អ្នកឃ្លាំមើលការបោះឆ្នោត៖ការឃុំខ្លួនបេក្ខជនបក្សប្រឆាំងនឹងប៉ះពាល់សិទ្ធិចូលរួមការបោះឆ្នោតឃុំសង្កាត់របស់ពួកគេ
ម្សិលមិញ តុលាការក្រុងភ្នំពេញ និង បន្ទាយមានជ័យ បានសម្រេចឃុំខ្លួនចៅសង្កាត់រងរបស់គណបក្សសម រង្ស៊ី ពីររូបដែលជាបេក្ខភាពលើគេសម្រាប់ឈឈ្មោះបោះឆ្នោតឃុំសង្កាត់នាពេលខាងមុខ។ ការចាប់ខ្លួននេះ ធ្វើឲ្យអ្នកឃ្លាំមើលការបោះឆ្នោតនៅកម្ពុជា សម្តែងក្តីព្រួយបារម្ភថា វានឹងប៉ះពាល់ដល់ការចូលរួមប្រកួតប្រជែងដោយស្មើភាពរបស់ពួកគេនៅក្នុងការបោះឆ្នោតដែលនឹងធ្វើឡើងក្នុងខែមិថុនា ប៉ុន្មានខែទៀតនេះ។
ចុះផ្សាយនៅថ្ងៃ៖
ស្តាប់ - ០២:៣១
លោកគល់ បញ្ញានាយកប្រតិបត្តិគណៈកម្មាធិការ ដើម្បីការបោះឆ្នោតដោយសេរីនិងយុត្តិធម៌នៅកម្ពុជាហៅកាត់ថាComfrel យល់ថា វាមិនមែនជារឿងត្រឹមត្រូវទេដែលអាជ្ញាធរនិងតុលាការមកចាប់និងឃុំខ្លួនចៅសង្កាត់រងពីររបស់គណបក្សសម រង្សីដូច្នេះ។ មិនត្រឹមត្រូវ បើតាមលោកគល់ បញ្ញា គឺដោយសារតែពួកគេទាំងពីរនាក់នោះ គឺជាបេក្ខជនសម្រាប់ឈឈ្មោះបោះឆ្នោតឃុំសង្កាត់នាខែមិថុនាខាងមុខ។ ដូចនេះ ការឃុំខ្លួន នឹងប៉ះពាល់ដល់សិទ្ធិរបស់ពួកគេក្នុងការចូលរួមប្រកួតប្រជែងក្នុងការបោះឆ្នោតជាមិនខាន។
ចំណែកលោកសំ គន្ធាមី នាយកប្រតិបត្តិអង្គការនិចហ្វិចវិញបានលើកឡើងថា ការចាប់ឃុំខ្លួននេះ អាចនឹងបបង្កការភ័យខ្លាចដល់បេក្ខជនដទៃទៀតអំពីបញ្ហាសន្តិសុខ និងសុវត្ថិភាពរបស់ពួកគេក្នុងការចូលរួមឈរឈ្មោះបោះឆ្នោតឃុំសង្កាត់ខាងមុខ។ លោកសង្កត់ធ្ងន់ថា ប្រសិនបើបេក្ខជនណាមានការភ័យខ្លាចនឹងទិដ្ឋភាពនេះខ្លាំង ពួកគេអាចនឹងសុំដកខ្លួនចេញពីការឈរឈ្មោះសម្រាប់ការបោះឆ្នោតក៏ថាបាន។
មន្ត្រីទាំងពីររបស់គណបក្សសម រង្ស៊ី គឺលោកចៅ វាសនា ចៅសង្កាត់រងប៉ោយប៉ែតត្រូវបានបានតុលាការចោទប្រកាន់ពីបទញុះញង់ឲ្យប្រព្រឹត្តអំពើហិង្សា ដែលសំណុំរឿងនេះបានកើតឡើងកាលឆ្នាំ២០១៥ឯណោះ។ រីឯលោកលី សុគន្ធ ចៅសង្កាត់រងបឹងកក់១ ត្រូវបានតុលាការចោទប្រកាន់ពីបទក្លែងបន្លំឯកសារសាធារណៈ។ អ្នកទាំងពីរត្រូវតុលាការឃុំខ្លួនក្នុងពន្ធនាគារកាលថ្ងៃព្រហស្បតិ៍។
លោកអេង ឆៃអ៊ាង មន្ត្រីជាន់ខ្ពស់របស់គណបក្សប្រឆាំងបានចាត់ទុកការចាប់និងឃុំខ្លួនមន្ត្រីរបស់ខ្លួននេះថា គឺជារឿងនយោបាយ។ រឿងនយោបាយ គឺដោយសារតែលោកអេង ឆៃអ៊ាងសំអាងថា រឿងនៅបន្ទាយមានជ័យបានកើតតាំងពីឆ្នាំ២០១៥ តែទើបត្រូវបានលើកមកចាត់ការនៅពេលនេះ នៅពេលដែលការបោះឆ្នោតឃុំសង្កាត់កាន់តែខិតចូលដល់។ ហើយរឿងនេះទៀតសោត លោកគូសបញ្ជាក់ថា មិនពិតទៅទៀត។ ចំណែកករណីនៅភ្នំពេញវិញ លោកអេង ឆៃអ៊ាងអះអាងថា វាមិនមែនជាការក្លែងឯកសារឯណាទេ ប៉ុន្តែវាជារឿងផ្ទៃក្នុងរបស់បក្សសុទ្ធសាធ។
សម្រាប់លោកអេង ឆៃអ៊ាង នេះគឺជារូបភាពបំបាក់ស្មារតីមកលើបេក្ខជនផ្សេងទៀតរបស់គណបក្សប្រឆាំងនៅមុនការបោះឆ្នោតមកដល់។ ហេតុដូច្នេះហើយ លោកស្នើឲ្យតុលាការកុំធ្វើតាមអំណាចនយោបាយបង្កឲ្យមានការឈឺចាប់ដល់មន្ត្រីរបស់លោក និងអំពាវនាវឲ្យគណបក្សកាន់អំណាចផ្តល់សិទ្ធិសេរីភាពពេញលេញ ហើយឈប់ប្រើអំណាចគាបសង្កត់លើបេក្ខជនរបស់គណបក្សប្រឆាំងទៀត។
លោកសួស យ៉ារ៉ា អ្នកនាំពាក្យគណបក្សប្រជាជនកម្ពុជា បានបញ្ជាក់ថា រឿងនេះគឺជារឿងរបស់តុលាការ។ ដូច្នេះការលើកឡើងរបស់គណបក្សប្រឆាំងគឺគ្រាន់តែជាមតិមួយប៉ុណ្ណោះ។ លោកថា ការឃុំខ្លួនមន្ត្រីបក្សប្រឆាំងរបស់តុលាការ និងដំណើរការឆ្ពោះទៅរកបោះឆ្នោត គឺជារឿងពីរផ្សេងពីគ្នា មិនពាក់ព័ន្ធគ្នានោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ