លោក ស៊ុយ សែម៖ តម្លៃភ្លើងថ្លៃជាកង្វល់របស់រដ្ឋាភិបាល
រដ្ឋមន្ត្រីក្រសួងឧស្សាហកម្ម រ៉ែ និងថាមពល លោក ស៊ុយ សែម បានថ្លែងប្រាប់អ្នកកាសែតនៅថ្ងៃនេះថា រដ្ឋាភិបាលកំពុងព្យាយាមកាត់បន្ថយតម្លៃនៃការប្រើប្រាស់ថាមពល តាមរយៈការបង្កើតរោងចក្រអគ្គិសនី និងការបញ្ជូនខ្សែបណ្តាញមេអគ្គិសនីទៅដល់ជនបទ។ រដ្ឋាភិបាលមានផែនការអោយពលរដ្ឋគ្រប់គ្នាមានអគ្គិសនីប្រើប្រាស់នៅក្នុងឆ្នាំ២០២០។
ចុះផ្សាយនៅថ្ងៃ៖
ស្តាប់ - ០២:០១
រដ្ឋមន្ត្រីទទួលបន្ទុកឧស្សាហកម្ម រ៉ែ និងថាមពល លោក ស៊ុយ សែម បានអះអាងថា រដ្ឋាភិបាលបានមានកង្វល់អំពីការតម្លៃអគ្គិសនីខ្ពស់ ហេតុដូច្នេះហើយបានជារដ្ឋាភិបាលកំពុងខិតខំធ្វើយ៉ាងណាដើម្បីអោយតម្លៃអគ្គិសនីនៅតាមគេហដ្ឋាននោះថយចុះ។ នៅពេលដែលរដ្ឋាភិបាលមានផែនការធ្វើអោយគ្រប់តំបន់ជនបទក្នុងប្រទេសកម្ពុជាមានថាមពលអគ្គិសនីប្រើប្រាស់នៅក្នុងឆ្នាំ២០២០នោះ លោកស៊ុយ សែមបានពន្យល់ថា សព្វថ្ងៃនេះរដ្ឋាភិបាលកំពុងបង្កើតរោងចក្រអគ្គិសនីខ្នាតធំ និងបញ្ចូនបណ្តាញខ្សែអគ្គិសនីទៅតាមខេត្ត និងជនបទ។
បើតាមការពន្យល់របស់រដ្ឋមន្ត្រីក្រសួងថាមពល ដោយសារតែគ្មានរោងចក្រធំ និងគ្មានខ្សែបណ្តាញមេពីរោងចក្រធំនោះហើយ ដែលធ្វើអោយពលរដ្ឋត្រូវប្រើប្រាស់រោងចក្រអគ្គិសនីខ្នាតតូច។ ហើយថារោងចក្រខ្នាតតូចទាំងនោះបានប្រើប្រាស់ប្រេងម៉ាស៊ូតដែលពេលខ្លះមានតម្លៃថ្លៃដើម្បីដំណើរការមាស៊ីនផលិតថាមពល ហើយដែលធ្វើអោយតម្លៃអគ្គិសនីឡើងថ្លៃសម្រាប់អ្នកប្រើប្រាស់នោះ។
រដ្ឋមន្ត្រីកំពុងនិយាយអំពីស្ថានភាពអគ្គីសនី ចំពេលដែលអគ្គិសនីជាតិកម្ពុជាបានប្រកាសឡើងតម្លៃប្រើប្រាស់ថាមពលសម្រាប់ប្រភេទនៃការប្រើប្រាស់មួយចំនួនកាលពីប៉ុន្មានខែមុន ហើយថ្មីនេះទៀត អគ្គិសនីកម្ពុជាក៏ទើបជូនដំណឹងដល់អ្នកប្រើប្រាស់នៅក្នុងរាជធានីភ្នំពេញ ខេត្តកណ្តាល និងកំពង់ស្ពឺអំពីការកាត់ផ្តាច់ចរន្តអគ្គីសនីតាមវេន ដោយសារតែការខ្វះខាតទឹកសម្រាប់ដំណើរការរោងចក្រវារីអគ្គិសនីនៅគិរីរម្យ និងនៅស្ទឹងកំចាយ។ ហើយថាការកាត់ផ្តាច់នេះនឹងអាចមានរយៈពេលរហូតដល់ខែមិថុនាឆ្នាំក្រោយឯណោះ។
សេចក្តីជូនដំណឹងដែលត្រូវបានចេញផ្សាយកាលពីថ្ងៃទី៣០វិច្ឆិកា បានបញ្ជាក់ថាប្រាប់អ្នកប្រើប្រាស់ថា បញ្ហាកង្វះខាតថាមពលអគ្គិសនីនឹងត្រូវកាត់បន្ថយ ចាប់ពីពាក់កណ្តាលឆ្នាំ២០១៣ក្រោយនេះទៅ ពីព្រោះរោងចក្រផលិតអគ្គិសនីជាច្រើនកន្លែងនឹងត្រូវបើកអោយដំណើរការផលិតអគ្គិសនីជាបន្តបន្ទាប់គ្នា។
រដ្ឋមន្ត្រីឧស្សាហកម្ម លោកស៊ុយ សែមបានប្រាប់អោយដឹងថា សព្វថ្ងៃថាមពលប្រើប្រាស់សរុបនៅក្នុងរាជធានីមានប្រមាណ៤០០មេហ្កាវ៉ាត់ និង មានជិត១០០០មេហ្កាវ៉ាត់នៅក្នុងប្រទេសកម្ពុជាទាំងមូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ