ប៉េកាំងបដិសេធមិនបានប្រើរ៉ាដាដូចការចោទប្រកាន់របស់ជប៉ុន
បន្ទាប់ពីបានប្រកាសបើកធ្វើអង្កេត នៅថ្ងៃសុក្រនេះ ក្រុងប៉េកាំងបានចេញសេចក្តីថ្លែងការណ៍បដិសេធ ការចោទប្រកាន់របស់ជប៉ុន ដែលថាមាននាវាចម្បាំងចិនមួយគ្រឿងបានប្រើរ៉ាដា សម្រាប់កំណត់គោលដៅបាញ់ ចាប់ទៅលើនាវារបស់ជប៉ុន កាលពីថ្ងៃទី៣០មករាឆ្នាំ២០១៣។ការបដិសេធរបស់ចិន ទទួលបានប្រតិកម្មយ៉ាងទាន់ហន់ គឺជប៉ុនបានកោះហៅឯកអគ្គរដ្ឋទូតចិនចូលជួប ជាលើកទីពីរ ក្នុងពេលតែមួយសប្តាហ៍។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
“អ្វីដែលជប៉ុនបានលើកឡើង សុទ្ធតែខុសពីការពិតទាំងអស់” ! នេះជាសេចក្តីថ្លែងការណ៍របស់ក្រសួងការពារជាតិចិន ដែលបញ្ជូនតាមទូរសារមកកាន់ភ្នាក់ងារសារព័ត៌មានបារាំង AFP។ នៅថ្ងៃទី ១៩ និង ៣០មករា នាវារបស់ចិនមិនបានប្រើរ៉ាដាសម្រាប់កំនត់គោលដៅបាញ់ឡើយ !។
ជប៉ុនបានសម្រេចជាឯកតោភាគី ផ្តល់ព័ត៌មានទៅកាន់ប្រព័ន្ធឃោសនានូវដំណឹងមិនពិត ហើយអ្នកទទួលខុសត្រូវជាន់ខ្ពស់រដ្ឋាភិបាលជប៉ុនបានធ្វើចំណាប់អារម្មណ៍របៀបគ្មានទំនួលខុសត្រូវ ដើម្បីបង្ហាញថា “មានការគំរាមកំហែងពីចិន”។ នេះជាការគូសបញ្ជាក់បន្ថែមរបស់ក្រសួងការពារជាតិចិន។
កាលពីថ្ងៃអង្គារ រដ្ឋមន្ត្រីក្រសួងការពារជាតិជប៉ុន បានប្រកាសថានាវាចម្បាំងចិនបានប្រើរ៉ាដា សម្រាប់កំណត់គោលដៅបាញ់ ចាប់ទៅលើនាវារបស់ជប៉ុន នៅថ្ងៃទី៣០មករា និងទៅលើឧទ្ធម្ភាគចក្រនៅថ្ងៃទី១៩មករាកន្លងទៅ។ ទង្វើរបស់ចិនបែបនេះ ត្រូវបានលោកនាយករដ្ឋមន្ត្រីជប៉ុនយល់ថាជាការសោកស្តាយពន់ពេក។ ប៉ុន្តែសម្រាប់ចិន ដែលស្ងាត់រហូតមក ទើបឆ្លើយតបនៅថ្ងៃម្សិលមិញ ចោទប្រកាន់ថា ជប៉ុនមានបំណងចង់បង្ខូចរូបភាពចិន ហើយបានប្រកាសបើកធ្វើអង្កេតជុំវិញសំណុំរឿងនេះ។
គ្រាន់តែបានឮសេចក្តីថ្លែងការណ៍បដិសេធរបស់ចិនភ្លាម ក្រសួងការបរទេសជប៉ុនបានកោះហៅជាថ្មីឯកអគ្គរដ្ឋទូតចិនប្រចាំក្រុងតូក្យូចូលជួបភ្លាមជាបន្ទាន់នៅថ្ងៃនេះ ព្រោះចាត់ទុកសេចក្តីបំភ្លឺរបស់ចិន ថាមិនអាចទទួលយកបានឡើយ។
ជម្លោះចិន-ជប៉ុនដែលបណ្តាលមកពីការដណ្តើមបូរណភាពដែនប្រជុំកោះ គ្មានមនុស្សរស់នៅ សេនកាគូ ជាភាសាជប៉ុន ឬ ទាវយូ ជាភាសាចិន បានរាលដាលដល់ការប្រើប្រាស់នាវាយោធាបង្អួតចង្កូមដាក់គ្នា នៅក្នុងសមុទ្ទចិនខាងកើត រហូតដល់អ្នកវិភាគខ្លះព្រួយបារម្ភខ្លាចមានការប៉ះទង្គិចគ្នាដោយអាវុធជាយថាហេតុផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ