រដ្ឋាភិបាលកម្ពុជា បង្កើនថវិកា រហូតដល់ ១,៨ លានដុល្លារ សម្រាប់តុលាការខ្មែរក្រហម
នៅឆ្នាំ២០១៣នេះ រាជរដ្ឋាភិបាលកម្ពុជា បានបង្កើតថវិកា សម្រាប់ផ្តល់ឲ្យសាលាក្តីកាត់ទោសអតីតមេខ្មែរក្រហម រហូតដល់ ១,៨ លានដុល្លារអាមេរិក។ ថវិកាបដិភាគប្រចាំឆ្នាំរបស់រាជរដ្ឋាភិបាលកម្ពុជា ត្រូវប្រើប្រាស់ សម្រាប់ចំណាយលើប្រតិបត្តិការទូទៅ រួមមាន ការបង់ថ្លៃទឹក ថ្លៃភ្លើង ថ្លៃអគារ ថ្លៃសេវាដឹកជញ្ជូនបុគ្គលិកជាតិ និងអន្តរជាតិ សរុបចំនួន ៤០០ នាក់ ព្រមទាំងការចំណាយទៅលើសេវាព្យាបាល ជនជាប់ចោទ។ យ៉ាងណាក៏ដោយ មកដល់ពេលនេះ កង្វះថវិកា សម្រាប់បើកប្រាក់ខែឲ្យបុគ្គលិកជាតិប្រមាណ ៣០០ នាក់ សម្រាប់ខែធ្នូ នៅតែជាបញ្ហានៅឡើយ។
ចុះផ្សាយនៅថ្ងៃ៖
ស្តាប់ - ០២:៤៤
ថវិកាបដិភាគរបស់រាជរដ្ឋាភិបាលកម្ពុជា សម្រាប់តុលាការចម្រុះកាត់ទោសអតីតមេខ្មែរក្រហម បានកើនឡើងជារៀងរាល់ឆ្នាំ ចាប់តាំងពីឆ្នាំ២០០៦ ដែលមានចំនួនត្រឹមតែ ៥ សែនដុល្លារប៉ុណ្ណោះ។ នៅឆ្នាំ២០១៣នេះ រដ្ឋាភិបាល បានបង្កើនចំណាយរហូតដល់ ១,៨ លានដុល្លារ សម្រាប់សាលាក្តីចម្រុះ។ នេះបើតាមលោក នេត្រ ភក្ត្រា អ្នកនាំពាក្យសាលាក្តីខ្មែរក្រហម។
លោក នេត្រ ភក្ត្រា បានលើកឡើងថា រាជរដ្ឋាភិបាលកម្ពុជា តែងតែផ្តល់ប្រាក់បដិភាគ ដល់សាលាក្តីខ្មែរក្រហម ដើម្បីជួយលើការចំណាយលើប្រតិបត្តិការទូទៅ រួមមាន ការបង់ថ្លៃទឹក ថ្លៃភ្លើង ថ្លៃអគារ ថ្លៃសេវាដឹកជញ្ជូនបុគ្គលិកជាតិ និងអន្តរជាតិ ចំនួន ៤០០ នាក់ ពីថ្ងៃចន្ទ ដល់ថ្ងៃសុក្រ ពីទីក្រុងភ្នំពេញ ចូលមកកន្លែងតុលាការ ព្រមទាំងការចំណាយទៅលើសេវាព្យាបាល ជនជាប់ចោទ។
លោក នេត្រ ភក្ត្រា បានបន្ថែមថា បើប្រៀបធៀបទៅនឹងម្ចាស់ជំនួយធំៗ ដែលបានផ្តល់ថវិកា ដល់សាលាក្តីខ្មែរក្រហម គឺរាជរដ្ឋាភិបាលកម្ពុជា ស្ថិតនៅលំដាប់លេខរៀង បន្ទាប់ពីប្រទេសជប៉ុន បារាំង អង់គ្លេស អាមេរិក អូស្ត្រាលី និងសហភាពអឺរ៉ុប។
សម្រាប់ថវិកា ឆ្នាំ២០១៣ ដែលភាគីជាតិ (កម្ពុជា) ត្រូវការ ៩,៥ លានដុល្លារអាមេរិក។ មកដល់ពេលនេះ លោក នេត្រ ភក្ត្រា អះអាងថា ភាគីជាតិ ទទួលបានការសន្យាផ្តល់ជំនួយពី រដ្ឋាភិបាលកម្ពុជា ចំនួន ១,៨ លានដុល្លារ និងប្រទេសអាល្លឺម៉ង់ ចំនួន ៧ សែនដុល្លារអាមេរិក។ រីឯភាគីអន្តរជាតិ សម្រាប់ឆ្នាំ២០១៣ ត្រូវការថវិកា ប្រមាណ ៣០ លានដុល្លារអាមេរិក។
យ៉ាងណាក៏ដោយ មកដល់ពេលនេះ លោក នេត្រ ភក្ត្រា បានអះអាងថា សម្រាប់ភាគីជាតិ នៅតុលាការខ្មែរក្រហម ប្រមាណ ៣០០ នាក់ រាប់តាំងពីអ្នកបើកបរ រហូតដល់ចៅក្រម គឺមិនទាន់បានទទួលប្រាក់បៀវត្សរ៍ សម្រាប់ខែធ្នូទេ។ នេះមកពីកង្វះសាច់ប្រាក់ ហើយអាចនឹងយឺតយ៉ាវ រហូតដល់ចុងខែមករានេះ។ ដោយឡែកសម្រាប់ប្រាក់ខែមករាតទៅ គឺសាលាក្តីមិនទាន់ដឹងថា យ៉ាងណាទេ ដោយគម្រោងថវិកា សម្រាប់ឆ្នាំ២០១៣ នឹងត្រូវម្ចាស់ជំនួយ អនុម័តនៅចុងខែមករានេះ ឬក៏នៅដើមខែកុម្ភៈ ឆ្នាំ២០១៣។
ក៏ប៉ុន្តែ ដំណើរការនៅតុលាការកាត់ទោសអតីតមេខ្មែរក្រហម នៅតែបន្តជាធម្មតា ដោយនៅថ្ងៃទី៨ ខែមករា ឆ្នាំ២០១៣ អង្គជំនុំជម្រះសាលាដំបូង របស់សាលាក្តីខ្មែរក្រហម បានបន្តសវនាការ លើសំណុំរឿង០០២ ដែលជាការកាត់ទោសលើលោក នួនជា លោកអៀងសារី និងលោក ខៀវសំផន។ នៅថ្ងៃនេះ មានសាក្សីមួយរូប ចូលឆ្លើយបំភ្លឺ គឺលោក សូ វិ មានអាយុ ៥២ ឆ្នាំ មានទីលំនៅក្នុងខេត្តប៉ៃលិន ជាអតីតអ្នករត់សំបុត្រ ក្នុងសម័យខ្មែរក្រហម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ