ប្រមុខរដ្ឋាភិបាលកម្ពុជា ទៅចូលរួមប្រជុំកំពូលអាស៊ាន នៅព្រុយណេ
នៅព្រឹកថ្ងៃទី២៤មេសានេះ លោកនាយករដ្ឋមន្ត្រី ហ៊ុន សែន បានដឹកនាំគណៈប្រតិភូជាន់ខ្ពស់របស់រដ្ឋាភិបាលកម្ពុជា ចេញទៅចូលរួមកិច្ចប្រជុំកំពូលអាស៊ាន លើកទី២២ នៅប្រទេសព្រុយណេ។ កិច្ចប្រជុំកំពូលអាស៊ាន លើកទី២២ នឹងធ្វើឡើងពីរថ្ងៃ ចាប់ពីថ្ងៃទី២៤ ដល់ថ្ងៃទី២៥មេសា ក្រោមប្រធានបទ "ប្រជាជនរបស់យើង ដើម្បីអនាគតទាំងអស់គ្នា"។ មេដឹកនាំកំពូលអាស៊ានទាំង១០ ក៏នឹងពិភាក្សាផ្តោតទៅលើរបៀបវារៈសំខាន់ៗ លើការបង្កើតសហគមន៍អាស៊ាន នៅឆ្នាំ២០១៥។ បញ្ហាប្រឈមនៅក្នុងតំបន់ និងពិភពលោក ជាពិសេសពាក់ព័ន្ធនឹងភាពតានតឹងនៅឧបទ្វីបកូរ៉េ និងសភាពការណ៍នៅឈូងសមុទ្រចិនខាងត្បូង ឈូងសមុទ្រចិនខាងកើត ព្រមទាំងការប្រែប្រួលអាកាសធាតុ ក៏ស្ថិតក្នុងរបៀបវារៈនៃកិច្ចប្រជុំកំពូលអាស៊ាន លើកទី២២ ផងដែរ។
ចុះផ្សាយនៅថ្ងៃ៖
ស្តាប់ - ០២:៣៥
គឺនៅព្រឹកមិញតែម្តង ដែលលោកនាយករដ្ឋមន្ត្រី ហ៊ុន សែន បានដឹកនាំគណៈប្រតិភូជាន់ខ្ពស់ រួមមាន រដ្ឋមន្ត្រីការបរទេស រដ្ឋមន្ត្រីពាណិជ្ជកម្ម និងមន្ត្រីសំខាន់ៗ ជាច្រើនទៀត ចេញពីព្រលានយន្តហោះភ្នំពេញ ដើម្បីឆ្ពោះទៅកាន់កិច្ចប្រជុំកំពូលអាស៊ាន លើកទី២២ នៅប្រទេសព្រុយណេ។
តាមសេចក្តីជូនព័ត៌មានរបស់ក្រសួងការបរទេស កិច្ចប្រជុំកំពូលអាស៊ានលើកទី២២ នៅព្រុយណេ នឹងផ្តោតទៅលើសហគមន៍អាស៊ានឆ្នាំ២០១៥ ពាក់ព័ន្ធនឹងតួនាទីស្នូលរបស់អាស៊ាន ការធ្វើសមាហរណកម្មតំបន់ ទិសដៅអនាគតរបស់អាស៊ាន និងការផ្លាស់ប្តូរទស្សនៈអំពីបញ្ហាតំបន់ និងអន្តរជាតិ ព្រមទាំងបញ្ហាដទៃទៀត ដែលជាកង្វល់ និងផលប្រយោជន៍រួមរបស់អាស៊ាន។
បន្ថែមលើសពីនេះ នៅមុនពេលឡើងយន្តហោះ អមដំណើរលោកនាយករដ្ឋមន្ត្រី ទៅកាន់កិច្ចប្រជុំអាស៊ាន នាព្រឹកព្រលឹមថ្ងៃពុធនេះ លោក ស្រ៊ឺ ថាមរុង្គ រដ្ឋមន្ត្រីប្រតិភូអមនាយករដ្ឋមន្ត្រី និងជាទីប្រឹក្សាផ្ទាល់របស់នាយករដ្ឋមន្ត្រី បានថ្លែងទៅកាន់ក្រុមអ្នកកាសែត នៅព្រលានយន្តហោះភ្នំពេញថា កិច្ចប្រជុំកំពូលអាស៊ាន លើកទី២២ នឹងប្រារព្ធឡើង ក្រោមប្រធានបទ "ប្រជាជនរបស់យើង ដើម្បីអនាគតទាំងអស់គ្នា"។
កិច្ចប្រជុំកំពូលអាស៊ាន ក៏នឹងពិភាក្សាផ្តោតទៅលើរបៀបវារៈ ៤ ជាសំខាន់ លើការបង្កើតសហគមន៍អាស៊ាន នៅឆ្នាំ២០១៥។ របៀបវារៈទី១ ស្តីពីការខិតខំជំរុញការធ្វើសមាហរណកម្មភ្ជាប់ ពិសេសការកសាងសសរស្តម្ភទាំងបី គឺនយោបាយ សេដ្ឋកិច្ច និងវប្បធម៌សង្គម។ របៀបវារៈទី២ ស្តីពីតួនាទីស្នូលរបស់អាស៊ាន និងនិមាបនកម្ម នៅក្នុងតំបន់។ របៀបវារៈទី៣-ពិភាក្សាទៅលើអនាគតអាស៊ាន ក្រោយពីចូលជាសហគមន៍ហើយ តើអាស៊ាន ត្រូវធ្វើអ្វីទៀតនៅពេលអនាគត និងរបៀបវារៈទី៤-ការផ្លាស់ប្តូរទស្សនៈគ្នាលើបញ្ហាប្រឈមនៅក្នុង តំបន់ និងពិភពលោក ជាពិសេសពាក់ព័ន្ធនឹងភាពតានតឹងនៅឧបទ្វីបកូរ៉េ និងសភាពការណ៍នៅឈូងសមុទ្រចិនខាងត្បូង ឈូងសមុទ្រចិនខាងកើត ព្រមទាំងការប្រែប្រួលអាកាសធាតុ។
លោក ស្រ៊ឺ ថាមរុង្គ បានបន្តថា រហូតដល់ព្រឹកថ្ងៃទី២៥ ខែមេសាស្អែកនេះ ទើបលោកនាយករដ្ឋមន្ត្រី ហ៊ុន សែន ចូលរួមក្នុងកិច្ចប្រជុំចង្អៀត ជាមួយមេដឹកនាំកំពូលអាស៊ាន ៩ ប្រទេសផ្សេងទៀត ដើម្បីពិភាក្សាទៅលើរបៀបវារៈសំខាន់ៗ ទាំង ៤ ខាងលើ។
បញ្ហាជម្លោះនៅសមុទ្រចិនខាងត្បូង ដែលជាជម្លោះរវាងប្រទេសចិន និងបណ្តាប្រទេសមួយចំនួន ដែលជាសមាជិកអាស៊ាន រួមមាន៖ ព្រុយណេ ដែលជាប្រធានប្តូរវេនអាស៊ាន នៅឆ្នាំ២០១៣នេះ វៀតណាម ហ្វីលីពីន និងម៉ាឡេស៊ី ត្រូវគេរំពឹងថា ជម្លោះដែនសមុទ្រដ៏រ៉ាំរ៉ៃនេះ នឹងក្លាយជាប្រធានក្តៅបំផុត សម្រាប់មេដឹកនាំអាស៊ាន ត្រូវផ្តោះប្តូរយោបល់ និងស្វែងរកការឯកភាពរួម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ