កម្ពុជា

ចលនានិស្សិតបញ្ញវន្តខ្មែរ ចាប់ផ្តើមធ្វើសកម្មភាពឡើងវិញ តាមរយៈបញ្ហាព្រំដែន

ចលនារណសិរ្សប្រជាធិបតេយ្យ និស្សិត បញ្ញវន្តខ្មែរ ដែលរក្សាភាពស្ងប់ស្ងាត់អស់រយៈពេលជាច្រើនឆ្នាំមកហើយ បានចាប់ផ្តើមកម្រើកឡើងវិញហើយ។ ចលនាដែលធ្លាប់ល្បីល្បាញខាងការប្រឆាំងរដ្ឋាភិបាល លើសំណុំរឿងព្រំដែន កាលពីជាង១០ឆ្នាំមុននោះ ឥឡូវបានប្រកាសថា នឹងដឹកនាំប្រតិភូជាកម្មករ សិស្ស និស្សិត បញ្ញវន្ត ទៅពិនិត្យមើលព្រំដែន នៅក្នុងភូមិដូង ឃុំដូង ស្រុករមាសហែក ខេត្តស្វាយរៀង នៅថ្ងៃអាទិត្យ ចុងសប្តាហ៍នេះ។

ចុះផ្សាយនៅថ្ងៃ៖ 05/02/2015 - 07:10

ដោយ៖ វ៉ា សំណព្វ

ផ្សាយពាណិជ្ជកម្ម

ចលនារណសិរ្ស ប្រជាធិបតេយ្យ និស្សិត បញ្ញវន្តខ្មែរ ដែលនៅមិនទាន់មានមេដឹកនាំនៅឡើយនោះ បានប្រកាសថា នឹងដឹកនាំប្រតិភូប្រមាណ៥០ជាកម្មករ សិស្ស និស្សិត បញ្ញវន្ត ទៅទស្សនៈកិច្ចតំបន់ព្រំដែន នៅថ្ងៃអាទិត្យ ទី8 ខែកុម្ភៈ ចុងសប្តាហ៍នេះ។ ចំណុចព្រំដែនដែលទៅពិនិត្យនៅចុងសប្តាហ៍នេះ គឺស្ថិតនៅភូមិសាស្ត្រ ភូមិដូង ឃុំដូង ស្រុករមាសហែក ខេត្តស្វាយរៀង។ ភូមិសាស្ត្រ ភូមិដូង គឺជាតំបន់ព្រំដែនក្តៅមួយ ដែលកន្លងមកគណបក្សប្រឆាំង បានលើកយកមកវាយប្រហារទៅលើគណបក្សកាន់អំណាចថា បានបណ្តែតបណ្តោយឲ្យមានការរំលោភយកដីធ្លី ពីសំណាក់អាជ្ញាធរវៀតណាម។ ហើយសម្រាប់បេសកម្មរបស់ចលនារណសិរ្សប្រជាធិបតេយ្យ និស្សិត បញវន្តខ្មែរ នៅថ្ងៃអាទិត្យចុងសប្តាហ៍នេះ គឺដើម្បីបញ្ជាក់ថា តើការចោទប្រកាន់ទាំងនោះ ពិតឫក្លែងក្លាយ។

លោកម៉ៅ សំអឿន ជាប្រធានស្តីទី រណសិរ្សប្រជាធិបតេយ្យនិស្សិតបញវន្តខ្មែរ បានថ្លែងប្រាប់វិទ្យុបារាំងអន្តរជាតិថា ដំណើរទស្សនកិច្ចរនេះ គឺទៅក្នុងនាមជាសាក្សីរស់។

សូមបញ្ជាក់ថា ចលនា រណសិរ្ស ប្រជាធិបតេយ្យ និស្សិត បញ្ញវន្តខ្មែរធ្លាប់មានឈ្មោះល្បីល្បាញយ៉ាងខ្លាំង កាលពី១០ឆ្នាំមុន តាមរយៈសកម្មភាពប្រឆាំងនឹងការរំលោភព្រំដែននានា ប៉ុន្តែចលនានេះ បានស្ងប់ស្ងាត់មួយរយៈ ក្រោយពីលោកស៊ុត ឌីណា ដែលកាលណោះធ្លាប់ជាប្រធានចលនានេះ បានទៅចូលរួមសកម្មភាពនយោបាយជាមួយសម្តេចក្រុមព្រះនរោត្តម រណឬទ្ធិ នៅឆ្នាំ២០០៦ និងក្រោយមកបានបន្តទៅចូលរួមជាមួយគណបក្សប្រជាជនកម្ពុជា ដែលបច្ចុប្បន្នមានតួនាទីជាឯកអគ្គរាជទូតខ្មែរ ប្រចាំនៅប្រទេសកូរ៉េខាងត្បូង។

បើតាមលោកម៉ៅ សំអឿន ក្រោយពីរក្សាភាពស្ងប់ស្ងាត់មួយរយៈមក ឥឡូវចលនាដែលអះអាងថា មានសមាជិកនៅក្រៅប្រទេសផង បានប្រកាសចាប់ផ្តើមធ្វើសកម្មភាពឡើងវិញ នៅឆ្នាំ២០១៥នេះ ហើយសកម្មភាពដំបូងដែលចលនាចាប់យក នោះគឺបញ្ហាព្រំដែន៕