បោះឆ្នោតជាតិនៅថ្ងៃនេះ គឺជាការបោះឆ្នោតលើកទី៦ហើយគិតចាប់តាំងពីឆ្នាំ១៩៩៣មក
ថ្ងៃទី២៩ កក្កដានេះ គឺថ្ងៃបោះឆ្នោតជ្រើសតាំងតំណាងរាស្ត្រអាណត្តិទី៦នៅក្នុងប្រទេសកម្ពុជា។ ឆ្លៀតឱកាសនេះ វណ្ណ សុគន្ធា សូមនាំលោកអ្នកស្តាប់ទាំងអស់ទៅស្វែងយល់ពីប្រវត្តិនៃការបោះឆ្នោតនៅកម្ពុជាចាប់តាំងពីឆ្នាំ១៩៩៣មកដល់ឆ្នាំ២០១៨នេះ។
ចុះផ្សាយនៅថ្ងៃ៖
ស្តាប់ - ០៤:៣៣
ក្រោយពីបិទបញ្ចប់របបខ្មែរក្រហមក្នុងឆ្នាំ១៩៧៩មក ប្រទេសកម្ពុជាបានចាប់ផ្តើមរៀបចំការបោះឆ្នោតជ្រើសរើសតំណាងរាស្ត្រ និងបង្កើតរដ្ឋាភិបាលឡើងវិញ និងជាលើកដំបូងនៃសករាជថ្មីនៅក្នុងឆ្នាំ១៩៩៣។ ការបោះឆ្នោតនាពេលនោះ ត្រូវបានរៀបចំឡើងដោយអាជ្ញាធរអន្តរកាលនៃអង្គការសហប្រជាជាតិឫហៅកាត់ថាអ៊ុនតាក់។ ការបោះឆ្នោតអាណត្តិទីមួយនេះ មានគណបក្សនយោបាយចំនួន២០បានចូលរួមប្រកួតប្រជែង និង មានពលរដ្ឋចូលរួមបោះឆ្នោតប្រមាណជាង៤លាននាក់ឫ ប្រមាណជិត៩០%(៨៩,៦%)។ លទ្ធផលបោះឆ្នោតនៅពេលនោះ គឺគណបក្សហ្វ៊ុនស៊ិនប៉ិចទទួលបាន៥៨អាសនៈ គណបក្សប្រជាជនកម្ពុជា៥១អាសនៈ គណបក្សប្រជាធិបតេយ្យសេរីនិយមព្រះពុទ្ធសាសនារបស់លោកសឺន សាន បាន១០អាសនៈ និងគណបក្សម៉ូលីណាកា បាន១អាសនៈនៅក្នុងចំណោមអាសនៈ១២០នៅក្នុងសភា។
រំលង៥ឆ្នាំ គឺនៅក្នុង១៩៩៨ ការបោះឆ្នោតអាណត្តិ២ត្រូវបានរៀបចំធ្វើឡើង។ តែការបោះឆ្នោតលើកនេះ គឺធ្វើឡើងដោយអាជ្ញាធររៀបចំការបោះឆ្នោតកម្ពុជា។ ខុសពីអាណត្តិទី១ អាណត្តិទី២នេះ ចំនួនអាសនៈនៅក្នុងរដ្ឋសភាត្រូវបានបង្កើនដល់១២២កៅអី។ ការបោះឆ្នោតនេះ មានគណបក្សចូលរួមចំនួន៣៦ ហើយអ្នកមានឈ្មោះបោះឆ្នោតមាន ៥លាន៣សែននាក់និងអ្នកបានបោះឆ្នោតមានចំនួន៩៣,៧%។ ជាលទ្ធផលនៃការបោះឆ្នោតនេះ គណបក្សប្រជាជនកម្ពុជាទទួលបាន៦៤កៅអី ហ្វ៊ុនស៊ិនប៉ិច ៤៣កៅអី និងគណបក្សសម រង្ស៊ី ទទួលបាន១៥កៅអី។
ឆ្នាំ២០០៣ គឺជាការបោះឆ្នោតលើកទី៣នៅក្នុងប្រទេសកម្ពុជា។ ចំនួនអាសនៈនៅក្នុងរដ្ឋសភានាអាណត្តិនេះ បានបង្កើនបន្ថែមទៀតក្នុងចំនួន១២៣កៅអី។ ប៉ុន្តែចំនួនគណបក្សនយោបាយចូលរួមនៅក្នុងការបោះឆ្នោតមានការធ្លាក់ចុះមកសល់ត្រឹមតែ៧គណបក្ស។ ចំណែកចំនួនអ្នកមានឈ្មោះបោះឆ្នោតបានកើនឡើងដល់៦,៣លាន ហើយអត្រាអ្នកទៅបោះឆ្នោតវិញគឺមាន៨៣,២៨ភាគរយ។ លទ្ធផលពេលនោះ គឺគណបក្សប្រជាជនកម្ពុជាបានក្តោបក្តាប់ដល់៧៣កៅអី ខណៈគណបក្សហ្វ៊ុនស៊ិនប៉ិចបានតែ២៦កៅអី និងគណបក្សសម រង្ស៊ី បានតែ២៤កៅអីប៉ុណ្ណោះ។
មកដល់ឆ្នាំ២០០៨ អាសនៈនៅក្នុងរដ្ឋសភាបានរក្សាចំនួន១២៣ដដែល។ ការបោះឆ្នោតអាណត្តិទី៤នេះ មានគណបក្សចូលរួមចំនួន១០ ហើយចំនួនអ្នកមានឈ្មោះបោះឆ្នោតគឺ ៨លាន១សែននាក់ និងអត្រាទៅបោះឆ្នោត៧៥ភាគរយ។ ការបោះឆ្នោតលើកនេះ គឺគណបក្សប្រជាជនកម្ពុជាបានឈ្នះភ្លូកទឹកភ្លូកដីតែម្តងដោយទទួលបានអាសនៈដល់៩០កៅអីឯណេះ។ សល់ពីនេះ គណបក្សសម រង្ស៊ី បាន២៦កៅអី គណបក្សសិទ្ធិមនុស្សរបស់លោកកឹម សុខា នាពេលនោះ បាន៣កៅអី។ ចំណែកគណបក្សនរោត្តមរណឬទ្ធិ និងគណបក្សហ្វ៊ុនស៊ិនប៉ិចបានត្រឹមតែចែកគ្នាម្នាក់២កៅអីប៉ុណ្ណេះ ដែលជាផ្លែផ្កានៃការបែកបាក់គ្នា។
លុះមកដល់ឆ្នាំ២០១៣ដែលជាអាណត្តិទី៥ ការបោះឆ្នោតនៅកម្ពុជាមានការប្រែប្រួលយ៉ាងខ្លាំង។ ការបោះឆ្នោតនេះ គឺចំនួនអ្នកមានឈ្មោះទៅបោះឆ្នោតមាន៩លាន៦សែននាក់ តែអត្រាអ្នកទៅបោះឆ្នោតបានតែ៦៩,៩ភាគរយ។ បើទោះបីគណបក្សនយោបាយ៨បានចូលរួមប្រកួតប្រជែងក៏ដោយ ប៉ុន្តែចុងក្រោយមានតែគណបក្សនយោបាយពីរប៉ុណ្ណោះដែលគ្រប់គ្រងក្នុងរដ្ឋសភាខ្មែរ គឺគណក្សប្រជាជនកម្ពុជាមាន៦៨អាសនៈ និងគណបក្សសង្គ្រោះជាតិមាន៥៥ អាសនៈ។ គណបក្សសង្គ្រោះជាតិដែលទទួលបានកៅអីច្រើននេះ គឺកើតចេញពីការរួបរួមគ្នារវាងគណបក្សសម រង្ស៊ីរបស់លោកសម រង្ស៊ី និងគណបក្សសិទ្ធិមនុស្សរបស់លោកកឹម សុខា។
ក៏ប៉ុន្តែយ៉ាងណាក៏ដោយ គណបក្សសង្គ្រោះជាតិនេះ លែងមានមុខចូលរួមប្រកួតប្រជែងការបោះឆ្នោតអាណត្តិទី៦នៅក្នុងឆ្នាំ២០១៨នេះទៀតហើយ ព្រោះគណបក្សប្រឆាំងមួយនេះត្រូវបានតុលាការកំពូលកម្ពុជាបានសម្រេចរំលាយចោលនៅក្នុង២០១៧ក្រោយការបោះឆ្នោតឃុំ សង្កាត់ ដោយចោទប្រកាន់ពាក់ព័ន្ធនឹងសកម្មភាពក្បត់ជាតិចង់ផ្តួលរំលំរដ្ឋាភិបាលកម្ពុជា។ ត្បិតថា អត់មានអតីតបក្សសង្គ្រោះជាតិ ប៉ុន្តែការបោះឆ្នោតនៅអាណត្តិទី៦នេះ មានការចូលរួមពីគណបក្សនយោបាយចំនួន២០ ដែលមានទាំងបក្សចាស់ និងបក្សទើបតែបង្កើតថ្មី។ អ្វីជាការកត់សម្គាល់ ចំនួនអាសនៈរដ្ឋសភានៅអាណត្តិថ្មីនេះ ត្រូវបានបង្កើនដល់ទៅ១២៥អាសនៈ ដោយដំឡើងអាសនៈសម្រាប់ខេត្តព្រះសីហនុពី ១អាសនៈទៅ៣អាសនៈ។ ចំណែកអ្នកមានឈ្មោះទៅបោះឆ្នោតវិញ មានចំនួន៨លាន៤សែននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ