លោកដូណាល់ ត្រាំ នឹងទៅដល់តំបន់រងគ្រោះ ដោយខ្យល់ព្យុះអ៊ូរ៉ាហ្កង់ Harvey
ខ្យល់ព្យុះអ៊ូរ៉ាហ្កង់ Harvey បានបោកបក់ បង្កជាជំនន់ទឹកភ្លៀង នៅក្នុងរដ្ឋTexas សហរដ្ឋអាមេរិក តាំងតែពីថ្ងៃសុក្រ សប្តាហ៍កន្លងទៅ ហើយបានឆក់យកជីវិតមនុស្សអស់៩នាក់ និងបានបង្កឲ្យខូចខាតផ្ទះសម្បែង ហេដ្ឋារចនាសម្ព័ន្ធយ៉ាងធ្ងន់ធ្ងរ។ លោក ដូណាល់ ត្រាំ នឹងអញ្ជើញទៅដល់ តំបន់រងគ្រោះ នៅព្រឹកថ្ងៃអង្គារនេះ ដើម្បីសម្តែងសាមគ្គីភាព និងលើកទឹកចិត្តដល់ ក្រុមសង្រ្គោះ ដែលកំពុងតែមមាញឹក ជួយរំដោះប្រជាជន ចេញពីតំបន់ ដែលលិចលង់ដោយទឺកជំនន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
“រដ្ឋបាលរបស់ខ្ញុំ និង សហការយ៉ាងម៉ឺងម៉ាត់ ជាមួយនឹងអាជ្ញាធរតំបន់ ក្នុងរដ្ឋ Texas និងរដ្ឋ Louisiane ដើម្បីជួយសង្រ្គោះជីវិតមនុស្ស។ ហើយយើង សូមថ្លែងអំណរគុណ ចំពោះក្រុមសង្រ្គោះបន្ទាន់ ក៏ដូចជាអ្នកដែលបានចូលរួមជួយសង្រ្គោះផ្សេងទៀត”។ នេះគឺជាសម្តីរបស់លោកដូណាល់ ត្រាំ ថ្លែងកាលពីយប់ថ្ងៃចន្ទ ចេញពីសេតវិមាននៅក្រុងវ៉ាស៊ីនតោន។ លោកត្រាំ ថែមទាំងបានសន្យាថា រដ្ឋបាលសហព័ន្ធ នឹងធានាជួយគាំទ្រ ផ្នែកហិរញ្ញវត្ថុ សម្រួលដល់កិច្ចការសង្រ្គោះ និងការកសាង ហេដ្ឋារចនាសម្ព័ន្ធតំបន់រងគ្រោះឡើងវិញ។
តាមការគ្រោងទុក នៅព្រឹកថ្ងៃទី ២៩សីហានេះ លោកដូណាល់ ត្រាំ នឹងត្រូវអញ្ជើញទៅដល់ទីក្រុង Corpus Christi ដែលស្ថិតនៅមាត់ឈូងសមុទ្រមិចស៊ិក ហើយជាទីកន្លែងដែលខ្យល់ព្យុះអ៊ូរ៉ាហ្កង់ Harvey បានចាប់ផ្តើមបោកបក់ បង្កមហន្តរាយ។ បន្ទាប់មកទៀត លោកប្រធានធិបតី នឹងអញ្ជើញទៅដល់ក្រុង Austin។ ចំណែកទីក្រុង Houston ស្ថិតនៅខាងត្បូងរដ្ឋTexas លោកប្រធានាធិបតីមិនអាចអញ្ជើញទៅបានទេ ដោយសារផ្លូវគោកត្រូវកាត់ផ្តាច់ ដោយទឹកជំនន់ កន្លែងខ្លះកំពស់ជាង១ម៉ែត្រ ចំណែកព្រលានយន្តហោះវិញ ក៏ត្រូវលិចលង់ក្នុងទឹកដែរ។
នេះជាលើកទីមួយហើយ ដែលលោកដូណាល់ ត្រាំ ក្នុងនាមជាប្រធានាធិបតី ត្រូវប្រឈមមុខនឹងកាលៈទេសៈគ្រោះធម្មជាតិ ដ៏ធ្ងន់ធ្ងរបែបនេះ។ គេសង្ឃឹមថា ការនេះអាចនឹងធ្វើឲ្យគាត់ ទទួលស្គាល់ខ្លះ អំពីគ្រោះថ្នាក់ នៃការកើនឡើងនូវកំដៅផែនដី។ តាមការស្មាន លោកដូណាល់ ត្រាំ ប្រហែលជាបានមើលឃើញពីបទពិសោធន៍ កាលពីពេលមានខ្យល់ព្យុះអ៊ូរ៉ាហ្កង់ Katrina នៅឆ្នាំ២០០៥។ កាលនោះ លោក George W.Bush បានត្រឹមតែ គយគន់ទិដ្ឋភាពតំបន់រងគ្រោះ ពីលើយន្តហោះតែប៉ុណ្ណោះ ហើយត្រូវបានប្រជាជន រិះគន់ថា បានបង្អែរបង្អង់ ដាក់វិធានការយ៉ាងយឺតយ៉ាវ ដែលធ្វើឲ្យការខូតខាតកាន់តែធ្ងន់ និងចំនួនអ្នកស្លាប់ បានកើនរហូតដល់ ១៨០០នាក់។
សូមបញ្ជាក់ថា ខ្យល់ព្យុះអ៊ូរ៉ាហ្គង់ Harvey ដែលបានចាប់ផ្តើមបោកបក់កាលពីថ្ងៃសុក្រ មានកម្លាំងខ្លាំងបំផុតមិនធ្លាប់មានទេ ជាង៥០ឆ្នាំកន្លងមកនេះ។ ខ្យល់ព្យុះបានស្ងប់ តែបានប្រែក្លាយទៅជាភ្លៀង ធ្លាក់យ៉ាងខ្លាំង ហើយនៅតែបន្តធ្លាក់ ដដែលរហូតមកដល់ថ្ងៃអង្គារនេះ។ ក្រុមសង្រ្គោះ រំពឹងថា អាចមានមនុស្សប្រហែល ៣ម៉ឺននាក់ ដែលត្រូវការទីជំរកបណ្តោះអាសន្នជាបន្ទាន់។ មានមនុស្សស្លាប់យ៉ាងហោចណាស់៩នាក់។ ការខូចខាតសម្ភារៈ សំណង់ និងហេដ្ឋារចនាសម្ព័ន្ធ អាចមានទំហំដល់ទៅរាប់ពាន់លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ