ប្រធានាធិបតីអាសាដត្រៀមចរចាជាមួយបក្សប្រឆាំង តែមិនព្រមចុះពីតំណែង
នៅប្រទេសស៊ីរី ប្រធានាធិបតី Bachar-al-Assad បានត្រៀមខ្លួនពិភាក្សាជាមួយបក្សប្រឆាំង ប៉ុន្តែនៅតែមិនយល់ព្រមចុះចេញពីតំណែងសោះឡើយ។ នេះបើយោងតាមកាសែតអង់គ្លេស Sunday Times ចុះផ្សាយនៅថ្ងៃអាទិត្យនេះ។ ទន្ទឹមនឹងនេះដែរ អង្គការសហប្រជាជាតិក៏បានត្រៀមខ្លួន នឹងជួយសម្រួលអោយកិច្ចចរចារវាងបក្សប្រឆាំងនៅស៊ីរី អាចប្រព្រិត្តទៅបានដោយរលូនផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
កាសែតអង់គ្លេស Sunday Times បានចុះផ្សាយនៅថ្ងៃអាទិត្យនេះ ថាប្រធានាធិបតីប្រទេសស៊ីរី Bachar-al-Assad បានត្រៀមខ្លួនពិភាក្សាជាមួយគណបក្សប្រឆាំង ប៉ុន្តែនៅតែមិនសុខចិត្តចុះពីតំណែងខ្លួននោះឡើយ។
“យើងត្រៀមខ្លួនស្រេចបាច់ហើយ ដើម្បីចរចាជាមួយគ្រប់គ្នា ក្នុងនោះក៏មានសកម្មជនដែលប្រដាប់ដោយអាវុធផងដែរ។ យើងអាចចរចាជាមួយបក្សប្រឆាំងបាន ប៉ុន្តែយើងមិនចរចាជាមួយភេរវជននោះទេ។” នេះជាប្រសាសន៍របស់លោកអាសាដ ក្នុងបទសម្ភាសជាមួយកាសែតអង់គ្លេស Sunday Times ដែលបានថតទុក កាលពីសប្តាហ៍មុន។
លោកអាសាដ បានរំពឹងថា បើបីទោះជាលោកលាចាកពីតំណែង ក៏មិនអាចដោះស្រាយវិបត្តិនៅស៊ីរីបានដែរ ព្រោះថាវាមិនអាចបញ្ចប់នូវការប្រយុទ្ធគ្នាក្នុងប្រទេសនោះឡើយ។ ប្រធានាធិបតីអាសាដ បានលើកយកឧទាហរណ៍របស់ប្រទេសមួយចំនួនដូចជា លីប៊ី យេមែន និងអេហ្ស៊ីប មកផ្សារភ្ជាប់នឹងហេតុផលនេះ។
ទន្ទឹមនេះដែរ លោកអាសាដ បានចោទប្រទេសអង់គ្លេសថា មានបំណងផ្តល់អាវុធដល់ក្រុមភេរវករ ហើយមិនព្រមជួយសំរាលភាពតានតឹងក្នុងកិច្ចចរចានៅស៊ីរី។ ការចោទប្រកាន់នេះ ជាការឆ្លើយតបទៅនឹងរដ្ឋាភិបាលអង់គ្លេស ដែលបានយល់ស្របចង់អោយមានជំនួយដល់ពួកឧទ្ទាម និងចង់អោយអឺរ៉ុបដកចេញនូវទណ្ឌកម្មលើគ្រឿងសព្វាវុធ។
ដោយឡែក ទាក់ទងនឹងការចរចារវាងលោកអាសាដ និងបក្សប្រឆាំងនៅស៊ីរី អង្គការសហប្រជាជាតិក៏បានប្រកាសត្រៀមខ្លួន ជួយសម្រួលអោយកិច្ចចរចានេះអោយប្រព្រិត្តទៅបានដោយរលូនផងដែរ។
ក្នុងលក្ខខណ្ឌនេះ អ៊ីរ៉ង់ដែលជាដៃគូជិតស្និទ្ធរបស់ស៊ីរី បានចាត់ទុកលោកអាសាដ ជាប្រធានាធិបតីស្របច្បាប់ ព្រមទាំងបន្ថែមទៀតថា លោកអាសាដមានសិទ្ធិឈរឈ្មោះជាប្រធានាធិបតី សំរាប់ការបោះឆ្នោតឆ្នាំ ២០១៤ ខាងមុខនេះ។
ស្របនឹងពេលនេះដែរ អំពើហិង្សានៅតែបន្តកើតមាន នៅក្នុងប្រទេសស៊ីរី។ នៅថ្ងៃអាទិត្យនេះ មានកងកម្លាំងស៊ីរីយ៉ាងហោចណាស់ ៣៤នាក់ បានបាត់បង់ជីវិត នៅក្នុងការវាយប្រហារជាមួយពួកឧទ្ទាមក្នុងតំបន់ Khan Al Assal ក្នុងខេត្តAlep ស្ថិតនៅភាគខាងជើងប្រទេស។ ពួកឧទ្ទាមដណ្តើមបានតំបន់នេះ នាព្រឹកថ្ងៃអាទិត្យនេះ។
កាលពីថ្ងៃសៅរ៍ម្សិលមិញ យោងតាមក្រុមសិទ្ធិមនុស្ស អំពើហិង្សាបានបង្កអោយមានមនុស្សស្លាប់ ១៥៦នាក់ទៀត នៅទូទាំងប្រទេស។ អង្គការសហប្រជាជាតិបានរំពឹងថា អំពើហិង្សានៅស៊ីរី រយៈពេលពីរឆ្នាំមកនេះ បានបណ្តាលអោយមានមនុស្សប្រហែលជា ៧០ ០០០ នាក់បាត់បង់ជីវិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ