ទីក្រុងម៉ូស្គូបានទទួលជួបបេសកជនរបស់ភាគីបះបោរលីប៊ី
ការទទួលជួបនេះ ដោយរដ្ឋមន្ត្រីការបរទេសរុស្ស៊ី លោក Serguei Lavrov បានប្រព្រឹត្តទៅ រំលងតែ ៦ថ្ងៃ ក្រោយពីគាត់បានធ្វើជំនួបបែបនេះ នៅទីក្រុងម៉ូស្គូដែរ ជាមួយតំណាងរបបលោកកាដាហ្វី ដើម្បីរកច្រកចេញ ពីអធិករណ៍រ៉ាំរ៉ៃ នៅលីប៊ី ដោយសន្តិវិធី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
បេសកជនរបស់ភាគីបះបោរលីប៊ី ដែលដាក់ទិសផ្តួលរបបក្រុងទ្រីប៉ូលី គឺ លោក Abdel Rahman Shalkam។ គាត់ធ្លាប់ធ្វើជា រដ្ឋមន្ត្រីការបរទេសលីប៊ី ហើយនាពេលចុងក្រោយ បាន បំពេញមុខងារ ជាតំណាងអចិន្ត្រៃយ៍របស់លីប៊ី ប្រចាំ នៅអ.ស.ប.ទៅផង មុននឹងឆ្លងទៅនៅខាងភាគីប្រឆាំង។
ក្រោយពីគាត់បានទទួលជួបចរចា រសៀលម្សិលមិញ នៅម៉ូស្គូ ដោយប្រមុខការទូតរុស្ស៊ី លោកAbdel Rahman Shalkam បានថ្លែងថា កងអាកាសអូតង់ដែលវាយប្រហារ ទៅលើទីតាំងកងទ័ពរដ្ឋាភិបាល លីប៊ី គឺប្រតិបត្តិតាមសេចក្តីសម្រេច លេខ ១៩៧៣ ចេញថ្ងៃ១៧មីនា ដោយក្រុមប្រឹក្សាសន្តិសុខ អ.ស.ប. ដើម្បី ការពារជីវិតបណ្តាជនស៊ីវិល។ ប៉ុន្តែ ព្រមជាមួយនេះ ភាគីប្រឆាំង នៅលីប៊ី ជំទាស់ទល់នឹងអន្តរាគមន៍ ជាយថាហេតុ នៃទ័ពជើងគោកអូតង់ ចូលក្នុងដែនដីលីប៊ី។ ភាគីប្រឆាំងនៅលីប៊ី មិនយល់ព្រមធ្វើកិច្ចចរចាអ្វីណា ជាមួយរូបលោក កាដាហ្វីឡើយ។
តាមប្រសាសន៍ លោកAbdel Rahman Shalkam ដែលជាបេសកជនជាន់ខ្ពស់ តំណាងឲ្យ ភាគីបះបោរ នៅលីប៊ី “យើងយកចិត្តទុកដាក់ ជាពន្លឹកទៅលើការធ្វើសង្វាត ជាមួយរុស្ស៊ី ពីព្រោះ រុស្ស៊ីជាប្រទេសសំខាន់ណាស់ ជាមហាអំណាច-សមាជិកអចិន្ត្រៃយ៍នៃក្រុមប្រឹក្សា សន្តិសុខអ.ស.ប.។ យើងបានឯកភាពរក្សាទំនាក់ទំនង ជាប់ជានិច្ច ជាមួយ ទីក្រុងម៉ូស្គូ ជុំវិញដំណើរវិវឌ្ឍន៍ទៅ នៃស្ថានការណ៍ នៅលីប៊ី។
ពីចំណែកខ្លួន លោករដ្ឋមន្ត្រីការបរទេសរុស្ស៊ី Serguei Lavrov បានថ្លែងថា ៖ ទីក្រុងម៉ូស្គូ មើលឃើញតួនាទីខ្លួន គឺនៅត្រង់ជួយជម្រុញ បញ្ឈប់ការបង្ហូរឈាមឲ្យបាន យ៉ាងឆាប់បំផុត រវាងកងទ័ពរដ្ឋាភិបាល និង កងកម្លាំងបះបោរ នៅលីប៊ី។
ម៉ូស្គូប្រាកដក្នុងចិត្តថា ស្ថានការណ៍ដែលត្រូវតែកើតមាន ចៀសមិនផុត នៅលីប៊ី គឺ ៖
ទី១- បញ្ឈប់ការបាញ់គ្នា
ទី២- ចុះឲ្យបានជាកិច្ចព្រមព្រៀងស្តីអំពីយុទ្ធសន្តិភាព
ទី៣- បន្ទាប់មក ប្រព្រឹត្តទៅ សង្វាតដោយចំពោះ ឬ ដោយប្រយោល រវាងភាគីបដិបក្ខហើយ នៅទីបំផុត គឺ សម្រេចឲ្យបាននូវការបង្រួបបង្រួមជាតិ ក្នុងផលប្រយោជន៍ ប្រជាជនលីប៊ីទាំងមូល ក្នុងផលប្រយោជន៍អធិបតេយ្យ និងបូរណភាពដែនដីរដ្ឋលីប៊ីផ្ទាល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ