ព្រះមហាក្សត្រយាងចេញពីប្រទេស ចំពេលវិបត្តិនយោបាយដោះស្រាយមិនចេញ
ព្រះមហាក្សត្រសម្តេចព្រះមរមនាថ នរោត្តម សីហមុនី បានយាងចាកចេញពីប្រទេសហើយនៅព្រឹកថ្ងៃចន្ទនេះ ដើម្បីទៅពិនិត្យព្រះរាជសុខភាព នៅទីក្រុងប៉េកាំងប្រទេសចិន។ ព្រះអង្គក៏ត្រូវយាងចូលរួមជាអធិបតីក្នុងពិធីប្រកួតបាល់ទាត់អាស៊ី នៅទីក្រុងណាននីញផងដែរ។ ការយាងចេញពីប្រទេសរបស់ព្រះអង្គ បានធ្វើឡើងចំពេលដែលវិបត្តិនយោបាយដោះស្រាយមិនចេញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៤
ព្រះមហាក្សត្រ សម្តេច ព្រះមរមនាថ នរោត្តម សីហមុនី អមព្រះរាជដំណើរដោយព្រះមាតា សម្តេចព្រះមហាក្សត្រី នរោត្តម មុនីនាថ សីហនុ បានយាងចាកចេញពីប្រទេសហើយ នៅព្រឹកថ្ងៃចន្ទនេះ ក្នុងព្រះរាជដំណើរទៅកាន់ប្រទេសចិន។ ជូនព្រះរាជដំណើរព្រះមហាក្សត្រដល់ព្រលានយន្តហោះអន្តរជាតិភ្នំពេញ មានវត្តមានលោកនាយករដ្ឋមន្ត្រី ហ៊ុន សែន ប្រធានរដ្ឋសភា លោក ហេង សំរិន ព្រមទាំងមន្ត្រីជាន់ខ្ពស់ និងក្រុមគ្រួសាររាជវង្សជាច្រើនទៀត។
ការយាងចាកចេញពីប្រទេសនៅពេលនេះ ត្រូវបានគេពន្យល់ថា ព្រះមហាក្សត្រត្រូវយាងទៅទទួលការត្រួតពិនិត្យព្រះរាជសុខភាពពីគ្រូពេទ្យចិននៅទីក្រុងប៉េកាំង។ ព្រះអង្គក៏ត្រូវយាងជាអធិបតីក្នុងពិធីប្រកួតបាល់ទាត់អាស៊ីនៅទីក្រុងណាននីញ តាមការយាងអញ្ជើញរបស់មេដឹកនាំចិនផងដែរ។ នេះបើយោងតាមព្រះរាជសារដែលចេញផ្សាយនៅថ្ងៃដដែលនេះ។ ក្នុងពេលអវត្តមានពីប្រទេស ព្រះមហាក្សត្របានផ្ទេរតួនាទីជាប្រមុខរដ្ឋជូនលោក ជា ស៊ីម ប្រធានព្រឹទ្ធសភា។
អវត្តមានពីប្រទេសរបស់ព្រះមហាក្សត្រដែលកើតឡើងចំពេលដែលវិបត្តិនយោបាយក្រោយការបោះឆ្នោតនៅមិនទាន់អាចដោះស្រាយចេញ បានធ្វើឲ្យមានការព្រួយបារម្ភថា កម្តៅនយោបាយអាចកើនឡើងថែមទៀត។ ម្យ៉ាងទៀត ការយាងចាកចេញពីប្រទេសរបស់ព្រះមហាក្សត្រនៅពេលនេះ បានធ្វើឡើងចំថ្ងៃដែលគណៈកម្មាធិការជាតិរៀបចំការបោះឆ្នោតប្រកាសលទ្ធផលបណ្តោះអាសន្ននៃការបោះឆ្នោត បន្ទាប់ពីគណបក្សជាប់ឆ្នោតទាំងពីរបានជួបនឹងបរាជ័យក្នុងការបង្កើតគណៈកម្មការចម្រុះដើម្បីដោះស្រាយភាពមិនប្រក្រតីនៃការបោះឆ្នោត។
បញ្ហានេះបាននាំឲ្យមជ្ឈដ្ឋានខ្លះសង្ស័យថា ព្រះអង្គអាចនឹងមិនយាងធ្វើជាព្រះរាជអធិបតីភាពក្នុងកិច្ចប្រជុំសភាលើកដំបូងនោះឡើយ ប្រសិនបើគណបក្សនយោបាយជាប់ឆ្នោតទាំងពីរមិនអាចស្វែងរកការស្រុះស្រួលគ្នាឲ្យបាននៅមុនការកោះប្រជុំសភាដំបូងទេនោះ។ គេក៏មិនដឹងថា ព្រះមហាក្សត្រនឹងយាងត្រឡប់មកវិញនៅថ្ងៃណានោះដែរ។
យ៉ាងណាក៏ដោយ នៅក្នុងព្រះរាជសារដដែល សម្តេចព្រះបរមនាថ នរោត្តម សីហមុនី បានសន្យាថា ព្រះអង្គនឹងយាងត្រឡប់មកមាតុប្រទេសវិញឲ្យទាន់កិច្ចប្រជុំសភាដំបូង ដើម្បីធ្វើជាព្រះរាជអធិបតីក្នុងពិធីនោះ។ កិច្ចប្រជុំសភាដំបូងនឹងប្រព្រឹត្តទៅនៅចុងខែកញ្ញាខាងមុខនេះ ពោលគឺរយៈពេល ៦០ ថ្ងៃក្រោយការបោះឆ្នោត ដូចមានចែងក្នុងរដ្ឋធម្មនុញ្ញ។
មជ្ឈដ្ឋាននានាកំពុងរង់ចាំមើលថា តើវិបត្តិនយោបាយអាចដោះស្រាយបាននៅមុនកិច្ចប្រជុំសភាដំបូងដែរឬទេ? ហើយតើព្រះមហាក្សត្រពិតជានឹងយាងមកធ្វើជាអធិបតីក្នុងពិធីបើកសម័យប្រជុំសភាដំបូង តាមការគ្រោងទុកដែរឬយ៉ាងណា?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ