បុគ្គលិកជាតិនៅតុលាការខ្មែរក្រហម ដាក់ឱសានវាទត្រឹមដំណាច់ខែមករា ពីរឿងប្រាក់ខែ
នៅថ្ងៃពុធ ទី២៣មករានេះ បុគ្គលិកជាតិ ដែលបម្រើការនៅអង្គជំនុំជម្រះសាលាដំបូង របស់តុលាការខ្មែរក្រហម បានសរសេរលិខិតមួយច្បាប់ ដាក់ទៅកាន់ផ្នែករដ្ឋបាល ដើម្បីសួរនាំអំពីប្រាក់ខែ សម្រាប់ខែធ្នូ។ បុគ្គលិកជាតិ ដែលជាជំនួយការរបស់ចៅក្រម ដែលកំពុងដំណើរការកាត់ទោសលើសំណុំរឿង០០២ ក៏បានព្រមានថា ពួកគេនឹងធ្វើការរហូតដល់បំណាច់ខែមករានេះ ហើយបើនៅតែមិនមានប្រាក់ខែតទៅទៀត ពួកគេនឹងលាឈប់ពីការងារ។
ចុះផ្សាយនៅថ្ងៃ៖
ស្តាប់ - ០២:២៣
សាលាក្តីខ្មែរក្រហម កំពុងប្រឈមនឹងវិបត្តិថវិកា។ បុគ្គលិកជាតិជាងពាក់កណ្តាល ក្នុងចំណោមបុគ្គលិកសរុប ២៩២ នាក់ បានសរសេរលិខិតទៅកាន់ការិយាល័យរដ្ឋបាលសាលាក្តី ជាបន្តបន្ទាប់ ដើម្បីសួរនាំពីប្រាក់ខែ ពិសេសប្រាក់ខែ នៅខែធ្នូ។
នៅថ្ងៃពុធនេះ បុគ្គលិកជាតិទាំងអស់ នៅអង្គជំនុំជម្រះសាលាដំបូង បានសរសេរលិខិត សួរនាំពីការយឺតយ៉ាវអំពីការបើកប្រាក់ខែ ដោយលើកឡើងថា ក្នុងគោលដៅបង្កាមិនឲ្យរាំងស្ទះភ្លាមៗដល់ដំណើរការក្តី លើសំណុំរឿង០០២/១ ដែលកំពុងតែប្រព្រឹត្តទៅយ៉ាងល្អ និងរលូន គឺ បុគ្គលិកជាតិទាំងអស់ នៅអង្គជំនុំជម្រះសាលាដំបូង ដែលជាជំនួយការប្រចាំថ្ងៃរបស់ប្រធាន និងចៅក្រមជាតិ នឹងបន្តបំពេញការងារមួយរយៈពេលសិន រហូតដល់ចុងខែមករា ឆ្នាំ២០១៣។ នេះបើតាមអ្នកនាំពាក្យសាលាក្តី លោក នេត្រ ភក្ត្រា។
លោក នេត្រ ភក្ត្រា បានបន្ថែមថា បុគ្គលិកជាតិទាំងនោះ ក៏បានលើកឡើងថា បើសិនជានៅក្នុងករណីដែលគ្មានព័ត៌មាន ឬមួយក៏ប្រភព ដែលអាចជឿជាក់បានណាមួយថា ប្រាក់ខែរបស់គាត់ នឹងត្រូវទូទាត់ និងបើកឡើងវិញ ក្នុងរយៈពេលមួយសមស្រប នៅពេលខាងមុខទេ គឺមន្ត្រីជាតិ នៃអង្គជំនុំជម្រះសាលាដំបូង នឹងពិចារណាលទ្ធភាព នៃការធ្វើពហិការ មិនបំពេញការងារ ឬក៏ប្រកាន់យកវិធានការចាំបាច់ណាមួយ ដើម្បីដោះស្រាយជីវភាពផ្ទាល់ខ្លួន។
តាមអ្នកនាំពាក្យ ក្នុងរយៈពេលប៉ុន្មានថ្ងៃនេះ បុគ្គលិកជាតិនៅតុលាការខ្មែរក្រហម ផ្នែកគ្រប់គ្រងតុលាការ ផ្នែកបកប្រែ និងនៅផ្នែកអង្គជំនុំជម្រះតុលាការកំពូល ក៏បានសរសេរលិខិតសួរនាំពីរឿងប្រាក់ខែផងដែរ។
លោក នេត្រ ភក្ត្រា បានកត់សម្គាល់ថា បើសិនជាបញ្ហានេះ នៅពេលពន្យារពេល មិនទាន់មានដំណឹងឲ្យបានមុនថ្ងៃទី៣១មករាទេ នោះបុគ្គលិកជាតិ នឹងឈប់ធ្វើការ ដែលនឹងធ្វើឲ្យប៉ះពាល់ដល់ដំណើរការជំនុំជម្រះក្តី ដែលនឹងក្លាយជាឧបសគ្គមួយ នៅក្នុងដំណើរការស្វែងរកយុត្តិធម៌ សម្រាប់ប្រជាជនកម្ពុជា។
យ៉ាងណាក៏ដោយ លោក នេត្រ ភក្ត្រា សង្ឃឹមថា ប្រទេសម្ចាស់ជំនួយ នឹងពិចារណាលើបញ្ហាប្រឈមផ្នែកថវិការបស់តុលាការខ្មែរក្រហម នាពេលនេះ ហើយនឹងអនុម័តលើកញ្ចប់ថវិកា សម្រាប់ដំណើរការ នៅឆ្នាំ២០១៣ ដែលភាគីជាតិ ត្រូវការ ៩,៣ លានដុល្លារអាមេរិក និងភាគីអន្តរជាតិ ត្រូវការប្រមាណ ៣០ លានដុល្លារអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ