អ.ស.ប.ទាមទារឲ្យទីក្រុងដាម៉ាសដកចេញរថក្រោះចាប់ពីពេលនេះទៅទល់ថ្ងៃទី១០មេសាឆ្នាំ២០១២
របបគ្រប់គ្រងផ្តាច់ការបាស្ហារអាល-អាស្សាដបានបង្កើនការវាយប្រហាររបស់ខ្លួនទៅលើក្រុមអ្នកបះបោរស៊ីរី នៅខណៈពេលដែលអង្គការសហប្រជាជាតិបានបញ្ជាក់ថា ទីក្រុងដាម៉ាសមានពេលវេលា ចាប់ពីពេលនេះទៅទល់ថ្ងៃទី១០មេសាឆ្នាំ២០១២ខាងមុខ សម្រាប់ធ្វើការដករថក្រោះចេញពីទីក្រុងនានា មុនការឈប់បាញ់គ្នាទាំងស្រុង៤៨ម៉ោងបន្ទាប់មក។ ក្រុមប្រឹក្សាសន្តិសុខបានប្រកាសថា បានត្រៀមលក្ខណៈជាស្រេចនឹងអនុញ្ញាតឲ្យបញ្ជូនអ្នកសង្កេតការណ៍របស់អ.ស.ប.ទៅប្រទេសស៊ីរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៥២
បើយោងតាមអ្នកការទូត នៅក្នុងក្រុមអ្នកសង្កេតការណ៍របស់អ.ស.ប.ដែលត្រូវបញ្ជូនទៅប្រទេសស៊ីរីមានអ្នកសង្កេតការណ៍ប្រមាណ២៥០នាក់ដែលមិនប្រដាប់អាវុធ ក៏ប៉ុន្តែពួកគេត្រូវឋិតនៅក្រោមកិច្ចការពាររបស់កងកម្លាំងស៊ីរី។ ហើយគេត្រូវការឲ្យមានជាមុនសិន សេចចក្តីសម្រេចចិត្តរបស់ក្រុមប្រឹក្សាសន្តិសុខនៃអ.ស.ប.អនុញ្ញាតឲ្យបញ្ជូនអ្នកសង្កេតការណ៍ទៅប្រទេសស៊ីរី ហើយនិងការទទួលយល់ព្រមពីសំណាក់ទីក្រុងដាម៉ាស។
រីឯគណៈប្រតិភូនៃអ.ស.ប.និងសម្ព័ន្ធអារ៉ាប់ឯណោះមានជំនួបពិភាក្សាជាមួយអាជ្ញាធរស៊ីរីនៅទីក្រុងដាម៉ាសនៅថ្ងៃព្រហស្បតិ៍ទី៥មេសាឆ្នាំ២០១២ម្សិលមិញ។ បេសកកម្មរបស់គេគឺធ្វើការទាមទារសម្រេចឲ្យបាននូវកិច្ចសន្យាយ៉ាងមុតមាំពីរដ្ឋាភិបាលស៊ីរីស្តីពីការឈប់បាញ់គ្នាដែលនឹងត្រូវចាប់ផ្តើមនៅថ្ងៃទី១០មេសាខាងមុខនេះ ដោយមានការចូលរួមពិនិត្យមើលដោយអ្នកសង្កេតការណ៍អន្តរជាតិនៅក្នុងប្រទេស។
គួរកត់សម្គាល់ថា ប្រធានាធិបតីស៊ីរីបាស្ហារអាល-អាស្សាដធ្លាប់បានទទួលយកថ្ងៃទី១០មេសាឆ្នាំ២០១២ដើម្បីឈប់បាញ់គ្នា ហើយនិងដកទ័ពទាំងអស់ចេញពីទីក្រុងដូចការទាមទាររបស់លោកកូហ្វីអាណាន។ គឺទាំងនេះហើយដែលលោកកូហ្វីអាណានទាមទារចង់បាននៅពេលនេះ។
ចំណែកឯបេសកជនពិសេសរបស់អ.ស.ប.និងសម្ព័ន្ធអារ៉ាប់ដែលមានគ្នា៥ឬ៦នាក់ ដែលក្នុងនោះមានអ្នកជំនាញការខាងយោធា និងខាងដឹកនាំពស្តុភារ ក្រោមការដឹកនាំរបស់លោកឧត្តមសេនីយសញ្ជាតិន័រវែសឈ្មោះ Robert mood បានជួបពិភាក្សាជាមួយអាជ្ញាធរស៊ីរីម្សិលមិញនៅទីក្រុងដាម៉ាស។
អ្នកជំនាញការទាំងនោះមានបេសកកម្មនឹងសិក្សាពិនិត្យមើលពីការរៀបចំឲ្យមានជាយថាហេតុនូវក្រុមអ្នកសង្កេតការណ៍សម្រាប់ត្រួតពិនិត្យទៅលើ “ការឈប់បាញ់គ្នា” បើប្រសិនជាមាន។
ទីក្រុងវ៉ាស៊ីនតោនឯណោះវិញ បានខិតខំជំរុញឲ្យទីក្រុងដាម៉ាសបិទបញ្ចប់ “ការសម្លាប់រង្គាល” ដ៏ឃោរឃៅទៅលើប្រជាជនរបស់ខ្លួន ហើយថែមទាំងគូសបញ្ជាក់ថា គ្មានបានឃើញមានសញ្ញាអ្វីបង្ហាញឲ្យឃើញថា របបគ្រប់គ្រងបាស្ហារអាល-អាស្សាដបានដកទ័ពស្របតាមផែនការរបស់លោកកូហ្វីអាណានសោះឡើយ។
សកម្មជនប្រឆាំងនឹងបាស្ហារអាល-អាស្សាដវិញ បានថ្លែងឲ្យដឹងថា “ការទម្លាក់គ្រាប់បែកនៅតែបន្តកើតមាននៅតំបន់ហ្សាបាដានី ហើយថ្វីដ្បិតតែរថក្រោះនៅមាន២០០គ្រឿងនៅតំបន់ហ្សាបាដានី ប៉ុន្តែ៤០គ្រឿងទៀតបានត្រូវទាហានរបស់បាស្ហារអាល-អាស្សាដដកយកទៅធ្វើការវាយប្រហារនៅទីកន្លែងដទៃផ្សេងទៀត។ ដូច្នេះ គ្មានអ្វីគួរឲ្យគេហៅថា “ជាការដកទ័ព” ឡើយ។
នៅថ្ងៃសុក្រនេះ សកម្មជនគាំទ្រលទ្ធិប្រជាធិបតេយ្យបានអំពាវនាវឲ្យប្រជាជនស៊ីរីនាំគ្នាចុះថ្នល់ធ្វើបាតុកម្មដើម្បីសម្តែងការប្រឆាំងទល់នឹងរបបផ្តាច់ការរបស់បាស្ហារអាល-អាស្សាដ ហើយនិងទាមទារឲ្យផ្តល់សព្វាវុធឲ្យក្រុមប្រឆាំងស៊ីរីដើម្បីផ្តួលរំលំរបបផ្តាច់ការ។ ហើយទោះបីជាមានការថ្កោលទោសពីសំណាក់អ.ស.ប.យ៉ាងណាក្តី ក៏របបគ្រប់គ្រងដាម៉ាសនៅតែបន្តសម្លាប់រង្គាលប្រជាជនខ្លួនឯង។ គ្រាន់តែនៅថ្ងៃព្រហស្បតិ៍ម្សិលមិញ ទាហានរបស់បាស្ហារអាល-អាស្សាដបានសម្លាប់មនុស្សអស់ប្រមាណ៧៧នាក់ ដែលក្នុងនោះមាន៤៥នាក់ជាជនស៊ីវិល។
មូលហេតុដែលនាំឲ្យរបបគ្រប់គ្រងផ្តាច់ការបាស្ហារអាល-អាស្សាដយល់ព្រមទទួលយកផែនការស្នើដោយលោកកូហ្វីអាណានយ៉ាងដូច្នេះ គឺមកពីរដ្ឋាភិបាលស៊ីរីចង់ធ្វើការអូសបន្លាយ ទាញយកចំណេញពេលវេលា។ ដូច្នេះហើយ បានជារដ្ឋាភិបាលស៊ីរីថ្លែងប្រាប់ឲ្យដឹងថា ទីក្រុងដាម៉ាសនឹងអនុវត្តតាមផែនការរបស់លោកអាណាន លុះត្រាតែក្រុមអ្នកប្រឆាំងឈប់ធ្វើការវាយប្រហារមកលើយោធារបស់ស៊ីរីជាមុនសិន។ រីឯក្រុមអ្នកប្រឆាំងស៊ីរីវិញបានថ្លែងតបថា ពួកគេនឹងដាក់អាវុធចុះ លុះត្រាតែទាហានរបស់បាស្ហាអាល-អាស្សាដដកខ្លួនចេញជាមុនសិនដែរ។
ដូច្នេះ ឃើញថាគេឋិតនៅក្នុងសភាពគាំងស្ទះទាល់ច្រក។
ប្រទេសរុស្ស៊ី ដែលជាសម្ព័ន្ធមិត្តរបស់ប្រទេសស៊ីរី ហើយដែលបានគាំទ្ររបបគ្រប់គ្រងរបស់បាស្ហារអាល-អាស្សាដតាំងពីមានការផ្ទុះងើបបះបោរប្រឆាំងនឹងបាស្ហារអាល-អាស្សាដតាំងពីខែមីនាឆ្នាំ២០១១មក បានព្រមានប្រាប់ប្រទេសលោកខាងលិចថា ទីក្រុងម៉ូស្គូប្រឆាំងជានិច្ចទល់នឹង “កាគំរាមនិងការដាក់ឧសានវាទ” ទៅលើទីក្រុងដាម៉ាស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ