តំបន់ឆ្នេរប៉ែកខាងកើតអាមេរិកជន់លិចដោយទឹកសមុទ្រ នាំមកដោយព្យុះសង្ឃរា Sandy
ស្ថានភាពជាក់ស្តែងមានលក្ខណៈធ្ងន់ធ្ងរជាងការព្យាករណ៍ទុកមុន។ ព្យុះសង្ឃរាSandy មានកម្លាំងបោកបក់ខ្លាំង និងនាំទឹកសមុទ្រទៅជន់លិចទីក្រុងមួយចំនួន ដែលស្ថិតនៅឆ្នេរប៉ែកខាងកើត។ តាមតុល្យការចុងក្រោយ ព្យុះកំណាចSandy បានសម្លាប់មនុស្ស១៣នាក់ នៅអាមេរិក និងនៅកាណាដា។
ចុះផ្សាយនៅថ្ងៃ៖
ស្តាប់ - ០២:២១
នៅពេលខ្យល់ព្យុះអ៊ីរ៉ែនIrène បោកបក់ទៅលើទីក្រុងញូវយ៉ក កាលពីឆ្នាំមុន អ្នកទីក្រុងញូវយ៉កមានការអាក់អន់ចិត្តដោយសារតែកម្រិតប្រកាសអាសន្នរបស់សាលាក្រុងមានលក្ខណៈតឹងតែង បើធៀបនឹងថាមពលខ្យល់ព្យុះដែលដោយពិតទៅ មានកម្រិតខ្សោយ។ ប៉ុន្តែ លើកនេះ ព្យុះសង្ឃរាSandy មិនត្រឹមតែបន្ថយឥទ្ធិពលរបស់ខ្លួនទេ ផ្ទុយទៅវិញ វាមានកម្លាំងបោកបក់កាន់តែខ្លាំង ជាងការព្រាងទុក។
ជាព្រឹត្តិការណ៍កម្រ នឹងមាន តំបន់ភាគច្រើន ក្នុងទីក្រុងញូវយ៉ក និងទីក្រុងAtlantic ក្នុងរដ្ឋញូវ ជេស៊ី (New Jersey) ត្រូវជន់លិចដោយទឹកសមុទ្រ។ យោងតាមអ្នកកាសែតបារាំងអន្តរជាតិRFI ប្រចាំនៅទីក្រុងញូវយ៉ក នៅភាគខាងត្បូងសង្កាត់Manhattan ទឹកជន់លិចផ្លូវ នៅកន្លែងខ្លះ មានកំពស់មួយម៉ែត្រ។ មនុស្សជាង ៣លាននាក់ នៅរដ្ឋ ញូវ ជេស៊ី គ្មានភ្លើងប្រើប្រាស់។ ចំណែក ទីក្រុងពាណិជ្ជកម្មញូវយ៉កមួយភាគស្ថិតក្នុងភាពងងឹតសូន្យ មនុស្សរាប់លាននាក់គ្មានភ្លើងអគ្គិសនីប្រើប្រាស់។ ជាក់ស្តែង ផ្ទះសម្បែង ជាង ៥សែន ក្នុងសង្កាត់Manhattan ត្រូវដាច់ចរន្តអគ្គិសនី ដោយសារតែរោងចក្រអគ្គិសនីមួយកន្លែង ត្រូវឆេះបំផ្លាញ ក្រោមឥទ្ធិពលព្យុះមហិមាSandy។
ទឹកជំនន់សមុទ្រពេលនេះបានធ្វើឲ្យទីក្រុងញូវយ៉កប្រឈមមុខនឹងការខ្វះខាតអគ្គិសនី។ អាជ្ញាធរត្រូវបង្ខំចិត្តជម្លៀសអ្នកជម្ងឺចេញពីមន្ទីរពេទ្យមួយក្នុងសង្កាត់ Manhattan ដោយសារតែម៉ាស៊ីនភ្លើងរបស់មន្ទីរពេទ្យមួយត្រូវខូច ដោយសារតែទឹកជន់លិច។ ក្នុងពេលជាមួយគ្នានេះ ទឹកជំនន់សមុទ្របានហូរចាក់ចូលទៅក្នុងរោងរទេះភ្លើងក្រោមដី ចំនួន៧ ក្នុងទីក្រុងញូវយ៉ក។ យោងតាមនាយកគ្រប់គ្រងផ្លូវគមនាគមន៍ទីក្រុងញូវយ៉ក ក្នុងប្រវត្តិសាស្រ្តរបស់ខ្លួនដែលមានរយៈពេល ១០៨ឆ្នាំ នេះជាលើកទីមួយ ដែលប្រព័ន្ធរទេះភ្លើងក្រោមដីញូវយ៉កត្រូវរងបំផ្លាញដោយទឹកជំនន់។ លើកនេះ គេត្រូវការរយៈពេលជាច្រើនថ្ងៃ ដើម្បីស្តាផ្លូវរទេះភ្លើងក្រោមដីឡើងវិញ។ ភ្លាមៗ លោកប្រធានាធិបតី បារ៉ាក់ អូបាម៉ាបានសម្រេចដាក់ទីក្រុងញូវយ៉កក្នុងស្ថានភាពរងគ្រោះមហន្តរាយធ្ងន់ធ្ងរ។
យោងតាមអ្នកព្យាករឧតុនិយម ព្យុះសង្ឃរា Sandy នឹងបន្តបោកបក់ទៅលើរដ្ឋជាង ១២ ក្នុងរយៈពេលតែពី២៤ ទៅ ៣៦ម៉ោង។ លោកប្រធានាធិបតីអាមេរិក បារ៉ាក់ អូបាម៉ា សម្រេចបានប្រកាសដាក់រដ្ឋMassachusetts Connecticut Rhode Island New York New Jersey ក្នុងភាពអាសន្ន ចំណែកនៅទីក្រុងវ៉ាស៊ីនតោន ការិយាល័យរដ្ឋាភិបាលនឹងត្រូវបិទទ្វារ រហូតដល់ថ្ងៃពុធទី ៣១ តុលា ២០១២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ