មហាអំណាចនុយក្លេអ៊ែរអាស៊ីឡើងកម្តៅដាក់គ្នានៅCachemire
សម្ពាធតឹងតឹងអាចនឹងធ្វើឱ្យមានការឆេះរោលជាថ្មីរវាង ឥណ្ឌា និងប៉ាគីស្ថាន ! នៅព្រឹកថ្ងៃអាទិត្យទី ៦មករា ឆ្នាំ២០១២ ទាហានប៉ាគីស្ថានម្នាក់ បានស្លាប់ និងម្នាក់រងរបួស នៅក្នុងការបាញ់រះជាមួយនឹងយោធាឥណ្ឌា នៅតាមបណ្តោយព្រំដែនCachemire ទីដែលការប៉ះទង្គិចដោយអាវុធ តែងកើតឡើងជានឹងញាប់ គិតចាប់តាំងឆ្នាំ១៩៧២មក។ គឺយោធាប៉ាគីស្ថានជាអ្នកចេញសេចក្តីថ្លែងការណ៍មុន ដោយគូសបញ្ជាក់ថាឥណ្ឌាជាអ្នកវាយប្រហារមុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
បើតាមប្រភពក្រុងអ៊ីស្លាម៉ាបាដ ទាហានឥណ្ឌាជាអ្នកបើកយុទ្ធនាការបាញ់រះមុន មកលើទីតាំងយោធាប៉ាគីស្ថាន ត្រង់ចំណុច Sawan Patra នៃតំបន់Cachemire ដែលប្រទេសទាំងពីរឈ្លោះដណ្តើមគ្នា។ យោធាប៉ាគីស្ថានបានចេញសេចក្តីថ្លែងការណ៍លម្អិត ភ្លាមមួយរំពេចថា បានតបត និងរុញច្រានការវាយប្រហាររបស់ទាហានឥណ្ឌា ដោយមានការបាញ់គ្នាទៅវិញមក ឆ្លងកាត់លើគំនូសខ្សែព្រំដែន។ គំនូសដែលកាលពីឆ្នាំ១៩៧២ ឥណ្ឌា និងប៉ាគីស្ថាន បានព្រមព្រៀងគ្នាគូសខ័ណ្ឌចែកប្រទេសទាំងពីរ តែបានដាក់ពង្រាយទាហានរៀងៗខ្លួនយាមបណ្តោយព្រំដែននេះ។
ប៉ុន្តែខាងភាគីឥណ្ឌាបានបដិសេធការចោទប្រកាន់នេះ។ អ្នកនាំពាក្យយោធាឥណ្ឌា បានបកស្រាយថាមិនបានឆ្លងគំនូសព្រំដែនទេ។ តែមានការរំលោភបទឈប់បាញ់ពីសំណាក់ប៉ាគីស្ថាន ទើបក្រុមយោធាឥណ្ឌាបើកការបាញ់រះឡើង។
សូមបញ្ជាក់ថា តាំងពីបានឯករាជ្យនៅឆ្នាំ១៩៤៧មក ប្រទេសមហាអំណាចនុយក្លេអ៊ែរទាំងពីរ ឥណ្ឌា និងបាគីស្ថាននេះ ធ្លាប់ធ្វើសង្គ្រាមនឹងគ្នាបីដង។ ក្រោយពីស្ថានភាពបានស្ងប់ស្ងាត់មួយរយៈធំ ទំនាក់ទំនងប្រទេសទាំងពីរបានធ្លាក់ចុះដុនដាបជាថ្មី នៅឆ្នាំ២០០៨ ដោយហេតុមានអំពើភេរវកម្មនៅទីក្រុងប៊ុមបេ ផ្តាច់ជីវិតមនុស្សអស់១៦៦នាក់ ដែលឥណ្ឌាចោទប្រកាន់ថាប៉ាគីស្ថានជាអ្នកការពារមេកើយភេរវនិយម។
ភាពតានតឹងរវាងប្រទេសទាំងពីរ ជះឥទ្ធិពលរីករាលដល់អាហ្វហ្កានិស្ថាន។ ឥណ្ឌាតែងផ្តល់ជំនួយយោធា និងសេដ្ឋកិច្ចដល់អាហ្វហ្កានិស្ថាន។ ឯប៉ាគីស្ថានមិនអាចធ្វើសកម្មភាពប្រឆាំងនឹងពួកអាល់កៃដា បានពេញទំហឹងដូចសំណើអាមេរិក ដោយយកលេសថាគ្មានកម្លាំងគ្រប់ ព្រោះមួយភាគត្រូវទៅប្រចាំការតាមព្រំដែនជាប់ឥណ្ឌា។
ទោះជាយ៉ាងណាក៏ដោយ ក៏ថ្នាក់ដឹកនាំប្រទេសទាំងពីរតែងខិតសម្រួលទំនាក់ទំនងឱ្យប្រសើរឡើងវិញ។ កាលពីខែមុន អ៊ីស្លាម៉ាបាដ និង ញូដេលី បានចុះហត្ថលេខាលើកិច្ចព្រមព្រៀងលើផ្នែកទិដ្ឋាការ ដើម្បីសម្រួលដល់ការធ្វើដំណើររបស់ប្រជាពលរដ្ឋទាំងពីរប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ