ប្រធានាធិបតីអេហ្ស៊ីបស្លាប់ឬនៅរស់?
តើអតីតប្រធានាធិបតី Hosni Moubarak ស្លាប់ឬនៅរស់ ?នេះជាសំណួរដែលកំពុងចោទឡើងនៅក្នុងមតិសាធារណៈអេហ្ស៊ីប។ មកទល់ថ្ងៃពុធនេះ គេនៅពុំទាន់ដឹងព័ត៌មានអ្វីច្បាស់លាស់ស្តីពីស្ថានភាពសុខភាពរបស់លោក Moubarak នៅឡើយទេ។ ដោយហេតុថាព័ត៌មានដែលបានផ្សាយនៅក្នុងប្រទេសមានភាពផ្ទុយគ្នាខ្លាំងមែនទែន ។ បើគេជឿតាមទីភ្នាក់ងារព័ត៌មានផ្លូវការអេហ្ស៊ីប Mena "Moubarak ប្រហែលជាស្លាប់នៅមន្ទីរព្យាបាលរោគហើយ"។ ប៉ុន្តែប្រភពមន្ទីរពេទ្យនិងប្រភពយោធាបានជូនដំណឹងថា "អតីតប្រធានាធិបតីអេហ្ស៉ីបកំពុងតែសន្លប់បាត់ស្មារតី »។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
នរណាក៏បានដឹងដែរ ថាលោក Hosni Moubarak ពុំមានសុខភាពល្អទេ ។ នេះហើយគឺជាព័ត៌មានតែមួយគត់ដែលសាធារណជនអេហ្ស៊ីប បានជ្រាបដឹងពិតប្រាកដ។ លោក Hosni Moubarak អតីតប្រធានាធិបតីអេហ្ស៊ីបដែលមានអាយុ៨៤ឆ្នាំនិងគ្រប់គ្រងអំណាចរយៈពេល៣០ឆ្នាំនៅក្នុងប្រទេស ត្រូវបានតុលាការអេហ្ស៊ីបផ្តន្ទាទោសឲ្យជាប់គុកអស់មួយជីវិតដោយហេតុការបញ្ជាបាញ់សម្លាប់ពួកបាតុករក្នុងអំឡុងពេលបះបោរដែលបានផ្តួលទម្លាក់គាត់នៅឆ្នាំ២០១១។
លោកMoubarak ឥឡូវនេះ កំពុងតែសន្លប់បាត់ស្មារតីនិងដកដង្ហើមតាមសិប្បនិម្មិត-នេះ បើយោងតាមការជូនដំណឹងរបស់ក្រុមមន្ត្រីយោធាអេហ្ស៊ីប។ ប៉ុន្តែបើគេជឿតាមទីភ្នាក់ងារព័ត៌មានផ្លូវការអេហ្ស៊ីបឈ្មោះ Mena វិញ“លោក Hosni Moubarak ប្រហែលជាស្លាប់បាត់ទៅហើយនៅមន្ទីរព្យាបាលរោគ"។
ដោយពិត មន្ទីរពេទ្យយោធានៅ Maadi ប៉ែកខាងត្បូងអេហ្ស៊ីប ជាទីដែល លោក Hosni Moubarak ស្ថិតនៅព្យាបាលនោះ- ពុំបានប្រគល់នូវកំណត់ហេតុសុខភាពផ្លូវការណាមួយឡើយ ពាក់ព័ន្ធនឹងសុខភាពរបស់លោក Moubarak។ ប៉ុន្តែគេគ្រាន់តែ ដឹងថា លោក Moubarak មានជម្ងឺបេះដូងនិងបញ្ហាដាច់សរសៃខួរក្បាល ហេតុនេះហើយបានជាគាត់ ត្រូវបានគេបញ្ជូនទៅកាន់មន្ទីរព្យាបាលយោធាមួយជាបន្ទាន់ ។
តាំងពីពេលនោះមក ព័ត៌មានអ្វីៗស្តីពីស្ថានភាពសុខភាពរបស់អតីតប្រធានាធិបតីអេហ្ស៊ីបនេះ ត្រូវបានគេបិទខ្ទប់ជិតស្លុងដែរ។ ម្យ៉ាងទៀត បន្ទាប់ពីការផ្សាយដំណឹងអំពីមរណភាពរបស់លោក Hosni Moubarak នៅមន្ទីរព្យាបាលរោគ កាលពីយប់មិញមក បាតុកម្មនិងឧប្បត្តិហេតុខ្លះ ក៏បានកើតមានដែរ។
ជាដំបូង គឺក្រុមបក្សព័ន្ធរបស់លោក Moubarak ដែលកាន់រូបថតអតីតប្រធានាធិបតីអេហ្ស៊ីបមកជាមួយផង បានធ្វើដំណើរមកដល់មុខមន្ទីរព្យាបាលយោធានៅ Maadi ដែលស្ថិតនៅពីខាងមុខនៃទន្លេ Nil ហើយបន្តិចក្រោយមក ខាងបក្សព័ន្ធអ្នកប្រឆាំងលោក Moubarak ក៏មកដល់ដែរដែល ចេញមកពីទីលានបដិវត្តន៍ Tahrir ។ ភ្លាមៗនេះ គូបដិបក្សទាំងពីរក្រុម បានដំឡើងសរសៃកដាក់គ្នា រហូតដល់មានការប៉ះទង្គិចគ្នាដែរ។ ខាងកងកម្លាំងរក្សាសណ្តាប់ធ្នាប់ នៅទីនោះ ក៏មិនបានធ្វើ អន្តរាគមន៍អ្វីដែរ តែទីបំផុតទៅ ឧប្បត្តិហេតុនេះ ក៏បានស្ងប់ស្ងាត់ទៅវិញដោយឯកឯង។
នៅជុំវិញ ស្ថានភាពសុខភាពលោកMoubarak នេះ ក៏មានប្រតិកម្មទម្លាក់ការទទួលខុសត្រូវទៅលើរដ្ឋអំណាចអេហ្ស៊ីបដែរ ។ មេធាវីម្នាក់ របស់លោក Moubarak បានចោទអាជ្ញាធរអេហ្ស៊ីបថាបានបដិសេធ តាំងពីមួយសប្តាហ៍មកហើយ មិនព្រមដឹកបញ្ជូនលោក Moubarak ទៅកាន់នៅមន្ទីរពេទ្យធំទេ ដោយបានយកលេសថា ខា្លចមានគំនាបពី បក្សព័ន្ធប្រឆាំងនៅលើទីលានបដិវត្តន៍ Tahrir។ ការពោលអាងរបស់អាជ្ញាធរអេហ្ស៊ីបបែបនេះគឺគ្រាន់តែជាមធ្យោបាយដោះកុនមួយ និងក៏ ដើម្បីបំភាន់មតិសាធារណៈតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ