានជាសម្រាប់បារាំង បារាំងចាំបាច់រក្សាចំណងទំនាក់ទំនងចរចាយ៉ាងស្អិតល្មួតជាមួយចិន។”
លោករដ្ឋមន្ត្រីក៏បានការពារទំនាក់ទំនងសេដ្ឋកិច្ចជាមួយចិនដែរ ដោយពន្យល់ថា បារាំងមិនប្រាថ្នាកាត់បន្ថយជាគំហុកចំណងសេដ្ឋកិច្ចរវាងប្រទេសទាំងពីរ ប៉ុន្តែចង់តម្រែតម្រឹមឱ្យមានសមភាពសេដ្ឋកិច្ច ព្រោះការផ្តោះប្តូរពាណិជ្ជកម្មរវាងគ្នា ត្រូវឈរលើមូលដ្ឋានត្រឹមត្រូវនិងប្រកបដោយនិរន្តរភាព។
លោក វ៉ាងយី ពេញចិត្តខ្លាំងនឹងគំនិតរបស់បារាំង ដោយយល់ថាការផ្តាច់ឬកាត់បន្ថយភាពរំពឹងសេដ្ឋកិច្ចលើចិន ជាហានិភ័យសេដ្ឋកិច្ចធំណាស់។ ចិនជាឱកាសមិនមែនជាហានិភ័យរបស់អឺរ៉ុបទេ ភាគីទាំងពីរជាដៃគូមិនមែនជាគូប្រជែងឡើយ។ នេះបើតាមសេចក្តីប្រកាសរបស់លោកប្រមុខការទូតចិន។ តាំងពីប៉ុន្មានខែចុងក្រោយមកនេះ ប្រមុខដឹកនាំនយោបាយអឺរ៉ុបជាច្រើន និងសហរដ្ឋអាមេរិក បានលើកឡើងអំពីភាពចាំបាច់នៃការកាត់បន្ថយភាពរំពឹងសេដ្ឋកិច្ចពីចិន ដែលជាហេតុធ្វើឱ្យប៉េកាំងប្រឆាំងខឹងយ៉ាងខ្លាំង។
ក្នុងអំឡុងពេលតែ៦ខែ នេះជាលើកទីពីរដែលរដ្ឋមន្ត្រីការបរទេសបារាំងអញ្ជើញទៅបំពេញទស្សនកិច្ចនៅចិន។ កាលពីខែមេសា២០២៣ប្រធានាធិបតីបារាំងលោកអេម៉ាណុយអែលម៉ាក្រុងបានអញ្ជើញទៅបំពេញទស្សនកិច្ចនៅចិន។ ហើយខែឧសភាបារាំងនឹងទទួលស្វាគមន៍ប្រធានាធិបតីចិនស៊ីជីនពីងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ