អឺរ៉ុប និង អាមេរិកទិតៀនរុស្ស៊ីដែលមិនព្រមចុះឈ្មោះបក្សប្រឆាំងថ្មី
បក្សប្រឆាំងថ្មីនោះ មានឈ្មោះថា “បក្សសេរីភាពប្រជាជន” ហៅកាត់ជា ភាសារុស្ស៊ី ថា PARNAS ទើបបានត្រូវក្រសួងយុត្តិធម៌រុស្ស៊ី ប្រកែកពុំព្រមចុះឈ្មោះក្នុងបញ្ជីខ្លួន ក្រោមលេសថា មិនបានបំពេញតាមបែបបទ ដែលទាមទារដោយ “ច្បាប់ស្តីអំពីគណបក្ស នយោបាយ” នៅរុស្ស៊ី។ ប៉ុន្តែ តាមយោបល់ពួកអ្នកដឹកនាំបក្សថ្មីនេះ ការសម្រេចចិត្តរបស់ ក្រសួងយុត្តិធម៌មិនមានលក្ខណៈគតិយុត្តឡើយ វាជាការសម្រេចចិត្តនយោបាយសុទ្ធសាធ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
ជាការកត់សម្គាល់ ជំហរអវិជ្ជមានពីខាងក្រសួងយុត្តិធម៌ គឺមានន័យថា បក្សប្រឆាំងនោះ មិនអាចចូលប្រឡូក ក្នុងការបោះឆ្នោតជ្រើសរើសសភាឌូម៉ា នីតិកាលថ្មី នៅចុងឆ្នាំ២០១១នេះទេ។
ប្រតិកម្មពីខាងស.រ.អា. សំដែងដោយលោកស្រីរដ្ឋមន្ត្រីការបរទេស Hillary Clinton ដែលថា ទីក្រុងវ៉ាស៊ីនតោនខកចិត្តនឹងសេចក្តីសម្រេចរបស់ក្រសួងយុត្តិធម៌រុស្ស៊ី ដោយចោទជា សំនួរទៅផង “ តើការសម្រេចចិត្តនេះ វាឆ្លើយសមស្រប ដោយរបៀបណាដែរ នឹង កាតព្វកិច្ចអន្តរជាតិរបស់រុស្ស៊ី នឹងសេចក្តីថ្លែងការណ៍ក្តែងៗ របស់ថ្នាក់ដឹកនាំរុស្ស៊ី។ ស.រ.អា. អំពាវនាវសុំឲ្យទីក្រុងម៉ូស្គូ ឲ្យធ្វើការស៊ើបអង្កេត អំពីករណីរំលោភបំពានលើច្បាប់ បណ្តាលមកពីក្រសួងយុត្តិធម៌រុស្ស៊ីមិនចុះឈ្មោះ បក្សប្រឆាំងក្នុងបញ្ជីខ្លួន។
ចំណែកលោកស្រី Catherine Ashton ដែលជាឧត្តមតំណាងរបស់សហភាពអឺរ៉ុប ខាង នយោបាយក្រៅប្រទេស ថ្លែងថា ការដែលរដ្ឋាភិបាលរុស្ស៊ីពុំព្រមចុះឈ្មោះបក្សប្រឆាំង ក្នុងបញ្ជីខ្លួន គឺស ឲ្យឃើញថា នៅរុស្ស៊ី នៅមានជាក់លាក់មែន ឧបសគ្គដែលរាំងរាដល់ ការអភិវឌ្ឍន៍ “ប្រព័ន្ធនយោបាយពហុបក្ស“ ដែលបំបិទលទ្ធភាព សម្រាប់ធ្វើការប្រជែងគ្នា រវាង គណបក្សនយោបាយនិន្នាការប្លែកៗ និងដែលពង្រួញឲ្យខើចទៅ ជម្រើស ដែលត្រូវស្ថិត នៅពីមុខបណ្តាជនម្ចាស់ឆ្នោត។
បក្សប្រឆាំងថ្មី ឈ្មោះ PARNAS បានត្រូវបង្កើតឡើង កាលពីខែធ្នូ ឆ្នាំទៅមិញ។ វាដឹកនាំដោយពួកអ្នកនយោបាយ មានទំនោស្តាំ បស្ចិមលោកនិយម ពោលគឺ អតីតនាយករដ្ឋមន្ត្រីKasyanov អតីតឧបនាយករដ្ឋមន្ត្រី និងជាអតីតអភិបាលខេត្ត Niemtsov ដែលល្បីខាងទាមទារ ពីលោកនាយករដ្ឋមន្ត្រី Poutine ឲ្យលាចេញពីតំណែងទៅ ក្រោមពាក្យស្លោកថា “ប្រទេសរុស្ស៊ីឥតត្រូវការឲ្យមានឈ្មោះ Poutine ដឹកនាំឡើយ“។
លោកសហប្រធានទាំងពីរនាក់ នៃបក្សប្រឆាំងថ្មីនោះ សុទ្ធតែចោទលោក Poutine ថា ជាអ្នកស្ថិតនៅពីក្រោយ ការសម្រេចចិត្តរបស់ក្រសួងយុត្តិធម៌ ពីព្រោះ តាមសំដីគេ គេចេះបំពេញ រួចទៅហើយ តាមការទាមទារនៃ “ច្បាប់ស្តីអំពីគណបក្សនយោបាយ” នៅរុស្ស៊ី ដែលចែងថា ដើម្បីក្លាយជាគណបក្សនយោបាយទៅកើត វាត្រូវមានសមាជិក យ៉ាងហោចណាស់ ៤៥.០០០នាក់ និងមានសាខា ដំណើរការប្រចាំ នៅតាមខេត្ត កុំឲ្យតិចជាង ចំនួនពាក់កណ្តាល នៃខេត្តទាំង៨៣ របស់ប្រទេសរុស្ស៊ី បានន័យថា កុំឲ្យតិចជាង ចំនួន ៤២ខេត្ត។ រីឯ បក្សប្រឆាំង របស់គេ ឈ្មោះ PARNAS មានសមាជិក ដល់ទៅ ៤៦.១៥៨នាក់ និងមានសាខា ប្រចាំនៅតាម ៥៣ខេត្តឯណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ