អាល្លឺម៉ង់លុបចោលគម្រោងយោធា១០០លានជាមួយរុស្ស៊ី
រដ្ឋាភិបាលអាល្លឺម៉ង់ បានប្រកាសជាផ្លូវការនៅថ្ងៃចន្ទទី ៤ សីហានេះ កប់ចោលគម្រោងយោធាមួយជាមួយក្រុមហ៊ុនជាតិរុស្ស៊ី Rheinmetall ដើម្បីបញ្ជាក់ពីជំហរដាច់ខាតរបស់អាល្លឺម៉ង់ចង់ដាក់ទណ្ឌកម្មប្រឆាំងនឹងរុស្ស៊ីក្នុងវិបត្តិអ៊ុយក្រែន។ ម្យ៉ាងវិញជាមួយនឹងការសម្រេចចិត្តលុបចោលផែនការយោធាជាមួយរុស្ស៊ីដូច្នេះ អាល្លឺម៉ង់ សង្ឃឹមថាសមាជិកសហភាពអឺរ៉ុប យកគំរូតាម ដោយហាមឃាត់ ឬឈប់លក់ និងប្រគល់អាវុធទៅរុស្ស៊ី ទោះបីជាបានព្រមព្រៀងគ្នាពីមុនយ៉ាងណាក៏ដោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
បន្ទាប់ពីមានព័ត៌មានលេចឮចុះផ្សាយតាមកាសែត គឺនៅថ្ងៃចន្ទនេះតែម្តងដែលរដ្ឋមន្ត្រីក្រសួងសេដ្ឋកិច្ចអាល្លឺម៉ង់បានបញ្ជាក់ព័ត៌មានថារដ្ឋាភិបាលបានដកសេចក្តីអនុញ្ញាតលែងឱ្យមានគម្រោងយោធាជាមួយរុស្ស៊ី។ គម្រោងបង្កើតមជ្ឈមណ្ឌល ដែលមានបំពាក់សម្ភារៈបរិក្ខារទំនើបៗ សម្រាប់បំពាក់បំប៉នកងកម្លាំងទាហានរុស្ស៊ី ប្រមាណបីម៉ឺននាក់ ក្នុងមួយឆ្នាំៗ គ្រោងនឹងបើកទ្វារទទួលសិស្សទាហាន នៅវិស្សមកាលឆ្នាំនេះ ប៉ុន្តែដោយហេតុតែវិបត្តិអ៊ុយក្រែន លោក Gabriel រដ្ឋមន្ត្រីក្រសួងសេដ្ឋកិច្ច បានបង្អាក់ដំណើរការគម្រោងយោធានេះ ជារហូតមក តាំងពីខែមីនា ដោយរង់ចាំ ទាល់តែមានសេចក្តីសម្រេចចិត្តថ្មី។
បញ្ជាថ្មី គឺលុបចោលតែម្តង ! ហេតុផលនៃការលុបចោលគម្រោងយោធា ទំហំប្រមាណ១០០លានអឺរ៉ូនេះ ក៏ព្រោះតែអាល្លឺម៉ង់យល់ថាស្ថានភាពបច្ចុប្បន្ន អាល្លឺម៉ង់មិនអាចការពារមជ្ឈមណ្ឌលបំពាក់បំប៉នបាន ប្រសិនបើប្រគល់ទៅឱ្យម៉ូស្គូ។ បើតាមការពន្យល់បំភ្លឺរបស់អ្នកនាំពាក្យក្រសួងសេដ្ឋកិច្ច ចំណែកដែលប្រគល់ទៅឱ្យរួចហើយ មិនអាចធ្វើប្រតិបត្តិការបានទេ ហើយខាងភាគីរុស្ស៊ី ដែលមិនអាចទាក់ទងបាននៅថ្ងៃនេះ អាចនឹងទាមទារសំណងជំងឺចិត្តផង។
ជាមួយនឹងការហាមឃាត់មិនឱ្យមានកិច្ចសន្យាយោធាជាមួយរុស្ស៊ីបែបនេះ មកពីប៊ែរឡាំង ចង់បង្ហាញពីជំហរដាច់ខាតរបស់អាល្លឺម៉ង់ ដែលធ្វើខ្លាំងជាងរបបទណ្ឌកម្មរបស់សហភាពអឺរ៉ុប កាលពីសប្តាហ៍មុនទៅទៀត។ អាល្លឺម៉ង់ពិតជាចង់បិទផ្លូវមិនឱ្យអឺរ៉ុបធ្វើការនាំចេញគ្រឿងសព្វាវុធទៅរុស្ស៊ីទេ ប៉ុន្តែមិនសំដៅលើករណីកិច្ចសន្យាដែលបានចុះហត្ថលេខារួចហើយទេ។ នេះមានន័យថាបើទោះបីជាអាល្លឺម៉ង់ រិះគន់និងបន្ទោសបារាំងជាញឹកញយក៏ដោយ ក៏បារាំងនៅតែជ្រើសរើសប្រគល់នាវាចម្បាំងផ្ទុកយន្តហោះមីស្រ្តាល់ទៅឱ្យរុស្ស៊ី តាមការគ្រោងទុកដដែល ព្រោះពុំនោះទេ បារាំងនឹងត្រូវរងពិន័យពីរុស្ស៊ី ក្នុងទំហំទឹកប្រាក់ដល់ទៅ១ពាន់លានអឺរ៉ូ។
ចំណែកខាងអាល្លឺម៉ង់ ក៏មិនបិទផ្លូវខ្លួនឯងទាំងស្រុងដែរ អាល្លឺម៉ងសង្ឃឹមថានឹងអាចវិលមករកគម្រោងយោធាជាមួយរុស្ស៊ីនេះវិញ ប្រសិនបើស្ថានការណ៍ប្រសើរឡើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ