លោក ខៀវ សំផន ចូលពេទ្យសង្គ្រោះបន្ទាន់
លោក ខៀវ សំផន អតីតប្រមុខរដ្ឋសម័យខ្មែរក្រហម បានធ្លាក់ខ្លួនឈឺធ្ងន់ កាលពីព្រឹកថ្ងៃពុធនេះ ហើយត្រូវបានគេបញ្ជូនចេញពីមន្ទីរឃុំឃាំងរបស់តុលាការខ្មែរក្រហម ទៅសង្គ្រោះបន្ទាន់ នៅមន្ទីរពេទ្យរុស្ស៊ី។ អ្នកនាំពាក្យសាលាក្តីខ្មែរក្រហម លោក នេត្រ ភក្ត្រា បានឲ្យដឹងថា លោក ខៀវ សំផន ដែលមានអាយុ ៨២ឆ្នាំ មានជំងឺហេវហត់ អស់កម្លាំងខ្លាំង ហើយត្រូវសម្រាកក្នុងមន្ទីរពេទ្យ។ ចំណែកលោក នួនជា ដែលបានចូលពេទ្យ តាំងពីថ្ងៃអាទិត្យ បានធូរស្រាលបន្តិច តែលោកនួនជា ដែលមានជំងឺរលាកទងសួតធ្ងន់ធ្ងរនោះ នៅតែក្តៅខ្លួន និងក្អកខ្លាំងនៅឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥០
មានអាយុ ៨២ ឆ្នាំ លោក ខៀវ សំផន បានធ្លាក់ខ្លួនឈឺ ដោយមានអាការៈ អស់កម្លាំងខ្លាំង ហើយហេវហត់ ត្រូវបានគេបញ្ជូនចេញពីមន្ទីរឃុំឃាំងរបស់តុលាការខ្មែរក្រហម ទៅកាន់មន្ទីរពេទ្យមិត្តភាពខ្មែរ-សូវៀត ឬមន្ទីរពេទ្យរុស្ស៊ី កាលពីព្រឹកម៉ោង ៩ និង៤៥ នាទី ថ្ងៃទី១៦ ខែ មករា ឆ្នាំ២០១៣។ មកដល់រសៀលនេះ ក្រុមគ្រូពេទ្យ កំពុងតែពិនិត្យព្យាបាល។ នេះបើតាមលោក នេត្រ ភក្ត្រា អ្នកនាំពាក្យសាលាក្តីខ្មែរក្រហម។
លោក នេត្រ ភក្ត្រា បានបន្ថែមថា លោក ខៀវ សំផន ធ្លាក់ខ្លួនឈឺចូលពេទ្យពេលនេះ ហាក់បីដូចជាចៃដន្យ ហើយជួនពេលដែលលោក នួន ជា កំពុងស្ថិតនៅមន្ទីរពេទ្យនៅឡើយ។
ក៏ប៉ុន្តែលោក នេត្រ ភក្ត្រា បានឲ្យដឹងថា សម្រាប់លោក នួន ជា ត្រូវបានគ្រូពេទ្យ បញ្ជាក់តាមរយៈរបាយការណ៍មួយ កាលពីថ្ងៃទី១៥ ខែមករា ឆ្នាំ២០១៣ ថាលោក នួន ជា បានធូរស្រាលបន្តិចហើយ តែលោកនៅមានកំដៅខ្ពស់ ហើយក្អកនៅឡើយ។
កាលពីថ្ងៃអាទិត្យ ទី១៣ ខែមករា ឆ្នាំ២០១៣ អតីតអនុលេខាបក្សកុម្មុយនីស្តកម្ពុជា និងជាប្រធានរដ្ឋសភាខ្មែរក្រហម លោក នួន ជា អាយុ ៨៦ឆ្នាំ ត្រូវបានបញ្ជូនទៅសង្គ្រោះបន្ទាន់ នៅមន្ទីរពេទ្យរុស្ស៊ី។ លោក នួន ជា មានជំងឺរលាកទងសួតធ្ងន់ធ្ងរ។
លោក នួន ជា ឈឺធ្ងន់ នាំឲ្យអង្គជំនុំជម្រះសាលាដំបូង របស់សាលាក្តីខ្មែរក្រហម បានសម្រេចផ្អាកសវនាកាជាបណ្តោះអាសន្ន លើសំណុំរឿង០០២ ដែលមានជនជាប់ចោទ នួនជា អៀងសារី និងខៀវសំផន។ ក្នុងសប្តាហ៍នេះ សាលាក្តីបានប្រកាសថា នឹងមិនមានសវនាកាទេ។
ទោះជាយ៉ាងណាក៏ដោយ មន្ត្រីនាំពាក្យសាលាក្តីខ្មែរក្រហម មិនដឹងថា ពេលណាទើបអតីតមេខ្មែរក្រហម លោក នួនជា និងលោក ខៀវសំផន ដែលធ្លាក់ខ្លួនឈឺធ្ងន់ បានជាសះស្បើយចេញពីមន្ទីរពេទ្យនោះទេ។ ចំពោះសវនាកាលើសំណុំរឿង០០២ ក៏មិនដឹងថា តុលាការនឹងបន្តឡើងវិញនៅពេលណាឡើយ។
ក៏ប៉ុន្តែលោក នេត្រ ភក្ត្រា បានអះអាងថា សាលាក្តីខ្មែរក្រហម មាននីតិវិធីគ្រប់គ្រាន់ សម្រាប់ដំណើរការសវនាកាលើសំណុំរឿង០០២។ នៅពេលនេះ ចៅក្រមអង្គជំនុំជម្រះសាលាដំបូង កំពុងរង់ចាំការឆ្លើយតបពីក្រុមមេធាវីការពារអតីតមេខ្មែរក្រហម ថាតើលោក នួនជា និងលោក ខៀវសំផន សុខចិត្តលះបង់សិទ្ធិ ក្នុងការចូលរួមដោយផ្ទាល់ ក្នុងសវនាកា ហើយបន្តតាមដានសវនាកាតាមប្រព័ន្ធសោតទស្សន៍ ឬយ៉ាងណា។
មកដល់ពេលនេះ អតីតរដ្ឋមន្ត្រីការបរទេសខ្មែរក្រហម លោក អៀង សារី អាយុ៨៧ឆ្នាំ ក៏កំពុងមានជំងឺប្រចាំកាយ កំពុងស្ថិតនៅក្នុងបន្ទប់ឃុំឃាំងរបស់តុលាការពិសេសកាត់ទោសមេខ្មែរក្រហម។ ក្នុងរយៈពេលប៉ុន្មានខែចុងក្រោយនេះ លោកអៀងសារី ដោយសារបញ្ហាសុខភាព មិនអាចចូលរួមដោយផ្ទាល់ ក្នុងសវនាកាកាត់ទោសរូបលោកឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ