នាយករដ្ឋមន្រ្តីជប៉ុនបញ្ជូនបេសកជនទៅជួបលោកស៊ី ជីនពីងដើម្បីបន្ធូរបន្ថយភាពតានតឹង
បេសកជនពិសេសរបស់លោកស្ហ៊ីនហ្សូ អាបេ នាយករដ្ឋមន្រ្តីជប៉ុន បានចូលជួបលោកស៊ី ជីនពីង អនាគតប្រធានាធិបតីចិន នៅថ្ងៃសុក្រនេះ នៅក្នុងពេលដែលប្រទេសទាំងពីរកំពុងតែប្រឈមមុខដាក់គ្នា ជុំវិញជម្លោះដណ្តើមប្រជុំកោះ។ នេះអាចរាប់ថាជាកាយវិកាជាវិជ្ជមានដ៏សំខាន់មួយ នៅក្នុងទំនាក់ទំនងចិន-ជប៉ុន ចាប់តាំងពីគណបក្សអភិរក្សនិយមជប៉ុនឈ្នះឆ្នោតឡើងកាន់អំណាច។
ចុះផ្សាយនៅថ្ងៃ៖
ស្តាប់ - ០២:១៨
លោកណាត់ស៊ូអូ យ៉ាម៉ាហ្គូឈី (Natsuo Yamaguchi) ដែលជាប្រធានគណបក្សដៃគូក្នុងរដ្ឋាភិបាលចម្រុះជប៉ុន បាននាំមកជាមួយនូវលិខិតរបស់លោកស្ហ៊ីនហ្សូ អាបេ ដើម្បីប្រគល់ជូនលោកស៊ី ជីនពីង អគ្គលេខាបក្សកុម្មុយនិស្តចិន ដែលនឹងត្រូវស្នងតំណែងប្រធានាធិបតី ពីលោកហ៊ូ ជីនតាវ នៅខែមីនាខាងមុខ។ មន្រ្តីអ្នកនាំពាក្យក្រសួងការបរទេសចិនបានប្រាប់អ្នកសារព័ត៌មានថា នៅក្នុងលិខិតនេះ លោកស្ហ៊ីនហ្សូ អាបេ បានគូសបញ្ជាក់ថា ទំនាក់ទំនងចិន-ជប៉ុន គឺជាទំនាក់ទំនងទ្វេភាគីដ៏សំខាន់បំផុតមួយ ហើយលោកមានចេតនាចង់ឃើញប្រទេសទាំងពីរបង្កើនទំនាក់ទំនងជាដៃគូយុទ្ធសាស្រ្ត ដើម្បីផលប្រយោជន៍ទាំងសងខាង។
បេសកជនពិសេសរបស់លោកស្ហ៊ីនហ្សូ អាបេវិញ បានប្រាប់អ្នកសារព័ត៌មានថា លោកមានបំណងចង់ឈានមួយជំហានទៅរកចិន ដើម្បីបើកផ្លូវឆ្ពោះទៅការស្តារទំនាក់ទំនងរវាងចិន និងជប៉ុន ឲ្យវិលទៅរកប្រក្រតីភាពឡើងវិញ។ លោកយ៉ាម៉ាហ្គូឈីក៏បានរៀបរាប់ឲ្យដឹងផងដែរថា នៅក្នុងជំនួបនៅថ្ងៃសុក្រនេះ លោក និង លោកស៊ី ជីនពីង បានឯកភាពគ្នាថា ចិន និងជប៉ុនត្រូវតែបន្តការជជែកពិភាក្សាគ្នា ដើម្បីឈានទៅរកការបើកជំនួបកំពូលរវាងប្រមុខដឹកនាំនៃប្រទេសទាំងពីរ។
ចំពោះបញ្ហាជម្លោះដណ្តើមប្រជុំកោះវិញ លោកយ៉ាម៉ាហ្គូឈី បានអះអាងថា លោកមិនបានលើកយករឿងនេះមកជជែកជាមួយនឹងលោកស៊ី ជីនពីងនោះទេ ក៏ប៉ុន្តែ លោកមានសុទិដ្ឋិនិយមថា ជប៉ុននឹងអាចដោះស្រាយបញ្ហានេះជាមួយនឹងចិនបាន។
លោកស៊ី ជីនពីងវិញ នៅក្នុងជំនួបជាមួយបេសកជនជប៉ុននេះ បានទទូចឲ្យជប៉ុនសហការជាមួយចិន ដើម្បីស្វះស្វែងរកដំណោះស្រាយតាមរយៈការជជែកពិភាក្សាគ្នា ហើយថា ជប៉ុនចាំបាច់ត្រូវតែគិតគូរអំពីបរិបទប្រវត្តិសាស្រ្តរវាងប្រទេសទាំងពីរ និងអំពីអារម្មណ៍របស់ប្រជាជនចិន។ នេះបើយោងតាមសេចក្តីថ្លែងការណ៍របស់ក្រសួងការបរទេសចិន។
គួររំឭកឡើងវិញថា ជម្លោះជុំវិញប្រជុំកោះសេនកាគូ ឬទៀវយូ បានកើនឡើងខ្លាំង កាលពីខែកញ្ញាមុន ក្រោយពេលដែលរដ្ឋាភិបាលជប៉ុនបានប្រមូលទិញកូនកោះពីឯកជនមកដាក់ជាសម្បត្តិរដ្ឋ។ ជប៉ុនបានចាប់ផ្តើមចូលកាន់កាប់ប្រជុំកោះនេះ កាលពីឆ្នាំ១៨៩៥។ នៅក្រោយសង្រ្គាមលោកលើកទី២ ប្រជុំកោះសេនកាគូ ឬទៀវយូនេះ ត្រូវបានដាក់បញ្ចូលជាតំបន់ស្ថិតក្រោមការកាន់កាប់របស់កងទ័ពអាមេរិក។ អាមេរិកបានប្រគល់ប្រជុំកោះនេះទៅឲ្យជប៉ុនវិញ នៅឆ្នាំ១៩៧៥ ក៏ប៉ុន្តែ ចិន និងតៃវ៉ាន់ បានតវ៉ាជំទាស់ ដោយទាមទារថា ប្រជុំកោះនេះគឺជាកម្មសិទ្ធិរបស់ខ្លួន ដែលជប៉ុនដណ្តើមយកទៅកាន់កាប់។
ចិនបានដាក់សំណើមួយសុំឲ្យអ.ស.ប. ធ្វើការពិនិត្យ និងសម្រេច នៅក្នុងឆ្នាំ២០១៣នេះ អំពីការទាមទាររបស់ចិន។ ក៏ប៉ុន្តែ ជប៉ុនវិញមិនចង់ឲ្យអ.ស.ប.ចូលធ្វើអន្តរាគមន៍ នៅក្នុងជម្លោះនេះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ