អ៊ីរ៉ង់បាញ់សាកល្បងមីស៊ីលបាលីស្ទិក “ដែលអាចបាញ់ដល់ទឹកដីអ៊ីស្រាអែល”
កាលពីថ្ងៃអង្គារម្សិលមិញ អ៊ីរ៉ង់បានធ្វើការបាញ់សាកល្បងមីស៊ីលបាលីស្ទិករបស់ខ្លួនជាច្រើនគ្រាប់ ដែលជាហេតុធ្វើឲ្យសហរដ្ឋអាមេរិកបញ្ចេញប្រតិកម្មយ៉ាងខ្លាំងៗ ដោយព្រមានថានឹងដាក់ទណ្ឌកម្មជាឯកតោភាគីលើអ៊ីរ៉ង់។ ក៏ប៉ុន្តែ ក្រោយពីការព្រមានរបស់អាមេរិក អ៊ីរ៉ង់ក៏បានផ្គើនទៅវិញ ដោយបានធ្វើការបាញ់សាកល្បងមីស៊ីលបាលីស្ទិកចំនួន ២គ្រាប់បន្ថែមទៀត នៅថ្ងៃពុធនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
យោងតាមការចុះផ្សាយរបស់បណ្តាញសារព័ត៌មានរដ្ឋ មីស៊ីលដែលអ៊ីរ៉ង់ធ្វើការបាញ់សាកល្បងនៅពេលនេះ គឺជាប្រភេទមីស៊ីលបាលីស្ទិករយៈចម្ងាយជិត មធ្យម និងឆ្ងាយ ដែលអាចបាញ់បានចម្ងាយក្នុងចន្លោះពី ៣០០គីឡូម៉ែត្រ រហូតទៅដល់ ២ពាន់គីឡូម៉ែត្រ។
មន្រ្តីជាន់ខ្ពស់នៃឆ្មាំបដិវត្តន៍អ៊ីរ៉ង់ ដែលជាស្ថាប័នដ៏មានអំណាចកំពូលខាងកងទ័ព បានអះអាងច្បាស់ៗថា មីស៊ីលដែលអ៊ីរ៉ង់ធ្វើការសាកល្បងនៅពេលនេះ គឺផលិតឡើង ដើម្បីទុកធ្វើការបាញ់ប្រហារទៅលើអ៊ីស្រាអ៊ែល។ លើសពីនេះទៅទៀត បើយោងតាមការចុះផ្សាយរបស់ទីភ្នាក់ងារព័ត៌មានផ្លូវការអ៊ីរ៉ង់ នៅលើតួមីស៊ីល ដែលអ៊ីរ៉ង់បាញ់សាកល្បងនេះ ក៏មានសរសេរផងដែរនូវឃ្លាថា “គេត្រូវតែកម្ទេចអ៊ីស្រាអែលឲ្យអស់ពីលើផែនដី”។ ឃ្លាដែលអតីតប្រធានាធិបតីអ៊ីរ៉ង់ ម៉ះមូត អះម៉ាឌីនចាត តែងតែធ្លាប់ប្រើ នៅពេលកាន់តំណែង។
កាលពីថ្ងៃអង្គារ នៅក្រោយពីមានព័ត៌មានស្តីពីការបាញ់សាកល្បងមីស៊ីលរបស់អ៊ីរ៉ង់ មន្រ្តីអ្នកនាំពាក្យក្រសួងការបរទេសអាមេរិកបានថ្លែងប្រាប់អ្នកសារព័ត៌មានថា ការបាញ់សាកល្បងមីស៊ីលនេះ បើសិនជាអ៊ីរ៉ង់ពិតជាបានធ្វើមែន វាគឺជាការរំលោភទៅលើសេចក្តីសម្រេចរបស់ក្រុមប្រឹក្សាសន្តិសុខអ.ស.ប ហើយថា អាមេរិកអាចនឹងចាត់វិធានការដាក់ទណ្ឌកម្មទៅលើអ៊ីរ៉ង់ជុំវិញរឿងនេះ ទាំងទណ្ឌកម្មក្នុងក្របខ័ណ្ឌអ.ស.ប និងទាំងទណ្ឌកម្មជាឯកតោភាគី។
ក៏ប៉ុន្តែ ក្នុងពេលជាមួយគ្នាអ្នកនាំពាក្យក្រសួងការបរទេសអាមេរិកក៏បានបញ្ជាក់ផងដែរថា ការបាញ់សាកល្បងមីស៊ីលរបស់អ៊ីរ៉ង់នេះ នឹងមិនធ្វើឲ្យប៉ះពាល់ទៅដល់ការអនុវត្តកិច្ចព្រមព្រៀងនុយក្លេអ៊ែរ ដែលបានចុះ នៅទីក្រុងវីយ៉ែន កាលពីឆ្នាំទៅមិញនោះទេ។ នេះគឺជាការបញ្ជាក់ថា សម្រាប់អាមេរិក កម្មវិធីនុយក្លេអ៊ែរ និងការសាកល្បងមីស៊ីលបាលីស្ទិករបស់អ៊ីរ៉ង់ គឺជាសំណុំរឿងពីរដាច់ពីគ្នា។
គួររំឭកឡើងវិញថា កាលពីខែតុលាកន្លងទៅនេះ អ៊ីរ៉ង់ក៏ធ្លាប់បានបាញ់សាកល្បងមីស៊ីលបាលីស្ទិកម្តងរួចមកហើយដែរ។ ការសាកល្បងមីស៊ីលដែលធ្វើឲ្យអាមេរិកសម្រេចដាក់ទណ្ឌកម្មថ្មីទៀតទៅលើអ៊ីរ៉ង់ ប៉ុន្តែ ទណ្ឌកម្មចាស់ដែលបានដាក់ក្នុងសំណុំរឿងនុយក្លេអ៊ែរត្រូវបានអាមេរិកដកចេញ ស្របទៅតាមកិច្ចព្រមព្រៀង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ