វិបត្តិនៅសាលាក្តីខ្មែរក្រហមនៅតែបន្តអូសបន្លាយគ្មានច្រកចេញ
វិបត្តិថវិកានិងបញ្ហាសុខភាពជនជាប់ចោទ នៅតែបន្តយាយីសាលាក្តីខ្មែរក្រហមដដែល រហូតមកដល់ចុងសប្តាហ៍នេះ។ សវនាការសំណុំរឿង០០២ ត្រូវបានផ្អាកជាថ្មីម្តងទៀត ដោយសារតែជនជាប់ចោទ នួន ជា វិលចូលមន្ទីរពេទ្យវិញ ចំណែកឯបញ្ហាថវិកានៅតែមិនអាចដោះស្រាយបាន។ បុគ្គលិកនិងមន្ត្រីតុលាការភាគីកម្ពុជាដែលមិនបានបើកប្រាក់ខែ តាំងពីខែធ្នូឆ្នាំ២០១២មកនោះ នៅតែបន្តរង់ចាំទាំងមួហ្មងនិងអស់សង្ឃឹម ពីព្រោះគ្មានដំណឹងអ្វីសោះពីម្ចាស់ជំនួយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤១
សវនាការសំណុំរឿង ០០២ នៃសាលាក្តីខ្មែរក្រហមត្រូវបានផ្អាកជាថ្មីម្តងទៀត ចាប់តាំងពីថ្ងៃសុក្រមក ដោយសារតែបញ្ហាសុខភាពរបស់ជនជាប់ចោទ។ លោក នួន ជា អតីតបងធំទី២ នៃរបបខ្មែរក្រហមដែលជាជនជាប់ចោទដ៏សំខាន់ម្នាក់ ត្រូវបានគេដឹកចូលមន្ទីរពេទ្យវិញហើយ នៅចុងសប្តាហ៍នេះបន្ទាប់ពីលោកមានសភាពហេវហត់ ចុះខ្សោយកម្លាំងយ៉ាងខ្លាំង។
អវត្តមានរបស់ នួន ជា បានធ្វើឲ្យសវនាការផ្អាកដំណើរការជាថ្មីម្តងទៀត។ នេះបើយោងតាមលោក នេត្រ ភក្ត្រា អ្នកនាំពាក្យសាលាក្តីខ្មែរក្រហម ដែលបានប្រាប់វិទ្យុបារាំងអន្តរជាតិនៅថ្ងៃ នេះ។ ទន្ទឹមនឹងការផ្អាកសវនាការជាថ្មី វិបត្តិថវិកាដែលជាបញ្ហាធ្ងន់ធ្ងរមួយទៀតរបស់សាលាក្តី នៅតែគ្មានដំណោះស្រាយដដែល។ រហូតមកទល់ពេលនេះ បុគ្គលិក និងមន្ត្រីភាគីកម្ពុជាជិត ៣០០ នាក់មិនបានទទួលប្រាក់ខែ ឈានដល់ខែទី៣ហើយ។ ទោះជាយ៉ាងនេះក៏ដោយ ក៏គ្មានប្រទេសម្ចាស់ជំនួយណាមួយ បានសន្យាគាំទ្រថវិកាដល់ភាគីកម្ពុជាសម្រាប់ឆ្នាំ ២០១៣ នៅឡើយទេ។
ក្នុងឱកាសបំពេញទស្សនកិច្ចនៅសាលាក្តីខ្មែរក្រហម កាលពីថ្ងៃទី៤ កុម្ភៈ នាយករដ្ឋមន្ត្រីបារាំង Jean-Marc Ayrault បានបញ្ជាក់ថា ប្រទេសបារាំងនៅតែបន្តជួយឧបត្ថម្ភសាលាក្តីខ្មែរក្រហម ក្នុងកម្រិត៥ សែនអឺរ៉ូសម្រាប់ឆ្នាំ ២០១៣នេះដូចមុនដែរ ប៉ុន្តែជំនួយនេះគឺសម្រាប់ទ្រទ្រង់ភាគីអន្តរជាតិតែប៉ុណ្ណោះ គឺគ្មានថវិកាសម្រាប់ភាគីកម្ពុជាទេ។ បើយោងតាមមន្ត្រីអ្នកនាំពាក្យសាលាក្តីខ្មែរក្រហម ភាគីកម្ពុជានៅខ្វះថវិកាទាំងស្រុងសម្រាប់បើកប្រាក់ខែឲ្យបុគ្គលិកនិងមន្ត្រីជនជាតិខ្មែរ ក្នុងឆ្នាំ ២០១៣នេះ។
ទន្ទឹមនឹងវិបត្តិថវិកាដ៏ធ្ងន់ធ្ងរនេះ សវនាការសំណុំរឿង ០០២ ដែលជាសំណុំរឿងសំខាន់ជាងគេរបស់សាលាក្តីខ្មែរក្រហម ត្រូវបានផ្អាកជាញឹកញាប់ដោយសារតែបញ្ហាសុខភាពរបស់ជនជាប់ចោទ។ រហូតមកទល់ពេលនេះជនជាប់ចោទក្នុងសំណុំរឿង ០០២ នៅសល់តែ៣នាក់ប៉ុណ្ណោះ បន្ទាប់ពីលោកស្រី អៀង ធីរិទ្ធិ អតីតរដ្ឋមន្ត្រីសង្គមកិច្ចខ្មែរក្រហមត្រូវបានដោះលែង ឲ្យមានសេរីភាពវិញ ដោយសារជំងឺបាត់ការចងចាំ។ ជនជាប់ចោទទាំងបីចុងក្រោយ មាន អៀង សារី អតីតរដ្ឋមន្ត្រីការបរទេសខ្មែរក្រហម អាយុ ៨៧ឆ្នាំ, នួន ជា អតីតប្រធានសភា អាយុ ៨៦ឆ្នាំ និង ខៀវ សំផន អតីតប្រមុខរដ្ឋកម្ពុជាប្រជាធិបតេយ្យ អាយុ ៨២ឆ្នាំ។
ជនជាប់ចោទដែលមានវ័យចាស់ជរាយ៉ាងខ្លាំងទៅហើយនោះកំពុងធ្លាក់ខ្លួនឈឺជាបន្តបន្ទាប់ និងចូលសម្រាកក្នុងមន្ទីរពេទ្យជាញឹកញាប់។ សវនាការនឹងបន្តផ្អាករហូតដល់ថ្ងៃទី១៨ កុម្ភៈខាងមុខ ទើបបើកដំណើរការឡើងវិញ ប្រសិនបើសុខភាពរបស់ នួន ជា បានធូរស្បើយនិងអាចចេញពីមន្ទីរពេទ្យវិញដូចការគ្រោងទុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ