នួន ជា និងខៀវ សំផន បន្តស្ថិតក្នុងមន្ទីរពេទ្យ សវនាការបន្តធ្វើនៅថ្ងៃចន្ទ
បើទោះបីជាជនជាប់ចោទ នួន ជា និងខៀវ សំផន កំពុងបន្តស្ថិតនៅក្នុងមន្ទីរពេទ្យ និងបើទោះបីជាបុគ្គលិកខាងភាគីកម្ពុជាគ្មានប្រាក់ខែក៏ដោយ ក៏សវនាការសំណុំរឿង ០០២ នៅតែបន្តបើកធ្វើដដែលនៅថ្ងៃចន្ទស្អែក។ នេះបើតាមការអះអាងរបស់មន្ត្រីសាលាក្តីខ្មែរក្រហមនៅរសៀលថ្ងៃអាទិត្យនេះ។ សវនាការនៅថ្ងៃស្អែកនឹងបន្តពិនិត្យសំណុំឯកសារមួយចំនួនទៀតក្នុងចំណោមឯកសារជិត ១លានទំព័រទាក់ទងនឹងរបបខ្មែរក្រហម។ ចំណែកបុគ្គលិកសាលាក្តីបាននាំគ្នាជជីកសួរនាំអំពីបញ្ហាថវិកា។
ចុះផ្សាយនៅថ្ងៃ៖
ស្តាប់ - ០២:២៥
រហូតមកទល់នឹងរសៀលថ្ងៃអាទិត្យនេះ ជនជាប់ចោទសំខាន់ពីរនាក់គឺ នួន ជា និងខៀវ សំផន កំពុងបន្តស្ថិតនៅក្នុងមន្ទីរពេទ្យនៅឡើយ។ ប៉ុន្តែ សវនាការសំណុំរឿង០០២ នឹងនៅតែបន្តបើកធ្វើដដែលនៅថ្ងៃចន្ទស្អែកនេះដោយហេតុថា ជនជាប់ចោទទាំងពីរបានសម្រេចបោះបង់សិទ្ធិចូលរួមសវនាការ។
លោក នេត្រ ភក្ត្រា អ្នកនាំពាក្យសាលាក្តីខ្មែរក្រហមបានប្រាប់វិទ្យុបារាំងអន្តរជាតិនៅថ្ងៃនេះថា អតីតបងធំទី២ នួន ជា និងអតីតប្រមុខរដ្ឋសម័យខ្មែរក្រហម លោក ខៀវ សំផន មានអាការៈធូរស្បើយពីជំងឺបន្តិចហើយ ប៉ុន្តែ នៅមិនទាន់អាចចេញពីមន្ទីរពេទ្យបាននៅឡើយទេ។ ដូច្នេះ សវនាការនៅថ្ងៃស្អែកនេះមានវត្តមានតែជនជាប់ចោទម្នាក់គត់ គឺ អៀង សារី អតីតរដ្ឋមន្ត្រីក្រសួងការបរទេសខ្មែរក្រហម ប៉ុន្តែ លោកអៀង សារី ក៏មិនអាចចូលរួមសវនាការដោយផ្ទាល់បានដែរ គឺអាចត្រឹមស្តាប់សវនាការពីចម្ងាយក្នុងបន្ទប់ពិសេសតែប៉ុណ្ណោះ។
ងាកទៅមើលបញ្ហាថវិកាវិញ បុគ្គលិកជនជាតិខ្មែរទាំង ២៨៧ នាក់ មិនទទួលបានប្រាក់ខែតាំងពីខែធ្នូមកម្ល៉េះ ហើយពួកគេក៏មិនដឹងថា ពេលណាទើបអាចមានប្រាក់ខែឡើងវិញនោះដែរ។ បុគ្គលិកទាំងនោះបាននាំគ្នាដេញដោលអំពីបញ្ហាថវិកានេះទៅកាន់មន្ត្រីរដ្ឋបាលសាលាក្តី ប៉ុន្តែ រហូតមកដល់ពេលនេះនៅមិនទាន់មានចម្លើយយ៉ាងណានៅឡើយទេ។ អ្នកនាំពាក្យសាលាក្តីខ្មែរក្រហមបានអះអាងថា នៅមិនទាន់មានប្រទេសណាសន្យាផ្តល់ជំនួយនៅឡើយទេ ហើយបញ្ហានេះបានធ្វើឲ្យប៉ះពាល់សតិអារម្មណ៍ និងការងាររបស់មន្ត្រី និងបុគ្គលិកជនជាតិខ្មែរ។
វ័យចាស់ជរារបស់ជនជាប់ចោទ និងកង្វះថវិកាគឺជាចំណោទធំ២នៅចំពោះសាលាក្តីកាត់ទោសអតីតមេដឹកនាំខ្មែរក្រហម។ រហូតមកទល់ពេលនេះ ជនជាប់ចោទក្នុងសំណុំរឿង ០០២ នៅសល់តែ៣នាក់ប៉ុណ្ណោះបន្ទាប់ពីលោកស្រី អៀង ធិរិទ្ធិ អតីតរដ្ឋមន្ត្រីសង្គមកិច្ចខ្មែរក្រហមត្រូវបានដោះលែងឲ្យមានសេរីភាពវិញដោយសារជំងឺបាត់ការចងចាំ។ ជនជាប់ចោទទាំងបីដែលនៅសល់គឺអៀង សារី អាយុ ៨៧ឆ្នាំ, នួន ជា អាយុ ៨៦ឆ្នាំ និង ខៀវ សំផន អាយុ ៨២ឆ្នាំ កំពុងធ្លាក់ខ្លួនឈឺជាបន្តបន្ទាប់ និងស្ថិតក្នុងមន្ទីរពេទ្យច្រើនជាងមន្ទីរឃុំឃាំង។
ទន្ទឹមនឹងនោះ ចំណោទបញ្ហាថវិកាក៏បានស្តែងឡើងកាន់តែខ្លាំងជាងមុន។ បញ្ហានេះបានធ្វើឲ្យជនរងគ្រោះដែលទន្ទឹងរង់ចាំយុត្តិធម៌សម្តែងការព្រួយបារម្ភពីបរាជ័យនៃសាលាក្តីកូនកាត់មួយនេះ បើទោះជាសវនាការនៅតែបន្តធ្វើនៅពេលនេះក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ