អ៊ីរ៉ង់ព្រមានអារ៉ាប៊ីសាអូឌីតដែលចង់បញ្ជូនទ័ពទៅស៊ីរី
នៅថ្ងៃអាទិត្យ ទី១៤ កុម្ភៈ ប្រទេសអ៊ីរ៉ង់បានចេញមុខព្រមានប្រទេសអារ៉ាប៊ីសាអូឌីតចំៗដែលចង់បញ្ជូនទ័ពថ្មើរជើងទៅកាន់ទឹកដីស៊ីរី។ ការព្រមាននេះបានធ្វើឡើង ចំពេលដែលទ័ពអាកាសតួកគីបានបើកការវាយប្រហារលើទឹកដីស៊ីរី និងចំពេលដែលអារ៉ាប៊ីសាអូឌីតបានបញ្ជូនយន្តហោះចម្បាំងជាច្រើនគ្រឿងទៅដាក់នៅមូលដ្ឋានយោធាក្នុងទឹកដីតួកគី។ ដោយឡែក រដ្ឋមន្រ្តីការបរទេសអារ៉ាប៊ីសាអូឌីតបានទាយទុកពីការបរ៉ាជ័យរបស់រុស្ស៊ីក្នុងការជួយស្រោចស្រង់ជោគវាសនារបស់លោកប្រធានាធិបតីស៊ីរីអាសាដ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
ការព្រមានរបស់អ៊ីរ៉ង់ចំពោះអារ៉ាប៊ីសាអូឌីតបានធ្វើឡើងដោយអនុមេបញ្ជាការកងទ័ពអ៊ីរ៉ង់ឧត្តមសេនីយម៉ាសស៊ូដ យ៉ាហ្សាយេរី។ លោកម៉ាសស៊ូដបានថ្លែងច្បាស់ៗថា អ៊ីរ៉ង់នឹងមិនទុកឲ្យស្ថានការណ៍នៅស៊ីរីប្រែប្រួលទៅតាមសុឆន្ទៈរបស់ក្រុមប្រទេសឧទ្ទាមបានឡើយ និងថា អ៊ីរ៉ង់នឹងផ្តើមចាត់វិធានការចាំបាច់នៅក្នុងកាលៈទេសៈជាក់ស្តែង។ ប្រតិកម្មខ្លាំងៗរបស់ទីក្រុងតេហេរ៉ង់ពេលនេះបានធ្វើឡើង បន្ទាប់ពីអារ៉ាប៊ីសាអូឌីតបានបញ្ជូនយន្តហោះចម្បាំងជាច្រើនគ្រឿងទៅដាក់នៅមូលដ្ឋានយោធាក្នុងទឹកដីតួកគី ព្រមទាំងបានប្រកាសត្រៀមខ្លួនបញ្ជូនទ័ពចូលក្នុងទឹកដីស៊ីរីដើម្បីវាយប្រហារអង្គការរដ្ឋអ៊ីស្លាម។
សូមជម្រាបជូនថា អ៊ីរ៉ង់ និងអារ៉ាប៊ីសាអូឌីតជាប្រទេសដែលកំពុងប្រជែងកម្លាំងគ្នាដើម្បីដំណ្តើមឥទ្ធិពលនៅក្នុងតំបន់។ សព្វថ្ងៃនេះ អ៊ីរ៉ង់ជាប្រទេសសំខាន់ក្នុងតំបន់ដែលបានចេញមុខគាំទ្រផ្នែកហិរញ្ញវត្ថុ និងផ្នែកយោធាដល់របបស៊ីរីរបស់លោកប្រធានាធិបតីអាសាដ រីឯអារ៉ាប៊ីសាអូឌីតបានចេញមុខគាំទ្រក្រុមប្រឆាំងរបបស៊ីរី។ អ៊ីរ៉ង់បានបញ្ជូនទីប្រឹក្សាយោធារបស់ខ្លួនទៅជួយស្ថាប័នទ័ពស៊ីរី តែអនុមេបញ្ជាការអ៊ីរ៉ង់ម៉ាសស៊ូដមិនបានបញ្ជាក់ទេថា បើអារ៉ាប៊ីសាអូឌីតបញ្ជូនទ័ពទៅស៊ីរី តើអ៊ីរ៉ង់នឹងបញ្ជូនទ័ពបន្ថែមទៅស៊ីរី ឬអត់។ អ្វីដែលគ្រប់គ្នាបារម្ភ គឺការប្រឈមមុខដាក់គ្នាដោយផ្ទាល់រវាងអារ៉ាប៊ីសាអូឌី និងអ៊ីរ៉ង់លើសមរភូមិស៊ីរី។
ដោយឡែក គម្រោងបញ្ជូនទ័ពអារ៉ាប៊ីសាអូឌីតទៅស៊ីរីក៏ត្រូវបានលើកឡើងដោយលោកប្រមុខការទូតអារ៉ាប៊ីសាអូឌីតអាដែល អាល់ យូប៊ែរនាជំនួបជាមួយសមភាគីស្វ៊ីសលោក Didier Burkhalter ដែលបំពេញទស្សនកិច្ចក្នុងទីក្រុងរីយ៉ាដ។ តែលោកយូប៊ែរមិនបានលំអិតអ្វីបន្ថែមទេ ដូចយ៉ាងចំនួនទ័ពដែលត្រូវបញ្ជូន ឬមួយថ្ងៃខែដែលត្រូវបើកប្រតិបត្តិការ។ ទន្ទឹមគ្នានេះ លោកយូប៊ែរ ក៏បានលើកទៅនិយាយជាមួយសមភាគីស្វ៊ីសលោក Burkhalter ពីបរាជ័យជាមុននូវការខិតខំប្រឹងប្រែងរបស់រុស្ស៊ីក្នុងការជួយរក្សាអំណាចរបស់លោកប្រធានាធិបតីស៊ីរីអាសាដ។
លោកប្រមុខការទូតអារ៉ាប៊ីសាអូឌីតបានយល់ឃើញថា ការចាកចេញពីតំណែងរបស់លោកអាសាដជារឿងមួយមិនអាចចៀសរួច គ្រាន់តែយូរ ឬឆាប់ និងថា របបអាសាដក៏ត្រូវដួលរលំដោយបើកផ្លូវថ្មីឲ្យស៊ីរីគ្មានលោកអាសាដ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ