កម្ពុជាកំពុងតាមដានមេរោគផ្តាសាយបក្សីប្រភេទថ្មីH7N9
កម្ពុជាកំពុងតាមដានយ៉ាងយកចិត្តទុកដាក់លើមេរោគផ្តាសាយបក្សីប្រភេទថ្មី H7N9 ខណៈមេរោគនេះកំពុងរាលដាលនៅក្នុងប្រទេសចិន។ លោក លី សូវ៉ាន់ អនុប្រធាននាយកដ្ឋានប្រយុទ្ធនឹងជំងឺឆ្លង នៃក្រសួងសុខាភិបាលបានអះអាងថា រហូតមកដល់ពេលនេះ គ្មានករណីសង្ស័យនៃវត្តមានមេរោគH7N9 នៅកម្ពុជាឡើយ។ កម្ពុជាកំពុងតែបារម្ភអំពីការផ្ទុះការឆ្លងមេរោគH5N1 ខ្លាំងខុសពីឆ្នាំធម្មតា នៅដើមឆ្នាំ២០១៣នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៦
ក្រុមគ្រូពេទ្យកម្ពុជាកំពុងតាមដានយ៉ាងស្វិតស្វាញ រកមេរោគផ្តាសាយបក្សីប្រភេទថ្មី ដែលមិនមែនជា H5N1 តែជាH7N9។ មេរោគផ្តាសាយបក្សីប្រភេទH7N9នេះ បានផ្ទុះនៅក្នុងប្រទេសចិនកាលពីខែកុម្ភៈ ហើយបានសម្លាប់ពលរដ្ឋចិន៧នាក់ហើយ។
ជាសំណាងល្អដែលមេរោគ H7N9 មិនទាន់ត្រូវបានរកឃើញនៅក្នុងប្រទេសកម្ពុជាក្នុងពេលបច្ចុប្បន្ននេះ កម្ពុជាដែលកំពុងទទួលរងការរីករាលដាលនៃការឆ្លងមេរោគH5N1 ខ្លាំងក្លាជាងបណ្តាឆ្នាំមុនៗ។ ក្នុងរយៈពេលតែ៣ខែដើមឆ្នាំ មនុស្ស៨នាក់ហើយបានស្លាប់ដោយសារH5N1។
ប៉ុន្តែ សម្រាប់លោកវេជ្ជបណ្ឌិត លី សូវ៉ាន់ ការផ្ទុះឡើងនៃមេរោគ H7N9 គឺជាការព្រួយបារម្ភរបស់ពិភពលោកទាំងមូល រួមទាំងកម្ពុជាផងដែរ។ លោកវេជ្ជបណ្ឌិតបន្តថា កម្ពុជាកំពុងពង្រឹងប្រព័ន្ធត្រួតពិនិត្យចំនួន២ ដើម្បីតាមដានរកមេរោគផ្តាសាយបក្សី។ ទីមួយ គឺការតាមដានមេរោគផ្តាសាយនៅតាមមន្ទីរពេទ្យ និងគ្លីនិកឯកជន ហើយទី២ គឺការត្រួតពិនិត្យជំងឺរលាកសួត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ