អឺរ៉ុបព្រមានដាក់ទណ្ឌកម្មបន្ថែមទៅលើរុស្ស៊ីក្នុងរឿងធ្លាក់យន្តហោះម៉ាឡេស៊ី
មេដឹកនាំបារាំង អង់គ្លេស និងអង់គ្លេសបានជួបប្រជុំគ្នាតាមទូរស័ព្ទ នៅព្រឹកថ្ងៃអាទិត្យ ទី ២០កក្កដា ដោយបានសម្រេចរួមគ្នា គំរាមដាក់ទណ្ឌកម្មទៅលើរុស្ស៊ី ប្រសិនបើរុស្ស៊ីមិនដាក់គំនាបទៅលើក្រុមបំបែកខ្លួន អ៊ុយក្រែន ដើម្បីឲ្យក្រុមនេះបើកផ្លូវអនុញ្ញាតឲ្យក្រុមស៊ើបអង្កេតចូលទៅកាន់ទីតាំងដែលយន្តហោះម៉ាឡេស៊ី MH ១៧បានធ្លាក់កាលពីថ្ងៃព្រហស្បតិ៍។
ចុះផ្សាយនៅថ្ងៃ៖
ស្តាប់ - ០២:១៤
ប្រធានាធិបតីបារាំង នាយករដ្ឋមន្រ្តីអង់គ្លេស និងនាយករដ្ឋមន្រ្តីអាល្លឺម៉ង់បានមូលមតិគ្នា គំរាមដាក់ទណ្ឌកម្មបន្ថែមទៅលើប្រទេសរុស្ស៊ី ក្នុងករណីទីក្រុងម៉ូស្គូនៅតែមិនព្រមបញ្ចុះបញ្ចូលក្រុមឧទ្ទាមនិយមរុស្ស៊ីឲ្យបើកផ្លូវដល់អ្នកស៊ើបអង្កេតអន្តរជាតិ។ ប្រមុខដឹកនាំរបស់ប្រទេសអឺរ៉ុបទាំងបីបញ្ចេញប្រតិកម្មខ្លាំងៗដាក់រុស្ស៊ី បន្ទាប់ពីមានសេចក្តីរាយការណ៍ថា អ្នកស៊ើបអង្កេតរបស់អង្គការOSCE របស់អឺរ៉ុបត្រូវរារាំងមិនឲ្យចូលទៅជិតបំណែកយន្តហោះ ដែលជាភស្តុតាងសំខាន់នៃការធ្លាក់យន្តហោះម៉ាឡេស៊ី ដែលបានសម្លាប់អ្នកដំណើរ និងអ្នកបើកបរទាំងអស់ ២៩៨នាក់។
នៅក្នុងសេចក្តីថ្លែងការណ៍របស់វិមានប្រធានាធិបតីបារាំង ចេញផ្សាយនៅថ្ងៃអាទិត្យ ប្រមុខរដ្ឋរបស់ប្រទេសបារាំង អង់គ្លេស និងអាល្លឺម៉ង់ បានព្រមានថា បើសិនរុស្ស៊ីមិនធ្វើសម្មភាពអ្វីដើម្បីបន្ធូរភាពតានតឹងនៅតំបន់ខាងកើតអ៊ុយក្រែន នោះ រុស្ស៊ីប្រឈមនឹងទណ្ឌកម្មថ្មីៗបន្ថែមទៀត ពីសហភាពអឺរ៉ុប។ រដ្ឋមន្រ្តីការបរទេសរបស់សហភាពអឺរ៉ុបនឹងជួបប្រជុំគ្នា នៅថ្ងៃអង្គារ ទី ២២ កក្កដា ដើម្បីពិចារណាថា តើត្រូវដាក់ទណ្ឌកម្មបន្ថែមទៅលើរុស្ស៊ីដែរឬទេ។
ដោយសារតែរុស្ស៊ីភ្ជាប់តំបន់គ្រីមេរបស់អ៊ុយក្រែនចូលទៅក្នុងទឹកដីរបស់ខ្លួន កាលពីខែមីនាកន្លងទៅ សហភាពអឺរ៉ុបបានដាក់ទណ្ឌកម្មទៅលើរុស្ស៊ី ដោយបានហាមមិនឲ្យបុគ្គលរុស្ស៊ី និងអ៊ុយក្រែន ៧០នាក់ មិនឲ្យចូលទឹកដីអឺរ៉ុប និងផ្អឹបទុកទ្រព្យសម្បត្តិរបស់បុគ្គលរុស្ស៊ីដែលបានចូលរួមចំណែកភ្ជាប់ទឹកដីគ្រីមេចូលទៅខាងរុស្ស៊ី។
នៅភាគខាងកើតអ៊ុយក្រែនវិញ មេដឹកនាំក្រុមបំបែកខ្លួនអ៊ុយក្រែន និយមរុស្ស៊ីបានអះអាងនៅថ្ងៃអាទិត្យថា គេរកឃើញឧបករណ៍មួយដែលមានលក្ខណៈស្រដៀងនឹងប្រអប់ខ្មៅ។ ក្រុមឧទ្ទាមបានរក្សាវាទុកនៅទីក្រុងដូណេសដែលជាបន្ទាយរបស់ពួកគេ និងរង់ចាំប្រគល់ទៅឲ្យក្រុមអ្នកស៊ើបអង្កេតអន្តរជាតិដែលមកពី ខាងអង្គការអាកាសចរណ៍ស៊ីវិលអន្តរជាតិ។
នៅលើទីតាំងធ្លាក់យន្តហោះផ្ទាល់ ប្រធានក្រុមស៊ើបអង្កេតរបស់អង្គការOSCEបាននិយាយប្រាប់អ្នកសារព័ត៌មានថា បំណែកយន្តហោះត្រូវក្រុមឧទ្ទាមរុះរើ ផ្លាស់ទី ចំណែកសាកសព របស់អ្នកដំណើរត្រូវគេដឹកចេញពីកន្លែងយន្តហោះធ្លាក់ និងប្រមូលដាក់ក្នុងទូររទេះភ្លើង ដែលស្ថិតនៅចម្ងាយប្រមាណ ១០គីឡូម៉ែត្រ ពីកន្លែងកើតហេតុ។ តាមមេដឹកនាំក្រុមឧទ្ទាម គេប្រមូលសាកសពដាក់ក្នុងទូររថភ្លើងទឹកកក ដើម្បីរក្សាសាកសព គេចចេញពីការយាយីរបស់សត្វព្រៃ និងសត្វឆ្កែ ដែលចេះតែក្រវែលក្បែរសាកសពដែលនៅដេករណូករណែលលើដី អស់ប៉ុន្មានថ្ងៃមកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ