យោធាអេហ្ស៊ីបដាក់បំរាមគោចរនៅទីក្រុងគែរក្រោយពីមានទង្វើហិង្សា
ប្រមាណបីសប្តាហ៍ទៀតការបោះឆ្នោតជ្រើសតាំងប្រធានាធិបតីអេហ្ស៊ីបថ្មីនឹងឈានមកដល់។ ការប៉ះទង្គិចគ្នាដ៏ហិង្សារវាងក្រុមបាតុករនិងកងកម្លាំងយោធានៅថ្ងៃសុក្រម្សិលមិញ នៅជិតក្រសួងការពារជាតិនៅទីក្រុងគែរបានបណ្តាលឲ្យមានមនុស្សស្លាប់២នាក់និងរបួស៣៧៣នាក់។ ទាំងនេះបាននាំឲ្យអ្នកដឹកនាំយោធាអេហ្ស៊ីបដាក់បំរាមគោចរនៅទីក្រុងគែរពីម៉ោង២៣ថ្ងៃសុក្រដល់ម៉ោង៧ព្រឹកថ្ងៃសៅរ៍ទី៥ឧសភានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៤:៤០
ការប៉ះទង្គិចគ្នាយ៉ាងហិង្សាបែបនេះកើតមានរវាងក្រុមបាតុករនិងកងកម្លាំងយោធាអេហ្ស៊ីប ក៏ពីព្រោះតែក្រុមបាតុករអេហ្ស៊ីបបានធ្វើការទាមទារយ៉ាងខ្លាំងក្លាឲ្យលោកសេនាប្រមុខ Hussein Tantaoui ចាកចេញពីមុខតំណែង។ លោកសេនាប្រមុខ Hussein Tantaoui ដែលបច្ចុប្បន្ននេះជាប្រធានក្រុមប្រឹក្សាជាន់ខ្ពស់នៃកងកម្លាំងយោធាអេហ្ស៊ីប( CSFA )បានកាន់កាប់អំណាចតាំងពីអតីតប្រធានាធិបតីហូស្នីមូបារ៉ាក់បានត្រូវប្រជាជនអេហ្ស៊ីបច្រានទម្លាក់ពីមុខតំណែងនៅខែកុម្ភៈឆ្នាំ២០១១។
នៅថ្ងៃសុក្រទី៤ឧសភាម្សិលមិញ ក្រុមបាតុករអេហ្ស៊ីបបាននាំគ្នាស្រែកជេរជាពាក្យស្លោកថា “ Tantaoui ថ្ងៃចុងក្រោយរបស់អ្នកឯងមកដល់ហើយ!!!”ឬថា “សេនាប្រមុខចៀសចេញឲ្យឆ្ងាយ ប្រយ័ត្នគ្រោះថ្នាក់ ប្រជាជនខឹងក្រេវក្រោធខ្លាំងណាស់!!!”។
ថ្វីដ្បិតតែ ក្រុមប្រឹក្សាជាន់ខ្ពស់នៃកងកម្លាំងយោធាបានសន្យាថា នឹងប្រគល់អំណាចឲ្យរដ្ឋបាលស៊ីវិលក្រោយការបោះឆ្នោតប្រធានាធិបតី ក៏ប៉ុន្តែនៅមានមតិមួយផ្នែកនៅតែមានការសង្ស័យថា ក្រុមឧត្តមសេនីយដែលកំពុងកាន់កាប់អំណាចនៅប្រទេសអេហ្ស៊ីបបច្ចុប្បន្ននៅតែលេងស្នៀតប្រើកិច្ចកលដើម្បីបន្តកាន់កាប់អំណាច។
ដូចជាកាលពីថ្ងៃពុធកន្លងទៅថ្មីៗនេះ ប្រជាជនជាច្រើនបាននាំគ្នាធ្វើបាតុកម្មនៅជិតក្រសួងការពារជាតិ ស្រាប់តែពួកគេបានត្រូវវាយដំច្រំធាក់ដោយជនមិនស្គាល់មុខ។ ហើយនៅក្នុងចំណោមបាតុករទាំងនោះ ភាគច្រើនជាសកម្មជននៃពួកអ៊ីស្លាមនិយមដែលបេក្ខភាពប្រធានាធិបតីរបស់គេបានត្រូវអាជ្ញាធរអេហ្ស៊ីបបដិសេធពុំទទួលស្គាល់សុពលភាព។ ទាំងនេះបានត្រូវមតិខ្លះចោទថា អ្នកគាំទ្ររបបគ្រប់គ្រងអេហ្ស៊ីបចាស់កំពុងលេងស្នៀតប្រើកិច្ចកលដើម្បីបន្តកាន់កាប់អំណាច។
ហើយលោក Khaïrat al Chater បេក្ខជនប្រធានាធិបតីចេញពីបក្សភាតរបុត្រអ៊ីស្លាមដែលមានសំឡេងភាគច្រើននៅក្នុងរដ្ឋសភាអេហ្ស៊ីប ក៏បានត្រូវអាជ្ញាធរបដិសេធពុំទទួលស្គាល់សុពលភាព ដោយហេតុតែលោកធ្លាប់បានត្រូវគេកាត់ទោសនៅសម័យហូស្នីមូបារ៉ាក់។
ទាំងនេះជាមូលហេតុនាំឲ្យចលនាអ៊ីស្លាមនិយមងាកមករកបេក្ខភាពរបស់ Mohamed Morsi ដែលធ្វើឲ្យបេក្ខជនដែលចេញពីរបបគ្រប់គ្រងអេហ្ស៊ីបចាស់មាន “ប្រៀប” តួយ៉ាងដូចជាលោក Amr Moussa ដែលធ្លាប់បានកាន់តំណែងប្រមុខការទូតយ៉ាងយូរនៅក្នុងសម័យហូស្នី មូបារ៉ាក់ ឬក៏លោកអតីតនាយករដ្ឋមន្ត្រីអេហ្ស៊ីប Ahmed Chafik។
ក្រៅពីបញ្ហាពុំទទួលស្គាល់ដោយអាជ្ញាធរនូវសុពលភាពនៃបេក្ខភាពប្រធានាធិបតីសំខាន់ៗមួយចំនួន យុទ្ធនាការឃោសនាបោះឆ្នោតប្រធានាធិបតីអេហ្ស៊ីប ដែលជុំទី១ត្រូវប្រព្រឹត្តទៅនៅថ្ងៃទី២៣និង២៤ឧសភា នឹងត្រូវប្រព្រឹត្តទៅក្នុងសភាពពុំចុះសម្រុងគ្នាពាក់ព័ន្ធនឹងបញ្ហារដ្ឋធ្មនុញ្ញថ្មី ហើយនិងការសង្ស័យថា ក្រុមយោធាកាន់អំណាចបច្ចុប្បន្នចង់បន្តក្តោបក្តាប់អំណាច។
ដូច្នេះហើយបានជាសកម្មជនរាប់ម៉ឺននាក់ដែលចេញពីគណបក្សអ៊ីស្លាមនិយម សេរីនិយម ឬជឿនលឿននិយម បាននាំគ្នាចុះថ្នល់ធ្វើបាតុកម្មនៅទីលាន Tahrir ដែលឋិតនៅចំកណ្តាលទីក្រុងគែរដែលជាទីលានបដិវត្តន៍របស់ប្រទេសអេហ្ស៊ីប។
ពួកគេបាននាំគ្នាស្រែកថា “ដួលរលំទៅរបបគ្រប់គ្រងផ្តាច់ការយោធា!!!” ហើយមានបដាខ្លះសរសេរទាមទារឲ្យលុបចេញនូវអត្ថបទដែលហាមពុំឲ្យមានការតវ៉ាពីអសុពលភាពរបស់បេក្ខភាពប្រធានាធិបតីមួយចំនួន។ នៅមានបដាខ្លះទៀតសរសេរទាមទារឲ្យរំលាយចោលគណៈកម្មការបោះឆ្នោត ហើយនិងតាក់តែងឲ្យមានច្បាប់ថ្មីហាមឃាត់ពុំឲ្យឥស្សរជននៃរបបគ្រប់គ្រងចាស់អាចមកឈរឈ្មោះចូលរួមធ្វើការបោះឆ្នោត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ