ទ័ពអាកាសអ៊ីស្រាអែលវាយឆ្មក់លើស៊ីរី ?
ទូរទស្សន៍អាមេរិក CNN បានលើកឡើងអំពី ឈ្មោះអ្នកទទួលខុសត្រូវក្នុងរដ្ឋបាលអាមេរិក ពីរនាក់ និងបានបញ្ជាក់ព័ត៌មានថា យន្តហោះយោធាអ៊ីស្រាអែល ទំនងជាបានវាយប្រហារលើប្រទេសស៊ីរី នៅរវាងថ្ងៃព្រហស្បតិ៍ និងថ្ងៃសុក្រម្សិលមិញនេះ តែមិនឈ្លានពានចូលក្នុងដែនអាកាសស៊ីរីទេ។ អាជ្ញាធរអ៊ីស្រាអែល ធ្លាប់បានព្រមានជាច្រើនសប្តាហ៍មកហើយ ថាមិនអនុគ្រោះដល់ការផ្ទេរអាវុធទៅឱ្យក្រុមហេស្បូឡា ឬក្រុមប្រដាប់អាវុធណាឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
ការវាយប្រហារតាមផ្លូវអាកាសនេះទំនងជាប្រព្រឹត្តទៅ នៅរវាងថ្ងៃព្រហស្បតិ៍និងថ្ងៃសុក្រ បើយោងតាមប្រភពពីរផ្សេងគ្នា ដែលទូរទស្សន៍អាមេរិកទទួលបាន។ យន្តហោះចម្បាំងអ៊ីស្រាអែល បានប្រើដែនអាកាសលីបង់ ដើម្បីធ្វើការវាយឆ្មក់ ដោយមិនបានឆ្លងចូលក្នុងដែនអាកាសស៊ីរីទេ។
ប៉ុន្តែទាំងក្រសួងការពារជាតិ និងទាំងក្រុងយោធាអ៊ីស្រាអែល សុទ្ធតែមិនព្រមធ្វើអត្ថាធិប្បាយអ្វីទាំងអស់ទាក់ទងនឹងសំណុំរឿងនេះ។ សហរដ្ឋអាមេរិកវិញបានទម្លាក់ការទទួលខុសត្រូវទាំងអស់ទៅលើអាជ្ញាធរអ៊ីស្រាអែល។ ចំណែកខាងភាគីស៊ីរីវិញ ឯកអគ្គរដ្ឋទូតស៊ីរីប្រចាំអង្គការសហប្រជាជាតិ បានប្រកាសគ្មានទទួលដំណឹងអ្វីលើប្រធានបទនេះទេ។
ទូរទស្សន៍CNN និង NBC ដែលមានការប្រុងប្រយ័ត្នខ្លាំង បានទទួលព័ត៌មានពីអ្នកទទួលខុសត្រូវជាន់ខ្ពស់អាមេរិក ពីរនាក់ ៖ "អ៊ីស្រាអែលបានថែមទាំងទទួលស្គាល់នៅ យប់មិញ ថាបានបាញ់ឆ្មក់តាមផ្លូវអាកាស លើ ស៊ីរី” តែមិនប្រាកដថាបាញ់សំដៅទិសលើឃ្លាំងស្តុកអាវុធគីមីទេ។ ចំណុចដៅសំខាន់បំផុតរបស់អ៊ីស្រាអែល ទំនងជាកន្លែងដាក់ប្រព័ន្ធបាញ់អាវុធគីមី។
អ៊ីស្រាអែល ធ្លាប់បានព្រមានជាញឹកញយ ថាមិនអនុគ្រោះដល់ស៊ីរីឡើយ ប្រសិនបើហ៊ានបញ្ជូនអាវុធទៅពួកហេស្បូឡានៅលីបង់ មិនថាជាអាវុធគីមី ឬជាអាវុធប្រភេទអ្វីទេ។ អ្នកនាំពាក្យស្ថានទូតអ៊ីស្រាអែលប្រចាំទីក្រុងវ៉ាស៊ីនតោន ដែលបដិសេធមិនបញ្ចេញប្រតិកម្មអ្វីជុំវិញការបាញ់ឆ្មក់នេះ ក៏បានបញ្ជាក់បន្ថែមថា អ៊ីស្រាអែលបានសម្រេចចិត្តរារាំង របបដឹកនាំស៊ីរី មិនឱ្យនាំអាវុធគីមី ឬ អាវុធប្រភេទផ្សេងទៀត ទៅឱ្យក្រុមភេរវនិយម ឬក្រុមហេស្បូឡា (Hezbollah) នៅ លីបង់។ កាលពីចុងខែមករា២០១៣ អ៊ីស្រាអែលធ្លាប់បានទទួលស្គាល់ពាក់កណ្តាលថាបានវាយប្រហារតាមផ្លូវអាកាសលើមូលដ្ឋានយោធាស៊ីរីម្តងហើយ។ ចំណែកលោកប្រធានាធិបតីអាមេរិក បារ៉ាក់ អូបាម៉ា បានបញ្ជាក់ជាថ្មី នៅល្ងាចមិញថា គ្មានគម្រោងបញ្ជូនទាហានអាមេរិកទៅក្នុងទឹកដីស៊ីរីទេ ទោះបីជាមានភស្តុតាងបញ្ជាក់ថារបបលោក បាស្ហារ អាល់អាសាទ ប្រើប្រាស់អាវុធគីមី ក្នុងឃ្លាំងបំរុងក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ