កូរ៉េខាងជើងប្រាប់កម្ពុជាថាត្រៀមខ្លួនវិលចូលតុចរចា៦ភាគីវិញ
នៅក្នុងជំនួបជាមួយលោក ហោ ណាំហុង រដ្ឋមន្ត្រីការបរទេសកម្ពុជា នៅព្រឹកថ្ងៃសៅរ៍នេះនៅទីក្រុងភ្នំពេញ លោក ប៉ាក់ អ៊ីជុន (Pak Uichun) រដ្ឋមន្ត្រីការបរទេសកូរ៉េខាងជើងអះអាងថា ទីក្រុងព្យុងយ៉ាងយល់ព្រម វិលចូលតុចរចា៦ភាគីឡើងវិញដើម្បីជជែកអំពីបញ្ហានុយក្លេអ៊ែរ។កម្ពុជាក្នុងនាមជាអ្នកសម្របសម្រួលកិច្ចការនេះ បានប្រកាសស្វាគមជំហរថ្មីរបស់កូរ៉េខាងជើងហើយចាត់ទុកថា នេះជាជំហរប្រកបដោយភាពវិជ្ជមាន និងសុឆន្ទៈមួយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
បើទោះបីជាការសប្រមសម្រួលជម្លោះសមុទ្រចិនខាងត្បូងជួបនឹងបរាជ័យ ប៉ុន្តែ រដ្ឋាភិបាលក្រុងភ្នំពេញ នៅតែបន្តខិតខំដើរតួជាអ្នកសម្របសម្រួលវិបត្តិនុយក្លេអ៊ែរនៅឧបទ្វីបកូរ៉េបន្តទៀត។ លោក ហោ ណាំហុង រដ្ឋមន្ត្រីការបរទេសកម្ពុជា បានទទួលជួបពិភាក្សាការងារជាមួយរដ្ឋមន្ត្រីការបរទេសកូរ៉េខាងជើងគឺលោក ប៉ាក់ អ៊ីជុននៅទីក្រុងភ្នំពេញនាព្រឹកថ្ងៃសៅរ៍នេះ។ជំនួបនេះបានទទួលលទ្ធផលផ្លែផ្កាគួរឲ្យកត់សម្គាល់។ ប្រមុខការទូតទីក្រុងព្យុងយ៉ាង បាននិយាយប្រាប់លោក ហោ ណាំហុង ថា កូរ៉េខាងជើងត្រៀមខ្លួនជាស្រេចក្នុងការវិលចូលតុចរចា៦ ភាគីឡើងវិញដើម្បីជជែកអំពីវិបត្តិនុយក្លេអ៊ែរនៅក្នុងឧបទ្វីបកូរ៉េ។
លោក កុយ គួង អ្នកនាំពាក្យក្រសួងការបរទេសកម្ពុជាបានប្រាប់ក្រុមអ្នកកាសែតនៅក្រោយជំនួបនោះថា កម្ពុជាបានស្វាគមជំហរវិជ្ជមានរបស់កូរ៉េខាងជើងនិងចាត់ទុកជាជំហរប្រកបដោយសុឆន្ទៈរបស់ទីក្រុងព្យុងយ៉ាងក្នុងការដោះស្រាយបញ្ហាក្នុងតំបន់។
សូមបញ្ជាក់ថា រដ្ឋមន្ត្រីការបរទេសកូរ៉េខាងជើង លោកប៉ាក អ៊ីជុន បានមកដល់ប្រទេសកម្ពុជាកាលពីយប់ថ្ងៃអង្គារទី១០កក្កដា ដើម្បីចូលរួមក្នុងវេទិកាតំបន់អាស៊ានជាមួយប្រទេសជាង២០ផ្សេងទៀតដែលបានប្រព្រឹត្តទៅកាលពីថ្ងៃទី១២ កក្កដាកន្លងទៅ នៅទីក្រុងភ្នំពេញ។
កិច្ចប្រជុំ៦ភាគីរវាង កូរ៉េខាងជើង កូរ៉េខាងត្បូង សហរដ្ឋអាមេរិក ចិន ជប៉ុន និងរុស្ស៊ី ស្តីបញ្ហានុយក្លេអ៊ែរក៏គ្រោងបើកធ្វើនៅភ្នំពេញផងដែរដោយមានកម្ពុជាជាអ្នកសម្របសម្រួល ប៉ុន្តែ កិច្ចប្រជុំនោះមិនបានកើតមានទេ។ ផ្ទុយទៅវិញ លោកអ៊ីជុន បែរជាចែកសេចក្តីថ្លែងការណ៍ដល់អ្នកកាសែតដោយបានថ្លែងរិះគន់សហរដ្ឋអាមេរិកយ៉ាងខ្លាំងទៅវិញ។ សេចក្តីថ្លែងការណ៍នោះបញ្ជាក់ថា កូរ៉េខាងជើង ត្រូវតែមានអាវុធនុយក្លេអ៊ែរដើម្បីធ្វើឲ្យមានតុល្យភាពក្នុងតំបន់ពីព្រោះតែសហរដ្ឋអាមេរិក និងប្រទេសសម្ពន្ធមិត្តរបស់ខ្លួនដែលប្រឆាំងនឹងកូរ៉េខាងជើងសុទ្ធតែមានអាវុធនុយក្លេអ៊ែរ។
យ៉ាងណាក៏ដោយ រដ្ឋមន្ត្រីការបរទេសកូរ៉េខាងជើង លោក ប៉ាក់ អ៊ីជុនដែលកំពុងបន្តដំណើរទស្សនកិច្ចនៅកម្ពុជា បានប្រាប់លោក ហោ ណាំហុងនៅព្រឹកនេះថា កូរ៉េខាងជើងត្រៀមខ្លួនរួចហើយដើម្បីចូលតុចរចា៦ភាគី។ ប៉ុន្តែ លោក កុយ គួង អះអាងថា នៅមិនទាន់ដឹងពីពេលវេលានិងទីកន្លែងដែលត្រូវរៀបចំជំនួប៦ភាគីឡើងវិញដែលកម្ពុជាកំពុងជួយសម្របសម្រួលនេះនៅឡើយទេ។ យ៉ាងណាក៏ដោយ កម្ពុជាត្រូវរៀបចំកិច្ចប្រជុំកំពូលអាស៊ានដ៏ធំមួយទៀតនៅខែវិច្ឆិកាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ