ចំនួនសត្វផ្សោតទន្លេមេគង្គ កើនឡើងដល់៩២ក្បាល តែនៅប្រឈមនឹងការគំរាមកំហែង
ចំនួនសត្វផ្សោតទន្លេមេគង្គ ដែលកំពុងទទួលរងគ្រោះថ្នាក់ជិតផុតពូជ បានកើនឡើងពី ៨០ ទៅ៩២ក្បាល ក្នុងរយៈពេលពីរឆ្នាំចុងក្រោយនេះ ហើយនេះជាកំណើនដំបូងបង្អស់ក្នុងកំណត់ត្រា ស្រាវជ្រាវចាប់តាំងពីជាង ២០ ឆ្នាំមុនមកម្លេះ។ នេះបើតាមលទ្ធផលនៃការសិក្សាស្រាវជ្រាវរួមដោយរាជរដ្ឋាភិបាលកម្ពុជា និងអង្គការមូលនិធិសកលសម្រាប់អភិរក្សធនធានធម្មជាតិ (WWF) ចេញផ្សាយនៅថ្ងៃម្សិលមិញនេះ។ កំណើននេះ ត្រូវបានអង្គការ (WWF) ចាត់ទុកថាជាក្តីសង្ឃឹមសម្រាប់អាយុជីវិតរបស់សត្វផ្សោត ទន្លេមេគង្គ និងប្រជាពលរដ្ឋរាប់លាននាក់ដែលពឹងអាស្រ័យលើទន្លេមេគង្គ។
ចុះផ្សាយនៅថ្ងៃ៖
ការសិក្សាស្រាវជ្រាវជាផ្លូវការដំបូងបង្អស់ក្នុងឆ្នាំ១៩៩៧ បានធ្វើការប៉ាន់ប្រមាណថា មានចំនួនសត្វផ្សោតទន្លេមេគង្គប្រហែល២០០ក្បាល ក្នុងទន្លេមេគង្គ ហើយចំនួននេះបានដាំក្បាលចុះជាបន្តបន្ទាប់ដោយសារតែការជាប់មង និងបាត់បង់ជម្រក រហូតធ្លាក់មកនៅត្រឹមចំនួន ៨០ក្បាល ក្នុងឆ្នាំ២០១៥។ ប៉ុន្តែបើតាមអង្គការមូលនិធិសកលសម្រាប់អភិរក្សធនធានធម្មជាតិ (WWF) ការធ្លាក់ចុះនេះ មានការប្រសើរឡើងវិញ ជាក់ស្តែងលទ្ធផលនៃការសិក្សាស្រាវជ្រាវឆ្នាំ២០១៧ បានបង្ហាញថា សត្វផ្សោតទន្លេមេគង្គបានកើនដល់ចំនួន ៩២ ក្បាល។
ជាមួយនឹងកំណើនប្រមាណជា១០% នៃសត្វផ្សោតទន្លេមេគង្គ ត្រូវបានអង្គការ WWF លើកឡើងថា ដោយសារតែមានការល្បាតប្រកបដោយប្រសិទ្ធភាពតាមទន្លេដោយក្រុមឆ្មាំទន្លេ និងការរឹបអូសមងនេសាទខុសច្បាប់ដែលទាក់ជាប់ និងធ្វើឱ្យសត្វផ្សោតឈ្លក់ទឹកស្លាប់ដោយចៃដន្យ។ នៅក្នុងនោះ អំឡុងពេលជាង ២ឆ្នាំមុន មងនេសាទខុសច្បាប់ប្រវែងសរុប ៣៥៨ គីឡូម៉ែត្រ ត្រូវបានរឹបអូសចេញពីតំបន់ស្នូលរបស់សត្វផ្សោត ខណៈមងនេសាទខុសច្បាប់ដែលត្រូវបានរឹបអូសនេះ មានប្រវែងស្ទើតែស្មើនឹងចំនួនទ្វេរដងនៃប្រវែងខ្សែទឹកទន្លេដែលជាជម្រករបស់សត្វផ្សោត។
យ៉ាងណាក៏ដោយ បើតាមលោក សេង ទៀក ប្រធានអង្គការWWF សត្វផ្សោតចំនួន៩២ក្បាល នៅតែរងការគំរាមកំហែង នៅតាមដងទន្លេមេគង្គចន្លោះចម្ងាយ១៩០ គីឡូម៉ែត្រ ចាប់ពីអន្លង់កាំពី ខេត្តក្រចេះ រហូតដល់ល្បាក់ទឹកខោន ក្នុងប្រទេសឡាវ។ មូលហេតុដែលធ្វើឱ្យសត្វផ្សោត ប្រឈមនឹងការគំរាមកំហែង ដោយសារតែមានសកម្មភាពខុសច្បាប់ ដោយប្រើមងនេសាទដើម្បីទាក់យកសត្វផ្សោត និងប្រើឧបករណ៍ឆក់ គ្រាប់បែកកែច្នៃ នុយនេសាទបំពុល និងសកម្មភាពទេសចរណ៍ ក៏ដូចជាបណ្តាគម្រោងអភិវឌ្ឍន៍ហេដ្ឋារចនាសម្ព័ន្ធដែលកំពុងសាងសង់ជាដើម។
ឆ្លើយតបបញ្ហានេះ លោក អេង ជាសាន ប្រតិភូរាជរដ្ឋាភិបាល ទទួលបន្ទុកជាប្រធាននាយកដ្ឋានជលផល នៃក្រសួងកសិកម្ម រុក្ខាប្រមាញ់ និងនេសាទ ប្តេជ្ញាថា ក្រសួង និងស្ថាប័នជំនាញផ្សេងទៀត នឹងបន្តកិច្ចខិតខំប្រឹងប្រែងអភិរក្សនេះ ដើម្បីឱ្យចំនូនសត្វផ្សោតមានការកើនឡើងឡើងវិញ ដោយលប់បំបាត់រាល់ការគំរាមកំហែងនានា ចំពោះភាពរស់រានមានជីវិតរបស់សត្វផ្សោតទាំងនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ