ម៉ូស្គូលម្អិតអំពីគោលជំហរខ្លួនចំពោះប្រទេសស៊ីរី
គឺរសៀលម្សិលមិញដែលលោករដ្ឋមន្ត្រីការបរទេសរុស្ស៊ី Serguei Lavrov បានថ្លែងយ៉ាងល្អិតល្អន់អំពីសាច់រឿងស៊ីរី ដោយឆ្លើយតបនឹងសំណួរពួកអ្នកកាសែតនាសន្និសីទសារពត៌មាននៅទីក្រុងErevan បន្ទាប់ពីគាត់បានជួបចរចាជាមួយសមភាគីArmenie។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
ជាបឋមលោករដ្ឋមន្ត្រីការបរទេស Serguei Lavrov លើកឡើងថា ប្រទេសរុស្ស៊ីរបស់គាត់ប្រាថ្នាក្លាយជាមិត្តរបស់ប្រជាជនស៊ីរីទាំងមូល មិនមែនគ្រាន់តែជាមិត្តនៃភាគមួយរបស់ប្រជាជននេះដូចគោលជំហរកំពុងប្រកាន់យកដោយបស្ចិមលោក និងបណ្តាប្រទេស នៃ “សម្ព័ន្ធអារ៉ាប” ឡើយ។
ក្នុងន័យនេះ លោកប្រមុខការទូតរុស្ស៊ី បានឲ្យដឹងថា ប៉ុន្មានថ្ងៃខាងមុខ នឹងមានគណៈប្រតិភូ២ទៀត នៃភាគីប្រឆាំងនៅស៊ីរី ធ្វើដំណើរមកកាន់ក្រុងម៉ូស្គូដើម្បីជួបជាមួយអ្នកមុខអ្នកការរុស្ស៊ី ស្វែងរកដំណោះស្រាយឲ្យអធិករណ៍នៅស៊ីរី។ តាមលោក Lavrov ម៉ូស្គូតែងមានទំនាក់ទំនងជាប់ជានិច្ចទាំងជាមួយ“ក្រុមប្រឹក្សាជាតិស៊ីរី” ទាំងជាមួយ”គណៈកម្មាធិការសម្របសម្រួលជាតិ” ដែលដំណើរការក្នុងឋានៈជាភាគីប្រឆាំងផ្ទៃក្នុងប្រទេសស៊ីរីផ្ទាល់ ទាំងជាមួយពួកប្រឆាំងផ្សេងទៀត ដែលរស់នៅក្នុងប្រទេសស៊ីរី ក៏ដូចជានៅក្រៅប្រទេសនេះ។
អ្នកការទូតកំពូលរបស់រុស្ស៊ី ក៏ចង្អុលឲ្យឃើញថា ទីក្រុងម៉ូស្គូ បន្តធ្វើការងារឥតអាក់ខានមួយថ្ងៃណាឡើយ ជាមួយរដ្ឋាភិបាលស៊ីរី ដើម្បីជំរុញរដ្ឋាភិបាលនេះ ឲ្យឈានជំហានកាន់តែសកម្ម កាន់តែដិតដល់ឡើងតបនឹងសំណើរបស់ លោក Kofi Annan បេសកជនពិសេសរបស់ អ.ស.ប. និង “សម្ព័ន្ធអារ៉ាប” ខាងរកច្រកចេញពីស្ថានការណ៍វិបត្តិនៅស៊ីរីដោយសន្តិវិធី។
លោក Lavrov កត់សម្គាល់ថា គឺនៅលើផ្លូវនេះដែលទីក្រុងដាម៉ាស ទើបសន្យាដករថក្រោះខ្លួន ចេញពីទីក្រុងស៊ីរីនានាឲ្យបានមុនថ្ងៃទី១០មេសាខាងមុខ។ ដូច្នេះ ទាំងក្រុមប្រដាប់អាវុធផង ទាំងឡាយ ដែលបង្កប់ខ្លួនច្បាំងនៅតាមក្រុងទាំងនោះទល់នឹងកងកម្លាំងរដ្ឋាភិបាលស៊ីរី ក៏ត្រូវដកចេញទៅដែរ ដ្បិតដោយមកពីដៃពួកគេ បណ្តាជនស្លូតត្រង់ស៊ីរីក៏ធ្លាក់ខ្លួនស្លាប់ដែរ។ លុះណាតែក្នុងករណីនេះ ទើបអាចបង្កលក្ខណៈសម្រាប់ការឈប់បាញ់គ្នា ហើយបើកលទ្ធភាពឲ្យដឹកជំនួយមនុស្សធម៌ទៅផ្គត់ផ្គង់ដល់បណ្តាជនរងគ្រោះ។
តាមសំដីលោក Lavrov ការខំប្រឹងប្រែងរបស់ម៉ូស្គូ ដើម្បីជំនះលើវិបត្តិនៅស៊ីរី គឺស្វិតស្វាញ មិនអន់ជាងធ្វើដោយពួកដៃគូរុស្ស៊ី នៅឯបស្ចិមលោកនិង”សម្ព័ន្ធអារ៉ាប”ឡើយ។
លោករដ្ឋមន្ត្រីការបរទេសរុស្ស៊ី សង្កត់ធ្ងន់ថា បំណងនៃក្រុមប្រទេស ដែលលើកខ្លួនឯងជា ”មិត្តរបស់ស៊ីរី” ចង់ផ្តល់អាវុធត្រង់ៗ ដល់ពួកប្រឆាំងប្រដាប់អាវុធនៅស៊ីរី គឺវាបញ្ច្រាសនឹងផែនការខាងរកដំណោះស្រាយដោយសន្តិវិធីឲ្យស្ថានការណ៍ដ៏សែនស្មុគស្មាញនៅស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ