Bradley Manning ជាប់ទោសពីបទរំលោភច្បាប់ស៊ើបការអាមេរិក តែរួចការចោទប្រកាន់ថាឃុបឃិតជាមួយសត្រូវ
នៅថ្ងៃពុធនេះ តុលាការយោធាអាមេរិកនឹងបើកសវនការដំណាក់កាលចុងក្រោយ ធ្វើសេចក្តីសំរេចពីទោសដែលត្រូវដាក់ទៅលើ Bradley Manning យោធាអាមេរិកវ័យក្មេងមួយរូប ដែលបានទំលាយឯកសារសំងាត់ជាប្រវតិ្តសាស្ត្រ នៅអាមេរិក។ នៅថ្ងៃអង្គារម្សិលមិញ តុលាការបានប្រកាសថា Bradley Manning មានទោសក្នុងបទចោទប្រកាន់ ពី១៩ ទៅ២២ ទាក់ទងការរំលោភច្បាប់ស៊ើបការ។ ប៉ុន្តែ ទាហានរូបនេះ រួចផុតពីការចោទប្រកាន់ថា បានឃុបឃិតជាមួយសត្រូវ។ Bradley Manning ប្រហែលអាចជាប់ពន្ធនាគាររហូតដល់១៣៦ឆ្នាំ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤១
យោងតាមការវិនិច្ឆ័យដែលអានឡើងដោយចៅក្រមយោធា Denise Lind យុវជន Bradley Manning អាចទទួលទោសជាប់ពន្ធនាគារជាង១០០ឆ្នាំឯណោះ។ Bradley Manning មានទោស ក្នុងបទចោទប្រកាន់ ពី២០ទៅ២២ ស្តីពីការរំលោភច្បាប់ទាក់ទងការស៊ើបការ និងការលួចឯកសារសំងាត់យោធានិងការទូតអាមេរិក។
គួររំលឹកថា ចាប់ពីខែកញ្ញា ឆ្នាំ២០០៩ រហូតដល់ថ្ងៃចាប់ខ្លួន នៅខែឧសភា ឆ្នាំ២០១០ នៅពេលបំពេញការងារជាអ្នកវិភាគព័ត៌មានស្តីពីប្រទេសអ៊ីរ៉ាក់ យុវជនយោធារូបនេះ បានផ្តល់ឯកសារសំងាត់យោធា និងការទូតចំនួន៧ម៉ឺនច្បាប់ អោយគេហទំព័រអូស្ត្រាលីឈ្មោះថា WikiLeaks ធ្វើការផ្សព្វផ្សាយ។ លើសពីនេះទៀត ចៅក្រមយោធាបានលើកឡើងថា Bradley Manning បានជាប់ទោសថាបានលួចបញ្ជូនខ្សែកាបផ្នែកការទូតដោយខុសច្បាប់ និងឯកសារសំងាត់ទាក់ទងអ្នកទោសនៅពន្ធនាគារ Guantanamo ទៀតផង។ Bradley Manning មិនបានគោរពបទបញ្ជាយោធា និងបានធ្វើបច្ចេកទេសកុំព្យូទ័ររំលោភលើការហាមឃាត់ផ្នែកយោធា។
ដោយឡែក តុលាការយោធាសំរេចអោយយុវជនរូបនេះ រួចពីការចោទប្រកាន់ថា បានឃុបឃិតជាមួយសត្រូវ។ ប្រសិនជា Bradley Manning ត្រូវបានគេរកឃើញថា បានជួយក្រុមឧទ្ទាមអាល់ កៃដា មែននោះ Bradley Manning អាចនឹងជាប់ពន្ធនាគារពីបទឃុបឃិតក្នុងអំពើឧក្រិដ្ឋ។ លោក David Coombs ដែលជាមេធាវីរបស់ Bradley Manning បានលើកឡើងថា ព្រះរាជអាជ្ញាបានចោទប្រកាន់ថា Bradley Manning ឃុបឃិតជាមួយសត្រូវនោះ គឺដើម្បីជំរុញមិនអោយមានការផ្សព្វផ្សាយព័ត៌មានសំងាត់ដែលលេចធ្លាយតែប៉ុណ្ណោះ។
សហភាពអាមេរិកាំងធ្វើការការពារសេរីភាព ហៅកាត់ថា ALCU មានការធូរស្រាលចិត្តពេល Bradley Manning រួចពីការចោទថា បានឃុបឃិតជាមួយសត្រូវ។ សហភាពនេះលើកឡើងថា បញ្ហាលេចធ្លាយឯកសារផ្តល់ដល់សារព័ត៌មាន ដើម្បីប្រយោជន៍សាធារណៈបែបនេះ មិនគួរត្រូវប្តឹងដាក់ទោសនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ