អេហ្ស៊ីបបណ្តេញឯកអគ្គរដ្ឋទូតតួកគីពីទឹកដីខ្លួន តួកគីសន្យាចាត់វិធានការសងសឹកដូចគ្នា
នៅថ្ងៃសៅរ៍នេះ រដ្ឋាភិបាលអេហ្ស៊ីបបានសំរេចបណ្តេញឯកអគ្គរដ្ឋទូតតួកគីចេញពីទឹកដីរបស់ខ្លួន ហើយក៏បានប្រកាសបន្ថយតំណាងទូតរបស់ខ្លួន នៅតួកគីផងដែរ។ តួកគីបានប្រតិកម្មតបទៅវិញថា ខ្លួននឹងចាត់វិធានការដូចគ្នាតបទៅនឹងអេហ្ស៊ីបវិញដែរ។ ទំនាក់ទំនងរវាងអេហ្ស៊ីបនិងតួកគីបានចាប់តានតឹងនឹងគ្នា ចាប់ពីពេលដែលកងទ័ពអេហ្ស៊ីបបានទំលាក់អតីតប្រធានាធិបតី មរស៊ី ពីតំណែង កាលពីដើមខែកក្កដា។ តួកគីមិនពេញចិត្តនឹងរដ្ឋាភិបាលយោធាស្តីទីថ្មីរបស់អេហ្ស៊ីបនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
នៅថ្ងៃសៅរ៍នេះ លោក ហ៊ូសេយីន អាវនី បុតសាលី Huseyin Avni Botsali ឯកអគ្គរដ្ឋទូតតួកគីប្រចាំក្រុងគែរ ប្រទេសអេហ្ស៊ីប ត្រូវបានរដ្ឋាភិបាលអេហ្ស៊ីបបណ្តេញ ចេញពីទឹកដីរបស់ខ្លួន។ រដ្ឋាភិបាលស្តីទីអេហ្ស៊ីបក៏បានចាត់វិធានការបន្ថយតំណាងទូតរបស់ខ្លួន នៅក្រុងអាការ៉ា ប្រទេសតួកគីផងដែរ។ អេហ្ស៊ីបប្រាប់ថា លោក អាប់ដេរ៉ាម៉ាន់ សាឡា អេលឌីន Abderahman Salah Eldin ឯកអគ្គទូតអេហ្ស៊ីបនៅតួកគីនោះ នឹងមិនត្រលប់ទៅបំពេញការងារខ្លួននៅតួកគីទៀតទេ។
រដ្ឋាភិបាលតួកគីបានប្រតិកម្មតបវិញថា ខ្លួននឹងចាត់វិធានការដូចគ្នាតបទៅនឹងរដ្ឋាភិបាលអេហ្ស៊ីបវិញជាមិនខាន។ គួររំលឹកថា សកម្មភាពរបស់កងទ័ពអេហ្ស៊ីបក្នុងការទំលាក់អតីតប្រធានាធិបតី ម៉ូហាមេដ មរស៊ី ពីតំណែង កាលពីដើមខែកក្កដាកន្លងទៅនោះ ត្រូវបាននាយករដ្ឋមន្ត្រីតួកគី គឺលោក រេសិប តៃយីព អ៊ែរដូហ្កាន Recep Tayip Erdogan ចាត់ទុកថា ជារដ្ឋប្រហារសុទ្ធសាធ។
នាយករដ្ឋមន្ត្រីតួកគីដែលជិតដិតទៅនឹងក្រុមភាតរអ៊ីស្លាមរបស់អតីតប្រធានាធិបតីមរស៊ីនោះ ថែមទាំងបានបរិហាររិះគន់ សកម្មភាពកងទ័ពអេហ្ស៊ីប ដែលបានប្រើហិង្សាបង្ក្រាបក្រុមបាតុករ ធ្វើអោយមនុស្សជាងមួយពាន់នាក់ស្លាប់ និងរាប់ពាន់នាក់ទៀតត្រូវចាប់ខ្លួន។ កាលពីថ្ងៃព្រហស្បតិ៍កន្លងទៅ លោកអ៊ែរដូហ្កានបានលើកឡើងថា លោកមិនគោរពបណ្តាជនដែលបាននាំខ្លួនលោកមរស៊ីទៅកាន់តុលាការនោះទេ។ នាយករដ្ឋមន្ត្រីតួកគីចង់សំដៅពីតុលាការដែលបានកាត់ក្តីរូបលោកមរស៊ី ពីបទញុះញង់អោយមានអំពើឃាតកម្ម ក្នុងបាតុកម្មខែធ្នូឆ្នាំ២០១២ កន្លងមក នៅអេហ្ស៊ីប។
រដ្ឋាភិបាលស្តីទីអេហ្ស៊ីបបានចាត់ទុកទង្វើរបស់រដ្ឋាភិបាលតួកគីថា ជាការលូកលាន់ចូលក្នុងកិច្ចការផ្ទៃក្នុងរបស់ខ្លួន ហើយបានសំរេចបណ្តេញចេញឯកអគ្គរដ្ឋទូតតួកគីពីទឹកដីអេហ្ស៊ីប។
អេហ្ស៊ីបថែមទាំងចោទតួកគីទៀតថា បានគាំទ្របណ្តាក្រុមដែលចង់បង្កអស្ថិរភាពនៅអេហ្ស៊ីប។ រដ្ឋាភិបាលអេហ្ស៊ីបចង់សំដៅថា តួកគីគាំទ្រក្រុមភាតរអ៊ីស្លាមរបស់អតីតប្រធានាធិបតីមរស៊ីនោះឯង។ អេហ្ស៊ីបក៏បានបន្ទោសតួកគីផងដែរថា បានថ្លែងការណ៍ធ្វើអោយសហគមន៍អន្តរជាតិប្រឆាំងនឹងប្រយោជន៍របស់អេហ្ស៊ីប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ