ជំនួបរវាងរដ្ឋមន្ត្រីការពារជាតិអាមេរិកនិងអាស៊ី នៅព្រុយណេ
នៅថ្ងៃពុធនេះ នៅប្រទេសព្រុយណេ រដ្ឋមន្ត្រីការពារជាតិអាមេរិក លោក Chuck Hagel បានជួបពិភាក្សាជាមួយរដ្ឋមន្ត្រីការពារជាតិបណ្តាប្រទេសអាស៊ីនានា ដើម្បីធានាអោយកិច្ចការទូតអាមេរិកនៅគ្រប់ទីកន្លែង នៅអាស៊ី នៅតែដំណើរការបានយ៉ាងស្មើរលូន។ ក្នុងកិច្ចប្រជុំថ្ងៃនេះ ប្រមុខការពារជាតិអាមេរិក បានអំពាវនាវអោយបណ្តាប្រទេសអាស៊ីដែលជាប់ជម្លោះរឿងសមុទ្រចិនខាងត្បូងនោះ អោយធ្វើការអត់ធ្មត់ ហើយក៏បានរំលឹកឡើងវិញនូវយុទ្ធសាស្ត្ររបស់លោក អូបាម៉ា សំរាប់បណ្តាប្រទេសអាស៊ីប៉ាស៊ីហ្វិកផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៧
ក្នុងកិច្ចប្រជុំជាមួយប្រមុខការពារជាតិបណ្តាប្រទេសអាស៊ីនានា នៅព្រុយណេ នៅថ្ងៃពុធនេះ ប្រមុខការពារជាតិអាមេរិកបានរំលឹកដល់ប្រទេសដែលជាប់ជម្លោះនៅសមុទ្រចិនខាងត្បូង អោយមានការអត់ធ្មត់ ដើម្បីចៀសវាងការប៉ះទង្គិចគ្នា ជាយថាហេតុណាមួយ។
ទាក់ទងប្រធានបទការទូតអាមេរិក នៅតាមបណ្តាប្រទេសអាស៊ាន នៅថ្ងៃពុធនេះ លោក Chuck Hagel ជួបជាមួយប្រមុខការពារជាតិចិន ជប៉ុន កូរ៉េខាងត្បូង វៀតណាម ព្រុយណេ។ គួររំលឹកថា ចិនតែងតែរងការចោទប្រកាន់ថា បានផ្គើនបង្កភាពតានតឹងក្នុងតំបន់ជម្លោះ។ ទាក់ទងបញ្ហានេះ ក្រុងប៉េកាំងបានធានាខ្លួនថា នឹងជួបពិភាក្សាជាមួយបណ្តាប្រទេសអាស៊ាន នៅក្នុងឆ្នាំ២០១៣នេះ។
កិច្ចប្រជុំប្រមុខការពារជាតិអាមេរិក និងអាស៊ី នៅថ្ងៃនេះ គឺជាទិសដៅនៃទស្សនកិច្ចរយៈពេលមួយសប្តាហ៍របស់ប្រមុខការពារជាតិអាមេរិក នៅអាស៊ីអគ្នេយ៍។ ទិសដៅដែលចង់អោយកិច្ចការទូតអាមេរិក នៅអាស៊ី បានដំណើរការទៅដោយស្មើរលូន គ្រប់ទីកន្លែង។ ប៉ុន្តែ ស្ថានការនៅស៊ីរី នៅពេលនេះ ហាក់បានរាលដាលក្នុងខួរក្បាល លោក Chuck Hagel ច្រើនជាងស្ថានការអាស៊ី បើទោះជាអាស៊ីប៉ាស៊ីហ្វិកកំបុងមានសេដ្ឋកិច្ចនិងវិស័យយោធាចំរើនទៅមុខក្តី។ លោក Chuck Hagel បានប្រកាសម្សិលមិញថា ទ័ពអាមេរិកត្រៀមខ្លួនរួចហើយដើម្បីចុះទៅអន្តរាគមន៍នៅស៊ីរី រង់ចាំតែការចេញបញ្ជារបស់លោកអូបាម៉ាប៉ុណ្ណោះ។
ទោះយ៉ាងនេះក្តី ប្រមុខការពារជាតិអាមេរិក នៅតែមិនភ្លេចគូសបញ្ជាក់ពីជំហរក្រុងវ៉ាស៊ីនតោន ដែលនៅតែមានគំរោងពង្រាយនាវានិងកងទ័ពខ្លួន នៅទ្វីបអាស៊ី។ អាមេរិកបានស្នើខ្លួនចូលបណ្តុះបណ្តាលនិងផ្តល់ការហ្វឹកហ្វឺនដល់ប្រទេសនានា ដែលព្រួយបារម្ភខ្លាចសកម្មភាពយោធាប្រទេសចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ