រង្វាន់នៅរុស្ស៊ីពាក់ព័ន្ធនឹងមេដាយដែលកីឡាករដណ្តើមយកបានក្នុងល្បែងអូឡាំពិក
ថ្ងៃនេះប្រព័ន្ធផ្សព្វផ្សាយនៅរុស្ស៊ីនាំគ្នាបង្ហើបឲ្យដឹងថា កីឡាកររុស្ស៊ី ឈ្មោះMansur Isaiev ដែលម្សិលមិញចេះដណ្តើមបានមេដាយមាសខាងចំបាប់ Judo នឹងទទួលបានរង្វាន់បន្ថែម ក្នុងទឹកប្រាក់៣០លានរូប្ល ឬជិត១លានដុល្លារ ដោយមិនទាន់គិតពីប្រាក់រង្វាន់រំលែក ចេញពីថវិការដ្ឋសម្រាប់ពួកគេ។តើរង្វាន់លើកទឹកចិត្តយ៉ាងណាខ្លះ ចំពោះមេដាយអូឡាំពិកដែលនៅរង់ចាំ កីឡាករកីឡាការិនីរុស្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
មេដាយនោះទើបជាមេដាយមាសទី២ ដណ្តើមបានដោយរុស្ស៊ី ក្នុងល្បែងអូឡាំពិកដែលកំពុងប្រព្រឹត្តទៅនៅទីក្រុងឡុងដ្រឹ៍។ បើគិតក្នុង៣០ឆ្នាំចុងក្រោយ នេះជាលើកទី១ ដែលរុស្ស៊ីចេះដណ្តើមបានមេដាយមាសខាងចំបាប់ Judo រវាងអ្នកកីឡាទម្ងន់រហូតដល់ ៧៣គីឡូក្រាម។ ហើយអ្នកកីឡារុស្ស៊ីដែលចេះប្រកួតឈ្នះគូប្រជែងជាតិជប៉ុនដ៏ល្បីខាងមុខកីឡានេះ គឺ លោក Mansur Isaiev មានដើមកំណើតចេញមកពីទឹកដី Daguestan នៅតំបន់ភ្នំកូកាសចំណុះ សហព័ន្ធរុស្ស៊ី។ គាត់ប្រកួតគឺដោយតំណាងឲ្យខេត្តរុស្ស៊ី Chelyabinsk ជាទីដែលគាត់រស់នៅសព្វថ្ងៃ។
មោទនៈនឹងជោគជ័យនេះ អភិបាលខេត្ត Chelyabinsk ទើបប្រកាសថា លោក Mansur Isaiev នឹងទទួលបានពីពួក Sponsor ខេត្តនេះ នូវរង្វាន់៣០លានរូប្ល ឬជាង ៩សែន៣ម៉ឺនដុល្លារដែលគាត់អាចប្រើសម្រាប់ទិញទាំងលំនៅដ្ឋានទាំងរថយន្តធុនស្រាល។
កីឡាកររុស្ស៊ីម្នាក់ទៀត ដែលក៏ដណ្តើមបានមេដាយមាសដែរ ប៉ុន្តែខាងចំបាប់Judoរវាងអ្នកប្រកួតទម្ងន់ដល់៦០គីឡូក្រាម គឺលោក Arsen Galstyan ត្រូវក្រុមហ៊ុនសំណង់ខេត្ត Krasnodar ជាទីដែលគាត់រស់នៅសន្យាធ្វើកាដូជូនគាត់គឺ ឡាន Mercedes មួយគ្រឿងនិងបំពាក់លំនៅគាត់ដែលមាន ៦០ម៉ែត្រ. ក្រឡា ទៅដោយគ្រឿងសង្ហារិមថ្មីទែងគ្មានសល់ចន្លោះណាទេ។
ពីខាងរដ្ឋរុស្ស៊ីតាមដែលកាណាល់ទូរទស្សន៍ម៉ូស្គូ ផ្សាយឲ្យដឹង នឹងមានប្រគល់រង្វាន់ដូចតទៅ៖
ចំពោះមេដាយមាស គឺ ៤លានរូប្ល ឬ ១២៥.០០០ ដុល្លារ។
ចំពោះមេដាយប្រាក់ ២លាន៥សែនរូប្លឬ ៧៨.០០០ដុល្លារ។
ចំពោះមេដាយសំរឹទ្ធ ១លាន៧សែនរូប្ល ឬ ៥៣.០០០ដុល្លារ។
ក្រៅពីរង្វាន់ផ្លូវការរបស់រដ្ឋតាមធម្មតាអ្នកកីឡារុស្ស៊ី តែងទទួលរង្វាន់ លើកទឹកចិត្តពីខេត្តដែលគេមានមុខតំណាងឲ្យជាទូទៅ គឺក្នុងទម្រង់ជារថយន្តឬ លំនៅដ្ឋានប្រសិនបើអ្នកដែលចេះដណ្តើមបានមេដាយនោះទើបមានឬក៏ជិតមានគ្រួសារថ្មីថ្មោង។
គេនៅចាំថា បន្ទាប់ពីការប្រកួតល្បែងអូឡាំពិកឆ្នាំ២០០០នៅក្រុង Sydney ជាទីដែលរុស្ស៊ីបានជាប់លេខ២ ដោយមេដាយមាសចំនួន ៣២ ក្រៅពីរង្វាន់ជាប្រាក់រដ្ឋាភិបាលរុស្ស៊ីក៏បានធ្វើកាដូទៅម្ចាស់មេដាយទាំងនោះម្នាក់ៗគឺឡានLexus ១គ្រឿង អាធុន RX-300។
ក្នុងល្បែងអូឡាំពិកនៅក្រុងឡុងដ្រឹ៍លើកនេះ រុស្ស៊ីតំណាងដោយអ្នកកីឡាខ្លួន ចំនួន ៤៣៦នាក់ ដែលសង្ឃឹមដណ្តើមឲ្យបានមេដាយមាស ក្នុងចំនួនពី២០ទៅ៣០គ្រឿង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ