សភាអឺរ៉ុបអនុម័តកាតិកាសញ្ញាស្តីពីសិទ្ធិជ្រកកោននិងអន្តោប្រវេសន៍
បន្ទាប់ពីចរចាយ៉ាងតានតឹងអស់ជាច្រើនឆ្នាំ នៅល្ងាចថ្ងៃពុធទី ១០មេសា២០២៤ សភាអឺរ៉ុបបានអនុម័ត ច្បាប់ស្តីពីការសុំសិទ្ធិជ្រកកោន និងអន្តោប្រវេសន៍ ដោយសំឡេងភាគច្រើនយ៉ាងប្រផុតប្រផើយ។ នយោបាយអន្តោប្រវេសន៍អឺរ៉ុប មិនដែលប្តូរផ្លាស់ ជាងម្ភៃឆ្នាំមកហើយនិងលំបាកអនុវត្តដោយជាក់ស្តែងណាស់ ទើបសមាជិកសហភាពទាំង២៧ប្រទេសតែងតែប្រទាញប្រទង់គ្នាឥតឈប់។ ជាមួយច្បាប់ថ្មី អ្វីៗនឹងចាប់ផ្តើមថ្មី?!
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៤
ស្ទើរចាត់ទុកបានជាព្រឹត្តិការណ៍ប្រវត្តិសាស្ត្រ ដែលនៅរសៀលថ្ងៃពុធទី១០មេសាម្សិលមិញ សភាអឺរ៉ុបបានសម្រេចអនុម័ត កាតិកាសញ្ញាស្តីពីសិទ្ធិជ្រកកោននិងអន្តោប្រវេសន៍។ កាតិកាសញ្ញានេះ ជាលទ្ធផលនៃការធ្វើកំណែទម្រង់ស៊ីជម្រៅច្បាប់សុំសិទ្ធិជ្រកកោន និងអន្តោប្រវេសន៍នៅអឺរ៉ុប ដែលឆ្លងកាត់ចរចាយ៉ាងតានតឹង និងស្វិតស្វាញ រហូតដល់នាទីចុងក្រោយនិងអស់រយៈពេលជាងបីឆ្នាំកន្លះ។ សូម្បីតែពេលចាប់ផ្តើមបោះឆ្នោតអនុម័តទៅហើយ ក៏ភាពតានតឹងនៅបន្តមាន ដោយក្រុមអង្គការក្រៅរដ្ឋាភិបាលចូលមករំខាន និងស្រែកបរិហារជំរុញឱ្យសមាជិកសភាបោះឆ្នោតប្រឆាំងទៀត។
បន្ទាប់ពីការអនុម័តរបស់សមាជិកសភានេះ អត្ថបទច្បាប់ត្រូវឆ្លងកាត់ការព្រមព្រៀងជាផ្លូវការពីសំណាក់ក្រុមប្រឹក្សាអឺរ៉ុបសិន មុននឹងចូលជាធរមាននៅរវាងឆ្នាំ២០២៦។
តើកតិកាសញ្ញាថ្មីនេះមានខ្លឹមសារយ៉ាងណាខ្លះ? រឹតបន្តឹងការត្រួតពិនិត្យលំហូរអន្តោប្រវេសន៍មកអឺរ៉ុប និង ពង្រឹងកិច្ចសហការសាមគ្គីភាពរវាងប្រទេសក្នុងសហភាព ជាគោលការណ៍ចម្បងពីរនៃកាតិកាសញ្ញា។
ការប្តូរផ្លាស់គួរជាទីកត់សម្គាល់ទីមួយ គឺការលុបច្បាប់ចាស់ ឬហៅថាច្បាប់ឌុយប្លាំងដែលទម្លាក់បន្ទុកទទួលអន្តោប្រវេសន៍ខ្លាំងជាងគេទៅលើប្រទេសដំបូងដែលជនអន្តោប្រវេសន៍បានមកដល់។ អំណើះតទៅ ក្នុងករណីមានលំហូរអន្តោប្រវេសន៍ខ្លាំង ប្រទេសនៅអឺរ៉ុបផ្សេងទៀត ត្រូវតែជួយចែករំលែកបន្ទុកទទួលអ្នកសុំសិទ្ធិជ្រកកោន។ ជាងនេះទៅទៀត បើសម្ពាធអន្តោប្រវេសន៍ធ្ងន់ខ្លាំងមែនទែន អ្នកសុំសិទ្ធិជ្រកកោន អាចដាក់ពាក្យនៅប្រទេសផ្សេងណាក៏បាន ក្រៅពីប្រទេសដែលគេមកដល់ដំបូង។ នេះជាចំណុចថ្មីស្រឡាងបំផុត។
ជាថ្នូរនឹងសាមគ្គីភាពអឺរ៉ុបនេះ លក្ខខណ្ឌនៃការត្រួតពិនិត្យលំហូរអន្តោប្រវេសន៍ នឹងត្រូវពង្រឹងឱ្យកាន់តែតឹងមែនទែន។ នៅពេលជាន់ដីអឺរ៉ុបភ្លាម ជនអន្តោប្រវេសន៍ទាំងអស់ត្រូវឆ្លងកាត់រនាំងចម្រោះថ្មី ដែលផ្តិតថតទិន្នន័យជីវសាស្ត្រនិងស្នាមក្រយៅដៃ ទុកក្នុងប្រព័ន្ធឌីជីថលរួមតែមួយ ដើម្បីងាយផ្ទៀងផ្ទាត់អត្តសញ្ញាណ។ ជនអន្តោប្រវេសន៍ណាដែលធ្លាប់ទទួលចម្លើយបដិសេធហើយ នឹងត្រូវបញ្ចូនភ្លាម និងជាស្វ័យប្រវត្តិ ត្រលប់ទៅស្រុកកំណើតវិញ។ អ្នកគ្មានសំណាងបានទទួលសិទ្ធិជ្រកកោនក៏ត្រូវបញ្ចូនត្រលប់ទៅវិញដែរ បើប្រទេសកំណើតនោះស្ថិតក្នុងចង្កោមប្រទេសមានសុវត្ថិភាព។
បន្ទាប់មក ទើបមានសិក្សាសំណុំឯកសារសុំសិទ្ធិជ្រកកោន ដែលត្រូវធ្វើយ៉ាងរហ័សនិងក្នុងដំណើរបែបបទរួមតែមួយទូទាំងអឺរ៉ុប ដោយប្រើរយៈពេលយ៉ាងយូរ៦ខែ។ បើតាមដំណើរបែបបទ ជនអន្តោប្រវេសន៍អាចនឹងត្រូវឃុំឃាំងនៅមណ្ឌលទទួលជនអន្តោប្រវេសន៍ដែលអឺរ៉ុបគ្រោងនឹងបង្កើតឡើងសម្រាប់ទទួលមនុស្សបានដល់១២ម៉ឺននាក់ក្នុងមួយឆ្នាំ។ ហេតុដូច្នេះហើយបានជាអង្គការក្រៅរដ្ឋាភិបាលខ្លះដូចជាអង្គការOxfam បរិហារថាកតិការសញ្ញាអឺរ៉ុបនេះ ផ្តោតលើការឃុំឃាំងមនុស្សក្នុងមជ្ឈមណ្ឌលជាទម្រង់ពន្ធនាគារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ