អ៊ីស្រាអែលបិទទីលានវិហារអ៊ីស្លាមបូរាណ នៅហ៊្សេរូសាឡឹម
បន្ទាប់ពីមានការប៉ុនប៉ងធ្វើឃាត លើរូបអាចារ្យសាសនាជ្វីហ្វ និងជាសកម្មជននយោបាយអ៊ីស្រាអែលម្នាក់ ទាហានអ៊ីស្រាអែលបានសម្លាប់ជនសង្ស័យ ដែលជាជនជាតិប៉ាឡេស្ទីន។ អាជ្ញាធរអ៊ីស្រាអែលថែមទាំងបានបិទ ផ្លូវចេញចូលទៅទីលាន វិហារអ៊ីស្លាមបូរាណ នៅក្រុងហ៊្សេរូសាឡឹម ដែលជាទីសក្ការៈរបស់ប្រជាជនអ៊ីស្លាម មិនឲ្យនរណា ចូលទៅថ្វាយបង្គំបានឡើយ។ ថ្នាក់ដឹកនាំប៉ាឡេស្ទីន និងប្រទេសហ្សកដានី បានចេញមកថ្កោលទោសអ៊ីស្រាអែល ថាបានប្រើអំណាចឃោរឃៅ។
ចុះផ្សាយនៅថ្ងៃ៖
ស្តាប់ - ០១:៥៤
លោក Yehuda Glick ដែលជាអាចារ្យសាសនាជ្វីហ្វ និងជាសកម្មជននយោបាយជាតិនិយមម្នាក់ នៅអ៊ីស្រាអែលត្រូវបានជនមិនស្គាល់មុខ បាញ់ត្រូវជាច្រើនគ្រាប់។ ភ្លាមៗនោះ ទាហានអ៊ីស្រាអែលបានធ្វើការតាមប្រមាញ់រកជនដៃដល់។ នៅវេលាព្រលឹមស្រាងៗ ថ្ងៃព្រហស្បតិ៍ ម្សិលមិញ ទាហានអ៊ីស្រាអែល បានធ្វើការឡោមពទ្ធ័ផ្ទះជនសង្ស័យ ដែលជាយុវជនជនជាតិប៉ាឡេស្ទីន ហើយបានសម្លាប់ជនសង្ស័យនោះ នៅនឹងកន្លែង។ ដំណឹងនេះ បានបញ្ឆេះការតវ៉ា និង កំហឹងរបស់ប្រជាជនប៉ាឡេស្ទីន ដែលកំពុងតែមានស្រាប់ ឲ្យរីកកាន់តែធំទៅ។ លោក Yehuda Glickដែល កំពុងតែត្រូវបានក្រុមគ្រូពេទ្យអ៊ីស្រាអែលជួយសង្គ្រោះ ពេលនេះ មានអាការៈល្អប្រសើរបន្តិចហើយ។
នៅថ្ងៃព្រហស្បតិ៍ដដែល អាជ្ញាធរអ៊ីស្រាអែល បានថ្លែងឲ្យដឹងទៀតថា ខ្លួននឹងបិទផ្លូវចេញចូលទៅទីលានវិហារអ៊ីស្លាមបូរាណ ដែលនៅក្នុងក្រុងហ៊្សេរូសាឡឹម ទំរាំដល់ស្ថានការណ៍បានធូរស្រាលឡើងវិញ។ លោក នាយករដ្ឋមន្រ្តីអ៊ីស្រាអែល Binjamin Netanyahu បានបន្ថែមថា អាជ្ញាធរអ៊ីស្រាអែល ទាំងទាហាន ទាំងប៉ូលីស ត្រូវពង្រឹងកម្លាំង ឲ្យបានជាប់ ដើម្បីត្រៀមទប់ទល់ទៅនឹងអំពើហិង្សាណាមួយ ជាពិសេស នៅតំបន់ហ៊្សេរូសាឡឹមខាងកើត។ នេះជាលើកទីមួយហើយដែលអ៊ីស្រាអែលបិទទីលាននេះ ចាប់តាំងពីឆ្នាំ១៩៦៧។
សូមបញ្ជាក់ថា ទីលានវិហានអ៊ីស្លាម ដែលស្ថិតនៅលើដីទួលខ្ពស់ក្នុងទីក្រុងហ៊្សេរូសាឡឹម គឺជាទីសក្ការៈបូជា ដ៏សំខាន់បំផុត ទីបីរបស់អ្នកកាន់សាសនាអ៊ីស្លាម ទូទាំងពិភពលោក។ មួយថ្ងៃៗ មានអ្នកកាន់សាសនាអ៊ីស្លាមរាប់ពាន់នាក់ មកបន់ស្រន់ ថ្វាយបង្គំនៅទីនោះ។ ប៉ុន្តែបើតាមប្រវត្តិសាស្រ្ត ទីលានវិហារអ៊ីស្លាមនេះ ត្រូវបានសាងសង់ឡើង កាលពីសតវត្សទី៧ នៅលើទីតាំងអតីតវិហារសាសនាជ្វីហ្វបូរាណ ហើយដែលត្រូវបានបំផ្លាញចោលដោយពួករ៉ូម៉ាំង នៅដើមសតវត្សទីពីរ។
ហេតុដូចនេះហើយ បានជាជនជាតិជ្វីហ្វនិងអ៊ីស្លាម ដណ្តើមគ្នាកាន់កាប់តំបន់នេះ។ កន្លងមកទីលាននេះ តែងតែជាប្រភពនៃជម្លោះក្តៅក្រហាយ រវាងអាជ្ញាធរប៉ាឡេស្ទីន និងអ៊ីស្រាអែលជានិច្ច។ ជម្លោះដែលគ្មានថ្ងៃចប់នេះ អាចនឹងធ្វើ ឲ្យគ្រាប់រំសេវផ្ទុះជាថ្មី រវាងអ៊ីស្រាអែល និងប៉ាឡេស្ទីន ហើយជនរងគ្រោះ គ្មាននរណាក្រៅតែពីប្រជាជនស្លូតត្រង់នោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ