អ្នកស្រាវជ្រាវអាមេរិកបង្ហាញលទ្ធផលវ៉ាក់សាំងការពារគ្រុនចាញ់ប្រសិទ្ធភាពខ្ពស់
នៅថ្ងៃព្រហស្បតិ៍ម្សិលមិញ អ្នកស្រាវជ្រាវអាមេរិកាំងនានា បានប្រកាសលទ្ធផលវិជ្ជមានលើសលុប នៃការពិសោធន៍វ៉ាក់សាំងមួយចាក់ការពារជំងឺគ្រុនចាញ់ ទៅលើមនុស្ស។ ក្នុងចំណោមមនុស្ស៩នាក់ ដែលសាកល្បងចាក់វ៉ាក់សាំងនេះ ៦នាក់ដែលទទួលកម្រិតវ៉ាក់សាំងខ្ពស់ ត្រូវបានការពារពីជំងឺគ្រុនចាញ់១០០ភាគរយ។ វ៉ាក់សាំងថ្មីនេះអាចនឹងសង្គ្រោះជីវិតមនុស្សរាប់លាននាក់នៅលើពិភពលោក។ រៀងរាល់ឆ្នាំ ជំងឺគ្រុនចាញ់បានសម្លាប់មនុស្ស ៦០ម៉ឺននាក់ ពិសេសក្មេងៗនៅតំបន់សាហារ៉ាអាហ្វ្រិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣០
មន្ទីរពិសោធន៍សាណារីយ៉ា នៅអាមេរិក បានផលិតវ៉ាក់សាំងគ្រុនចាញ់មួយ ដោយប្រើបរាសិតប្រភពនៃជំងឺគ្រុនចាញ់ ដែលចុះខ្សោយអានុភាព។ បរាសិតទាំងនេះបង្កឡើងដោយមូសញី អាណូហ្វែល។ វ៉ាក់សាំងការពារគ្រុនចាញ់នេះ អាចផ្តល់លទ្ធផល ១០០ភាគរយ ព្រោះថា ក្នុងចំណោមមនុស្ស៩នាក់ ដែលចាក់វ៉ាក់សាំងនេះ មនុស្ស៦នាក់ ដែលទទួលកម្រិតវ៉ាក់សាំងខ្ពស់ ត្រូវបានការពារពីរោគគ្រុនចាញ់១០០ភាគរយ។
គួររំលឹកថា អ្នកវិទ្យាសាស្ត្របានប្រឹងប្រែងផលិតវ៉ាក់សាំងការពារគ្រុនចាញ់ ជាង៣០ឆ្នាំ មកហើយ។ លទ្ធផលនៅពេលនេះ បង្ហាញថា មនុស្សលោកនឹងទទួលបានវ៉ាក់សាំងពិតប្រាកដមួយ។
ប៉ុន្តែ នេះគ្រាន់តែជាដំណាក់កាលដំបូងនៃការពិសោធន៍ប៉ុណ្ណោះ។ អ្នកស្រាវជ្រាវត្រូវបង្ហាញផងដែរថា ការធ្វើអោយស៊ាំមេរោគ នឹងនៅតែមានភាពឋិតឋេរ ហើយអាចការពារពីធាតុផ្សេងៗទៀតនៃប្រភេទបឋមសត្វ ដែលបង្ករោគគ្រុនចាញ់។ ដើម្បីធានាបានប្រសិទ្ធភាព១០០ភាគរយ អ្នកស្រាវជ្រាវនឹងប្រើវ៉ាក់សាំងនេះពិសោធន៍នៅអាហ្វ្រិក អាល្លឺម៉ង់ និងសហរដ្ឋអាមេរិកបន្ថែមទៀត។ ដោយឡែក ការផលិតវ៉ាក់សាំងនេះក្នុងមាត្រដ្ឋានទូលំទូលាយ អាចនឹងចំណាយប្រាក់កាសច្រើន។ ជាងនេះ គេត្រូវថែរក្សាវ៉ាក់សាំងគ្រុនចាញ់នេះ ក្នុងអាសូដធាតុរាវ ដូច្នេះ វាអាចពិបាកធ្វើនៅប្រទេសកំពុងអភិវឌ្ឈន៍។ ការចាក់វ៉ាក់សាំងការពារគ្រុនចាញ់លើទារក ក៏ប្រហែលពិបាកធ្វើផងដែរ ព្រោះគេពិបាកមើលឃើញសសៃទារកដោយភ្នែកទទេណាស់។
កន្លងមក អង់គ្លេសធ្លាប់ផលិតវ៉ាក់សាំងគ្រុនចាញ់ប្រសិទ្ធភាពខ្ពស់រួចហើយដែរ ដែលការពិសោធន៍ធ្វើដល់ដំណាក់កាលទី៣ ហើយរង់ចាំតែការអនុញ្ញាតអោយដាក់ប្រើប៉ុណ្ណោះ។ ប៉ុន្តែវ៉ាក់សាំងនេះ ការពារបានត្រឹមតែទារក៣១ភាគរយ និងកុមារ៥៦ភាគរយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ