គំរោងច្បាប់អន្តោប្រវេសន៍នឹងដាក់បង្ហាញនៅសភាអាមេរិក នៅថ្ងៃអង្គារខាងមុខ
នៅសហរដ្ឋអាមេរិក បន្ទាប់ពីពិភាក្សាគ្នាអស់រាប់ខែមក នៅទីបំផុតគណៈកម្មការទ្វេភាគីអាមេរិកដែលមានសមាជិកមកពីគណបក្សប្រជាធិបតេយ្យនិងគណបក្សសាធារណរដ្ឋ នឹងដាក់បង្ហាញសភា នូវគំរោងច្បាប់អន្តោប្រវេសន៍ នៅថ្ងៃអង្គារដើមសប្តាហ៍ក្រោយនេះ។ គំរោងច្បាប់នេះ មានគោលដៅអនុញ្ញាតអោយជនអន្តោប្រវេសន៍១១លាននាក់ ដែលមានដើមកំណើតក្នុងបណ្តាប្រទេសនានានៅអាមេរិកឡាទីន ហើយដែលកំពុងរស់ដោយគ្មានក្រដាសស្នាមត្រឹមត្រូវតាមច្បាប់នៅសហរដ្ឋអាមេរិក បានទទួលសិទ្ធិរស់នៅស្របច្បាប់។ គំរោងច្បាប់នេះ ជាវិធានការសំខាន់មួយក្នុងចំណោមវិធានការសំខាន់នានា ក្នុងអណត្តិទីពីររបស់ប្រធានាធិបតីអូបាម៉ា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
កាលពីថ្ងៃពុធកន្លងទៅ សមាជិកនានានៃគណៈកម្មការទ្វេភាគីអាមេរិក ដែលមកពី គណបក្សប្រជាធិបតេយ្យនិងគណបក្សសាធារណរដ្ឋ បានចរចាគ្នារយៈពេល៦ម៉ោង ហើយបានសំរេចដាក់បង្ហាញគំរោងច្បាប់អន្តោប្រវេសន៍នេះ ទៅសភា នៅថ្ងៃអង្គារសប្តាហ៍ក្រោយ។ ពួកគេបានចុះសម្រុងគ្នាលើប្រាក់ខែកម្មករបរទេស ដែលធ្វើការក្នុងវិស័យកសិកម្ម និងពេលវេលាកំណត់នៃទិដ្ឋាការឆ្លងដែនរបស់កម្មករទាំងនេះ។
គំរោងច្បាប់នេះ មានគោលដៅអនុញ្ញាតអោយជនអន្តោប្រវេសន៍១១លាននាក់ ដែលមានដើមកំណើតក្នុងបណ្តាប្រទេសនានានៅអាមេរិកឡាទីន ហើយដែលកំពុងរស់ដោយគ្មានក្រដាសស្នាមត្រឹមត្រូវតាមច្បាប់នៅសហរដ្ឋអាមេរិក បានទទួលសិទ្ធិរស់នៅស្របច្បាប់។
នេះជាគំរោងច្បាប់ដ៏ចំបងមួយ តាំងតែពីលោកអូបាម៉ាបានជាប់ឆ្នោតជាប្រធានាធិបតីអាមេរិកសំរាប់អណត្តិទីពីរមក។
គួររំលឹកថា ក្នុងការបោះឆ្នោតប្រធានាធិបតីកាលពីខែវិច្ឆិកាកន្លងមក លោកអូបាម៉ា បានទទួលការគាំទ្រខ្លាំងក្លា ពីសហគមន៍ប្រជាជនដែលមានដើមកំណើតនៅអាមេរិកឡាទីន។ ហើយដោយសារតែទំងន់នៃការគាំទ្រនេះ លោកអូបាម៉ាបានទទួលជោគជ័យលើលោក Mitt Romney ដែលជាគូប្រជែងរបស់លោក។
គំរោងច្បាប់អន្តោប្រវេសន៍នេះ ក៏មានគោលដៅជួយជនអន្តោប្រវេសន៍ចិននានាផងដែរ ដោយអាមេរិកនឹងផ្តល់ក្រដាសស្នាមស្របច្បាប់ដល់វិស្វករចិននានា និងរាល់ជនជាតិចិនដែលមានចំណេះដឹងខ្ពស់ផ្នែកវិទ្យាសាស្ត្រ រឺក៏គណិតវិទ្យាជាដើម។ ច្បាប់នេះចង់ជំរុញអោយបញ្ញវន្តចិនមកបំរើការងារ ក្នុងទឹកដីអាមេរិក។
គំរោងច្បាប់នេះក៏មានទិសដៅជួយកម្មករបរទេសនានាដែលធ្វើការក្នុងផ្នែកសណ្ឋាគារ រឺសំណង់អាគារផ្សេងៗផងដែរ។ គួរបញ្ជាក់ថា បច្ចប្បន្ននេះ ក្នុងចំណោមកម្មករធ្វើការក្នុងវិស័យកសិកម្មនៅអាមេរិកប្រហែល ១លាន ១សែននាក់ មានកម្មករជិតពាក់កណ្តាលនៃចំនួននេះ ពុំមានក្រដាសស្នាមត្រឹមត្រូវតាមច្បាប់នោះទេ។ គេសង្កេតឃើញវត្តមានកម្មករបរទេសជាច្រើនបំរើការងារខុសច្បាប់ ក្នុងវិស័យនានាដែលអាមេរិកនៅខ្វះធនធានមនុស្ស។ ដូច្នេះ គំរោងច្បាប់នេះនឹងបិទបញ្ចប់នូវបញ្ហាអន្តោប្រវេសន៍ខុសច្បាប់ក្នុងទឹកដីអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ