កិច្ចប្រជុំថ្នាក់រដ្ឋមន្ត្រីការបរទេសនៃ“ក្រុមប្រឹក្សាអូតង់-រុស្ស៊ី
ចូលរួមក្នុងកិច្ចប្រជុំដែលបើកធ្វើថ្ងៃនេះនៅក្រុង Bruxelles គឺមានពីខាងរុស្ស៊ី លោករដ្ឋមន្ត្រីការបរទេស Serguei Lavrov។ខាងអូតង់ មានប្រមុខការទូតនៃ២៨ប្រទេសសមាជិកបក្សសម្ព័ន្ធនេះ-នាំមុខដោយលោកស្រីរដ្ឋមន្ត្រីការបរទេសអាមេរិក Hillary Clinton។ ប្រធានបទ ធំៗនៃជំនួបនេះ មាន ៖បញ្ហា”ប្រព័ន្ធខែលមីស្ស៊ីលប្រឆាំងមីស្ស៊ីល”ដែលអាមេរិកគ្រោងដំឡើងនៅអឺរ៉ុប, ស្ថានការណ៍នៅស៊ីរី , បញ្ហាអាហ្វហ្កានីស្ថាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៩
តាមក្រសួងការបរទេសរុស្ស៊ី ជាបឋម សម័យប្រជុំនេះលើកយកទៅពិនិត្យគឺលទ្ធផលនៃ ការបំពេញតាមកិច្ចព្រមព្រៀងដែលមានសម្រេចបានក្នុងជំនួបលើកមុននៃក្រុមប្រឹក្សាអូតង់-រុស្ស៊ី នៅឯក្រុង Lisbonneប្រទេសPortugalកាលពី២ឆ្នាំមុនស្តីអំពីការរៀបរយភាពជាដៃគូទំនើបនិង យុទ្ធសាស្ត្រពិតប្រាកដរវាងរុស្ស៊ីនិងអូតង់ឈរលើគោលការណ៍នៃសន្តិសុខមិនអាចពុះចែកបាន, នៃការជឿទុកចិត្តគ្នា, នៃតម្លាភាព,នៃភាពអាចទស្សន៍ទាយបានជាមុនដើម្បីបង្កើតជាលំហរួមតែមួយនៃសន្តិភាព សន្តិសុខ និងស្ថិរភាពនៅទូទាំងតំបន់អឺរ៉ូ-អាត្លង់ទិក។
ក្រសួងការបរទេសរុស្ស៊ីកត់សម្គាល់ថាក្នុងរយៈពេលកន្លងទៅ មានសន្សំបានផ្លែផ្កាជាវិជ្ជមាន ខាង ធ្វើសហប្រតិបត្តិការប្រឈមទល់នឹងការគម្រាមនៃអំពើភររវកម្មទល់នឹងពួកចោរសមុទ្រ ទល់នឹងគ្រោះមហន្តរាយធម្មជាតិនិងបច្ចេកវិជ្ជា ប៉ុន្តែទន្ទឹមនេះ នៅតែមានការខ្វែងគំនិតគ្នាខ្លាំងនៅឡើយ ជុំវិញបញ្ហាគន្លឹះៗ ដែលប៉ះពាល់ដល់ផលប្រយោជន៍ជាគ្រឹះមូលដ្ឋាននៃសន្តិសុខប្រទេសរុស្ស៊ី ជាបឋមបណ្តាលមកពីផែនការស.រ.អា. និង អូតង់ បង្កើតជា”ប្រព័ន្ធខែលមីស្ស៊ីលប្រឆាំងមីស្ស៊ីល” នៅទ្វីបអឺរ៉ុប និងការវាតទីរបស់អូតង់រំកិលកាន់តែមកជិតព្រំប្រទល់រុស្ស៊ី។
ម៉្លោះហើយ បានជាភាគីរុស្ស៊ីក្នុងកិច្ចប្រជុំថ្ងៃនេះ នឹងបន្តស្នើទៅបណ្តាប្រទេសដៃគូខ្លួន នៅ អូតង់ ឲ្យផ្តល់នូវការធានាជាលាយល័ក្ខអក្សរ ថា ប្រព័ន្ធខែលនោះ និងការវាតទី របស់អូតង់ គឺ ឥតតម្រង់ប្រឆាំងនឹងរុស្ស៊ីប្រឆាំងនឹងសក្តានុពលយុទ្ធសាស្ត្ររួមរបស់រុស្ស៊ីនិងអូតង់ឡើយ។
ជុំវិញស្ថានការណ៍នៅស៊ីរី រុស្ស៊ីយល់ថា ការដែលអគ្គលេខាធិការអូតង់ លោក Rasmussen ថ្លែងថ្ងៃនេះដោយរំពឹងថា បក្សសម្ព័ន្ធនេះ មុខជាយល់ព្រម ដំឡើងកាំជ្រួចមីស្ស៊ីលអាមេរិកាំង ធុន Patriot នៅលើដែនដីទួកគី ជាប់នឹងស៊ីរី គឺមិនបន្ធូរឡើយបរិយាកាសនៅទីនោះ តែផ្ទុយទៅវិញ វារឹតតែអូសទាញស្ថានការណ៍ឲ្យកាន់តែតានតឹងទៅទៀត។ ទួកគីវិញ ដែលសុំឲ្យដំឡើងកាំជ្រួចនោះ ប្រតិកម្មថា សុំឲ្យដំឡើងនេះ ព្រោះខ្លួនជាសមាជិកអួតង់ហើយប្រទេសទី៣ណា ក៏ដោយ ដែលមិនមែនជាសមាជិកអូតង់ គឺវាឥតមាននិស្ស័យជាប់នឹងរឿងនេះសោះឡើយ។
ទាក់ទងនឹងស្ថានការណ៍នៅអាហ្វហ្កានីស្ថាន រុស្ស៊ីស្នើឲ្យពិភាក្សាចង្កោមបញ្ហាដែលនឹងចោទ កាន់តែខ្លាំងឡើងក្នុងការប្រយុទ្ធទល់នឹងគ្រោះថ្នាក់ភេរវនិយមនិងចរាចរណ៍គ្រឿងញៀន ហូរ ចេញមកពីប្រទេសនោះដែលនឹងប៉ះពាល់ដល់សន្តិសុខគ្រប់ប្រទេសទាំងអស់នៃ “ក្រុមប្រឹក្សា អូតង់-រុស្ស៊ី“ ក្រោយពីកងទ័ពអូតង់ដកចេញពីអាហ្វហ្កានីស្ថានទៅក្នុងឆ្នាំ២០១៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ